Dayîkê tepişteyan: Goş bidê waştişê tepişteyan  

2021-06-22 09:19:01


	 

	Sema Çaglak - Şehrîban Aslan    

	 

	AMED - Dayîkê tepişteyan bale antî serê grevê vêşanîye ke 208 rojî yo dewam keno û dîyar kerdî heqê tepişteyan yenê binpaykerdene û vatî: "Ganî keye wayîrê tûtanê xo vejîyo û şar zî goş bido waştişê tepişteyan."  

	 

	Çalakîya grevê vêşanîye yê vera tecrîdê ke 22 serrî yo hemverê Rayberê PKKyî Abdullah Ocalan û binpaykerdişê heqê tepişteyan ke 27ê teşrîna peyêne 2020 de zîndanê Tirkîya û herême de amebi destpêkerdene 208 rojî yo dewam keno. 

	 

	Multecîyê ke Kampa Lavrîo ya Yunanîstanî de manenê zî 170 rojî yo çalakîya xo dewam kenê. Sewbîna Wargehê Multecîyan ê Şehîd Rustem Cûdî (Mexmûr) zî bi rayberîya Meclîsê Îştarî de çalakî ame destpêkerdene û çalakî 187 rojî yo dewam keno. Keyeyê tepişteyan ajansê ma rê qalê rewşa tepişteyan kerd û vengdayîşê wayîrvejîyayîşê çalakîyan kerd. 

	 

	 'Heqê tepişteyan yeno binpaykerdene' 

	 

	Nînan ra yew zî Muhammed Kartalo ke bi 3 serrî yo tepişte yo. Muhammed di demêk nêzdî de zîndanê Tîpa Dyê Amedî ra surgunê Zîndanê Tîpê F hûmara 1yin amebi kerdene. Dayîka Muhammed, Afîfe Kartal dîyar kerd ke eke wayîrvejîyayîşêk çinbo, do netîceyê nêbaş vejîyê werte. Afîfe, wina vat: "200 rojî ra zêdeyêr o, tepişteyî grevê vêşanîye de yê. Heta ewro wayîrvejîyayîşêk pîl nêameyo kerdene. Gama ez şina pêvînayîş mi ra vano, 'Şima çira bêveng ê, çira şima keyeyê xo de nişnenê ro.' Xora rewşa înan xirab a la gama ke ez înan pêvînayîş de vînena, zaf kewena ver. Merdim uca de bêedalaetî, bêhuqûqî û binpaykerdişê heqan vîneno." 

	 

	'Ma înan tena nêverdê'

	 

	Afîfe tewr peyîn wina vat: "Kamera kenê zereyê koxuşan û sewbîna awa germ nêdenê tepişteyan. Xora werdê înan baş nêyo. Wazenê tûtanê ma bikişê.  ERzenê serê koxuşan û înan îşkence kenê. Gama ke tepişteyî vera nê vejênê zî cezaya disîplînî danê înan. Wa pêro keyeyî vera nê zulmî wirzê serê lingan û heqê tûtanê xo bipawê. Ters feyde nîyo. Xora ma her wext yenê tepiştene, her wext yenê kiştene. Ez veng dana pêro keyeyanê bi rûmet kena ke wa tûtanê xo tena nêverdê û wayîrê çalakîya înan de vejîyê."

	 

	 'Derd û kulê ke ma ancenê kezeba ma veşneno' 

	 

	Yew ê keyeyan ra zî Hatun Yayik ke lajê ci Mustafa Yayik nêzdîyê 2 serrî yo tepişte yo. Mustafa aşma adare de Zîndanê Tîpê D yê Amedî ra sewqê 1 û 2yîn Zîndanê Asayîşê  Berzî yê Amedî kerdibî. Dayîke Mustafayî, Hatûn Yayik wina vat: "Werdê ke danê înan werd nêyê. Erzenê serê koxuşan û îşkence bi înan kenê. Zulm û heqerat bi înan kenê. Ma sey dayîkê kurdî derd û kulê ke ma ancenê, kezeba ma veşneno. Ma bi serran o bedel danê. Ma semedê na dewa ma şehîdan danê. Ma ne cenazeyê înan dî, ne zî esteyê înan." 

	 

	'Wa no zulm biqedîyo'  

	 

	Hatûne tewr peyîn vat: "Ma wazenê no zulm û zorê serê ma ra wedaryo. Yê ke hende zulm û  faşîzm serê ma de kenê, însanetîyê xo ça xo vîr ra kerdê. Çi heqê înan esto hende zulm serê ma de kenê. Pêro ciwanê ma kerdî pey beran, îşkence kerdî. Yê ke verê xo dayî Kobanî îşxalkerdî, reyna ê zulmker ê. Tepişteyê ma semedê ma xo ver danê. Na bêvengî çî ya? Ganî her kes wayîr vejîyo."