Mayê Aştîye: Têkoşîn bi şerê birakiştoxî ser nêkeweno 

2021-06-16 09:12:39


	 

	 

	Medya Uren

	 

	MÊRDÎN - Mayê Aştîye yê Mêrdînî bale antî serê hêriş û geşedanê Başûrê Kurdistanî û wina vat: "Têkoşîn bi şerê birakiştoxî bi ser nêkeweno. Berjewendîyê şexsî û eşîrî ci zirarê pîl bidê destkewtişê ma yê bi serran. Ma hêrişê nê rayîrî de şermezar kenê."

	 

	Mayê Aştîye yê Mêrdînî hemverê hêrişê serê Başûrê Kurdistanî de veng dayî mayanê Başûrê Kurdistanî ke hemverê tehlukeyê şerê mîyanî bibê vengêk û vatî: "Ganî  heme kurdê ma yê Başûr zî aya bibê. Bi taybetî mayê Başûrî wurzê û nêrazîbîyayîşê xo ramojnê. Yê ke bieşkê vernîya rijnayîşê gonî bigîrê ma do bê. Ma do xe vera nê şerî bikerê qalxanê gane."

	 

	'Nê hêrişî bi waştişê Tirkîya yenê kerdene'

	 

	Endama Meclîsê Mayanê Aşitîye ra Letîfa Akyuz destpêk de wina vat: "Nê hêrişî bi waştişê Tirkîya yenê kerdene. Nê çî heme kesî zanê. Cayê ke dewlete nêeşkena biko ci, PDKyî şawena û kena qurban. Bi se serre yo ma tarzê înan zanê. La PDKyî nê qetî fam nêkerd û fam nêkeno zî. Bi kayê dewleta tirkî xapîyeno. Tirkîya heqê kurdan binpay kena û qebul nêkena. Bîyayîşê kurdan zî înkar kena. PDK hemkarî nê kesan dir kena. Hemkarî bi gonîwerê wayê û birayanê xo reyde keno."

	 

	'Ma do hemverê şerî xo bikerê qalxan'

	 

	Letîfa bale ant serê girîngîyê îqazkerdişê şarê kurdî û wina vat: "Ganî heme kurdê ma yê Başûrijî zî aya bibê. Bi taybetî mayê Başûrî wurzê û nêrazîbîyayîşê xo ramojnê. Yê ke bieşkê vernîya rijnayîşê gonî bigîrê do ma bê. Ma do zî xo vera nê şerî bikerê qalxanê gane. Ma çi têkoşîn danê, ma hemverê kamî danê ganî ma bizanê.  Ger ma nê baş nêzanê zî do seqetî virazya. Çîyo ke nika PDK keno zî ma keno mîyanê gumanan. Ma sey mayî nê hêrişî şermezar kenê."

	 

	'Kurdî bi destê kurdan yenê qetilkerdene'

	 

	Maya Aştîye Semra Albay dîyar kerd ke kurdan semedê sebebê îxanetê mîyanê xo xeylêk rey vinî kerdê û vat: "Bi seserran o ma têkoşînêk pîl semedê nasnameyê xo danê. Xeylêk rey semedê îxanetê mîyanê xo ma vinî kerd. Her wext tena semedê nê sebeban ma bin kewtî û ma peyser şî. Nika kitab û îmkanî estê ke ciwanî tarîxê xo bizanê. Ganî ma ci ra temaşe bikerê, ma do bivînê ke tu wext no şerê îxanetî serkewte nêbîyo. Ewro bi polîtîkayê dewleta tirkî, kurd bi destê kurdan yenê qetilkerdene."

	 

	'Dem o dem o ke bibê yew'

	 

	Semra tewr peyîn wina vat: "Nika dem o dem o ke ma serkewtişî ko bikerê. Dem o dem o ke ma bibê yew. Lazimîyê ma bi nê esto. Destêk nêeşkeno çîyêk bikero, ganî bibê xeylêk destî. Eke ma kom bibê, çîyê ke ma biwazê ma do dest bikerê. Sey ke Cegerxwîn vano, 'Eke ma nêbê yew ma do şêrê yew bi yew.' Ganî bi taybetî mayê Başûr wurzê û hemverê hêrişê PDKyî helwestê xo ramojnê."