Avûkatanê Abdullah Ocalanî muracatê pêvînayîşî kerdî

2021-06-28 13:49:24


	 

	STENBOL - Avûkatanê Rayberê PKKyî Abdullah Ocalanî semedê şêrê Îmrali û bi muwekîlê xo dir pêvînayîş bikerê, muracatê Serdozgerîya Komare ya Bûrsa kerdî.

	 

	Avûkatanê Rayberê PKKyî Abdullah Ocalanî ke 22 serrî Zîndanê Tîpê F yê Asayîşê Berzî yê Îmrali de tepişte yo, muracatê Serdozgerîya Komare ya Bûrsa kerdî. Avûkatanê Ocalanî ra Rezan Sarica, Razîye Ozturk, Faîk Ozgur Erol û Cengîz Yureklî bi amancê şêrê bi muvekîlê xo dir pêvînayîş bikerê, reyke bîn muracatê dozgerî kerdî.

	 

	Birayê Ocalanî, Mehmet Ocalan û wasiyê ci Mazlûm Dînç, keyeyê tepişteyê bînan yê Îmraliyî de yenê tepiştene birayê Omer Hayrî Konar, Alî Konar, birayê Hamîlî Yildirim, Polat Yildirim û waya Veysî Aktaş, Melîha Çetîn bi rayîrê avûkatanê xo muracat kerdî.  

	 

	Serdozgerîya Komare ya Bûrsayî, bi bahaneyê Ocalanî serra 2009 de pawitişê bi nameyê "Xerîtaya Rayîrî" Dadgehê Heqê Merdiman ê  Ewropa (DMME) rê şawitib, 23ê Êlule 2020 de 6 mengî cezaya qedexeyî avûkatanê Abdullah Ocalanî rê birnabi. Pêwa cezaya qedexeyê avûkatan 23ê Adare de peynî bî zî reyna avûkatî nêeşkenê şêrê Îmraliyî û ne negatîf û ne pozîtîf cewab înan rê nîno dayene.

	 

	Avûkatanê Abdullah Ocalanî, Rêzan Sarica û Newroz Uysal, dimayê 8 serrî mabêne 2-22ê Gulane, 12-18ê Hezirane û 7ê Gulana 2019 de şîbî Îmrali.

	 

	Abdullah Ocalan 22 serrî yo Zîndanê Tîpê F yê Îmraliyî de tena 2 rey bi telefon keyeyî dir qisey kerd. Abdullah Ocalan ke 22 serrî yo tecrîd de yo, reya ewil 27ê Nîsana 2020 de tena 20 deqîqeyan bi telefon dir qisey kerd. Tewr peyîn serê îdeayê medyaya komelî de vila bî, dimayê reaksîyonê komelî 25ê Adara 2021 de Edliyeyê Rihayî de tena 4.5 deqîqeyan bi rayîrê telefonî birayê xo Mehmet Ocalanî dir qisey kerd. Na reyê peyîn zî telefon birnayî û reyke bîn destûr nêdayî ke Ocalan bi telefon dir qisey bikero. Pêro muracatê keye û avûkatan bêcewab yenê verdayene.