Dayîkê Aştîye vatişê Mesut Barzanî vîr ardî

2021-06-19 09:06:47


	 

	STENBOL- Dayîkê Aştîye reaksîyon vera operasyonê bi hemkarîya PDKyî ke hetê dewleta tirkî ra başûrê Kurdistanî de yeno kerdene de dayî û vatişê Rayberê PDKyî Mesut Barzanî yê sey, ‘Bi destê Kurdan do gonîya Kurdan nêrijo' vîr ardî û vatî, ganî Mesut Berzanî sozê xo bi ca bîyaro.

	 

	Artêşê Tirkî hemverê herêma Zap, Avaşîn û Metîna yê herêma Federal a Kurdistanî de operasyon dayî destpêkerdene û roja 54ine de dewam keno. Semedê operasyonî xeylêk dewî ameyî vengkerdene û ame zanayene ke qirkerdişê daran zî yeno kerdene. Darê ke yenê birnayene zî bi hemkarîya şîrketan anê Tirkîya û roşenê. Heto bîn ra zî operasyonê  Metîna dewam keno û ame zanayene ke şewatê daristanan ê dewa Qumriye, Deşîşê û Teşîşê yê Metîna zî dewam de yo.

	 

	Reaksîyonê hemverê operasyonan û PDKyî dewam keno. Însiyatîfê Dayîkê Aştîye reaksîyon vera helwestê PDKyî dayî û vatî ganî nê qerarê şaşî ra agêrê.

	 

	'Ma tu sebeb qebul nêkenê'

	 

	Emîne Duman dîyar kerd ke ê tu sebebê ke şer danê vernî qebul nêkenê û vat: "Ewro bi hezaran sîyasetmedarî tepişte yê. Dewê ma ameyî veşnayene, rijnayene. Ma wareyê ma ra kerdî. Nika Barzanî çira nê kesan dir keno. Şarê Kurdî bi serran o têkoşîn kenê. Ez veng dana Barzanî, wa leşkerê xo vernîya şarî ra wedarno. Ne leşker, ne pêşmerge ne zî gerîla wa nêmirê. Kezeba dayîkan veşena."

	 

	'Wa Barzanî sozê xo bi ca bîyaro'

	 

	Emîne bale ant serê vatişê Barzanî û vat: "Tepişteyî nika hemverê tecrîdî grev de yê. Dayîkî semedê nê xeylêk bi endîşe û xemgîn ê. Gelo Kurdan ra çi wazenê. Ma aştî wazenê. Ganî Barzanî zî semedê nê têkoşîn bikero. Verê ke PKK vejîyo her wext şer de bî. PKKyî kevoka aîtî kerd mabêne înan. Barzanî ganî hesab Tirkîya ra biperso ke çira Kurdan gênê. Herêma operasyonî de daran birnenê. Dayîkêke vatêne, ‘ha darê ma birnayî ha rûmetê ma binpay kerdî. Eynî çiyo.' Belê rast vato. Herra Kurdistanî bêwayîr nîya. Barzanî vatêne, 'Do bi destê Kurdan gonîya Kurdan nêrijo.' O wext wa vatişê xo bi ca bîyaro. Ma tûtê xo bi hîkayeyê pêşmergeyan pîl kerd. Wa destûr nêdê kurdî gonîya yewbînan birijê. Gerîla herra xo paweno. Dewlete şina koyanê ma bomba kena."

	 

	'Ganî Barzanî nê kayan bivîno'

	 

	Medîne Bektaş zî wina vat: "Barzanî çira wina keno. Ma şer nêwazenê. Barzanî kayêk kay keno la nêzano senî kay bikero. Tirkîya dir beno hemkar. Ma hetkarîya Barzanî ya semedê Erdoganî qebûl nêkenê. Do siba zirar bido Barzanî zî. Heme dewletî hemverê Kurdan bîyê yew. Ganî Barzanî nê kayan baş bivîno. Tûtê ma nika zîndanan de yê. Ma şer nêwazenê."

	 

	'Barzanî rayîrê pîyê xo de nîyo'

	 

	Fatma Îçîn zî wina dîyar kerd: "Ma şer nêwazenê. Ez veng dana îdarekarîya herêma Iraqî. Eke wijdanê Barzanî bibayîne wina nêkerdêne. Barzanî rayîrê pîyê xo de nêşino. Hemverê wayê û biranê xo de dişminî keno. Hetkarî nêdano gerîla, o wext wa kesê bînan dir zî hemkarî nêkero. Eke aştîye nêwazenê zî wa qet nêbo zirar nêdê kesê bînan. Ganî her kes hemverê nê vengê xo berz bikero."

	 

	'Ganî şarê Başûr bêveng nêmano'

	 

	Ferîde Ertugrul zî veng da pêro kesî ke bêveng nêmanê û vat: "Wa Barzanî semedê Tirkan ney, semedê gerîla bibo hetkar. Çend serrî yo Barzanî semedê berjewendîyê xo hetkarî dano Tirkîya. Kurdan heta ewro dest nêda serê herra tu kesî. No zulm o. Barzanî nê nêdî. Ganî şarê Başur hemverê nê vejîyo. Ganî destûr nêdo ke Tirkîya bikewa na herre."