Mewsîmê hamnanî de werdê zebeşe ra baldar bê 

2021-06-28 09:11:35


	 

	 

	MERKEZÊ XEBERAN - Mewsîmê hamnanî de zebeşe ke zêde yena werdene, hetê doktoran ra werdiş û feydeyê ci ser de îqazkerdiş yeno kerdene. Pispora Dîyetîsyene Ecem Ocak hemverê vatişê, 'zebeş kîlo dano' îqaz kerd.

	 

	Zebeşa ke bi Amedî yena naskerdene û sey sembola şaristanê; Edene, Enqere, Çankiri û qezayê ci zî berardişê ci yeno kerdene, bi ameyîşê hamnanî dir zebeşe serê sifreyan ca gêna. Zebeşa ke xeylêk nêweşîyan rê şîfa ya, dişminê xeylêk nêweşîyana zî. La bi taybet kesê nêweşê şekirî ganî kêm biwerê û na babete de pisporî her wext îqaz kenê.

	 

	Zebeşa ke rewşa zêde bêra werdene, bena zirar û eke merdim normal biwero; dejê sereyî qedênena, gurçikan pak kena, gonî baş kena, esteyan pawena. Pispora dîyetîsyenî Ecem Ocak feydeyê zebeşe rêz kerd û vera vatişê ‘zebeş kîlo dano' îqaz kerd.

	 

	'Ganî bi kontrol bêra werdene'

	 

	Eceme dîyar kerd ke eke zebeşe bi kontrol bêra werdene merdim kîlo dano û vat: "Eke zêde bêro werdene, beno sebebê zêdebîyayîşê kîlo. Her kes zebeşe ra hes keno. Bi taybetî hamnanî xeylêk kesî zebeşe tercîh kenê, la ganî porsîyonê ci ra baldar bê. Eke baldar nêbê do kîloyê zêde bigîrê. Zebeşe de awe zêde ya. Coka dejê mîgren û sereyî kêm kena. Hamnanî tansîyone zaf bi tehluke ya. Zebeşe tansîyone ra baş yena û gonî bi rehet gêrnena. Potasyûm û magnezyumê zebeşe de yê basincê gonî fînenê û tansîyone normal kenê."

	 

	'Toksînê bedenî erzena'

	 

	Eceme wina dewam kerd: "Semedê dayîşê kîloyî ganî kezeba sîya baş ba. Kîlo de weşîya kezebe girîng a. Zebeşe paştdayîş dana fonksîyonê kezeba sîya.  Toksîn û madeyê kezeba sîya pak kena. Gurçikan xebitnena û toksîn û odemê bedenî erzena."

	 

	'Ganî bi dîqat bêra werdene'

	 

	Eceme tewr peyîn vat ke zebeşe se ra  92ê awa û vat: "Vîtamînê A, C û B6 hewênena. Kalorîya ci kêm a û dayîşê kîlo de bena hetkar. La wextê diyetî de ganî kesê ke wenê, werdişê zebeşe de baldar bê. Şekirê zebeşe zêde yo. Semedê nê zî ganî zebeş zêde nêbo û verde penêr bibo."