Dayîkê Aştîye: Îşxalkerdişî rê bi yewbîyayîşê xo bibê yew

2021-06-26 12:49:23


	 

	Sema Çaglak

	 

	ÊLIH -  Endamê Meclîsê Dayîkê Aştîye bale antî serê girîngîyê yewbîyayîşê neteweyî û dîyar kerdî ke eke no şer nêro vindarnayene, do şarê Kurdî se serre peyser şêrê û do xeylêk destkewtişê xo vinî bikerê.

	 

	No demêkê derg o ke hetê dewleta tirkî ra hemverê destkewtiş û bîyayîşê kurdan de şerêkê hîra ameyo destpêkerdene. Bi taybetî 23ê Nîsane ra Herêma Federal a Kurdîstanî de dewleta tirkî hêrişêk pîl hemverê kurdan dayo destpêkerdene û bi paştdayîşê PDKyî operasyonê leşkeri herême de dewam kenê. Hemverê nê hêrişan xeylêk rêxistinê sîvîl û partîyê sîyasî vengdayîşê yewîya kurdan kenê. Însîyatîfê Dayîkê Aştîye yê Êlihî derheqê babete de qisey kerdî û dîyar kerdî ke tewr zêde dayîkî yewîye wazenê û hemverê hêrişê serê kurdan de caardişê yewbîyayîşê neteweyî berpirsyarîyê pêro kurdan o.

	 

	'Bîyayîşê kurdan nêno qebulkerdene'

	 

	Wesîle Baytar dîyar kerd ke şarê Kurdî prosesêk tarîxî ra derbaz benê û vat: "Rayîrê yewbîyayîşî aştî ra derbaz beno. Bîyayîşê kurdan qebûl nêkenê û her wext semedê nê hêrişê ma kenê. Ma heme binê zulm û zorê îşxalkerdoxan de yê. Tena yewbîyayîş eşkeno semedê nê hêrişan bibo cewabêkê xurt. Dayîkî pêro serê lingan de yê û semedê yewbîyayîşî veng danê."

	 

	'Îşxalkerdişî rê bi yewbîyayîşê xo bibê cewab'

	 

	Nuran Seçkîn zî dîyar kerd bi pêrodayîş û şer çîyêk çareser nêbeno û vat: "Ma her çar parçeyê kurdîstan de zî rastê her tewir hêrişan yenê. Çiqas şarê ma yeno kiştene, hende kezeba ma veşena. Ez sey dayîkêka aştîye vana, wa dinya çimê xo nê şer û zulmî rê panêda. Ma nê hêrişanê serê şarê ma şermezar kenê û vanê êdî bes o. Bi tank, top û tifing çîyêk çareser nêbeno, tena bi yewbîyayîş û aştî çareserî beno. Wa pêro kurdî destê xo bidê yewbînan û vera nê îşxalkerdişî bi yewbîyayîşê xo bibê cewab. Êdî bes o ke şarê ma yeno kiştene."

	 

	'Eke şer nêro vindertene ma do se serra bîn zî peyser şêrê'

	 

	Nurane tewr peyîn wina vat: "Ez veng dana Mesûd Barzanî, veng dana Nêçîrvan Barzanî ke wa şaşitî ra agêrê. Ê tûtê ma yê, wayê û birayê ma yê. Wa êdî kurdî yewbînan nêkişê. Eke kurdî yewbîyayîşê xo awan nêkerê do hêrişê hemverê înan dewam bikerê. Nêzdîbîyayîşê Barzanî rewşa şermezarkerdişî yo. Ganî bizano ke eke ma şamî bê do ê zî badêşamî bê. Eke no şer nêro vindarnayene, ma do seserre peyser şêrê."

	 

	'Wa êdî kurdî nêrê kiştene'

	 

	Muhabet Tekşûn zî vat xora zerrîya dayîkan pirrî dej û birînê û vat: “Ez aştîye wazena. Wa êdî kurdî nêrê kiştene. Yê ke xo ra vanê ma kurd ê, ganî nêkewê torra kayê dişminî. Tena yewbîyayîşê neteweyî eşkeno ma xelas bikero."

	 

	'Tewr zêde dayîkî wazenê aştî virazya'

	 

	Tewr peyîn zî Medîne Yavuz qisey kerd û vat: "Gama ma nêbê yew, ma nêeşkenê tu hêrişî serê xo de wedarnê. Bi 40 serrî ra zêdeyêr o serê bîyayîşê ma de hêrişêk esto. Tewr zêde dayîkî wazenê aştî virazya. Semedê yê ke tewr zêde dejenê dayîk ê. Ma nêwazenê bindest bê. Ma wazenê aştî virazya. Eke mîyanê kurdan de o xîyanet biqedo, do yewîye zî virazya. Aştî û hêvî zerrîya ma de xeylêk pîl bîya."