Makbûleya ke 50 serrî yo esnafî kena: Qetî mevacê bes o! 

2021-07-06 12:39:04


	 

	 

	Sema Çaglak

	 

	ÊLIH - Makbûle Ugraka 78 serrî û 50 serrî yo Êlih de esnafî kena. Makbûle ke bi karê deştişî dest bi kar kerd nika zî bi hewldayîş û xebata xo yena nasneyene. Makbûle wina vana: "Mi qetî nêvat bes o û mi her wext hewl da ke ez serê linganê xo de vinderî."

	 

	Yew wareyêko tewr zêde ser de munaqeşe yeno kerdene, ekonomîya xoser ya cinîyan a. Cinîyî bi serran o semedê heqê xo yê ekonomî bigîrê dest, mîyanê têkoşîn de yê. Bêşik cinîyê ke esnafî kenê, serê hişmendiyê komelî de zî kenê. Nê cinîyan ra yew Makbûle Ugrak ya 78 serrî ya.

	 

	Makbûle bi 50 serrî yo esnafî kena. Makbûle ke sere de semedê dewijan deştiş kerdêne û dima ra tena merkezê Êlihî de karê xo dewam kerd. Makbûle yewin cinîya ke Êlihî de esnafî kena.

	 

	'Yewin esnafa cinî ya Êlihî ez bîya'

	 

	Makbûle wina qalê xo yê esnafî kerd: "Mi 28 serrîya xo de dest bi kar kerd. Sere de mi semedê dewijan destişî kerdêne. Dima ra mi dikanê cihêzî akerd. No çi semedê mi û cuya mi çîyêk newe bi. Ez û lajê xo pîya dikan de xebityayî. Dimayê demêk ez tena menda. Êdî heme karûbar serê milê mi de bi. Mi esnafê bînan dir têkilî dayîne ro, xora qet esnaf cinî çinbî. Ez eîşkena vaja ke cinîya ke yewin rey esnafî kerd ez bîya. Mi zaf zehmetî ant. Hem cinîbîyayîş û hem zî esnafî zêde zehmet bî. Labelê pêwa nînan ez serbikewta. Semedê ke ez hêzê xo ra bawer bîya."

	 

	'50 serrî derbaz bi û nika zî karê xo dewam kena'

	 

	Makbûle dîyar kerd ke semedê averşîyayîşî kedêka pîl daya û vat: "Her ke şîne karê mi hîna baş bîne, wina dikanê mi zî pîl bi. Dima ra mi dikanê cêhizî akerd û nika zî cilanê veyvan derznena. Tutanê mi zîhetkarî kerdêne, la xeylê xo ez eleqedar bîne. 50 serrî derbaz bi û nika ez karê xo dewam kena. Mi qet nêvat bes o û mi hewil da ke serê linganê xo de bimana. Mi karê xo ra zaf hes kerdêne û taybetî zî ez xebate ra hes kena."

	 

	'Êdî berardişê bi keda destê cinîyan qels bîyo'

	 

	Makbûle vat, xebata ci cinîyê bînan rê bîya nimûne û vat: "Mîyanê 50 serran de xeylêk çî vuryayî. Xora çîyêk sey vernê nêmaneno. Verê mi rojêke de 3 cilanê veyve yê semedê tutî veyve de xo pay kerê viraştêne. Yê pîlan zî mi rojêke de viraştêne. Viraştişê cilanê veyve kedêka pîl wazeno. La ez zaf xebityena. Mi kedêke pîl daya. La bi demî dir êdî çîyê verê nêmendê. Xeylêk çî hazir yeno rotene. No çî çiqas barê karî şenik bikero zî la berardiş qedêno. Ma êdî cilanê veyve şaristananê bînan ra sîparîş kenê û tena roşenê."