Dêrsim de polîtîkayê şerê taybetî: Wareyê ma yê pîrozî veşnenê  

2021-05-20 12:47:18


	 

	Gulîstan Azak

	 

	DÊRSIM - Hemsereka qezaya merkezî ya Dêrsimî ya HDPyî Ozlem Toprak dîyar kerd ke şewatê daristanan polîtîkayêk şerê taybetî yo û vat: "Wareyê ma yê pîrozî yenê veşnayene. Ganeyê daristanan yenê qetilkerdene. Şarê Dêrsimî do vera tedayan sere nêtewêno."

	 

	Herêmê Amutka, Derekoy û Koçerî yê qezaya Xozatî ya Dêrsimî de 9ê Gulane de operasyonê leşkerî ameyî destpêkerdene û dimayê  operasyonî şewatê daristanan dest pêkerd û  şewat hema zî dewam keno. Semedê tefênayîşê şewatî selahîyetdaran tu mudaxale nêkerd û reaksîyonê hemverê şewatî roj bi roje zêde beno.

	 

	Hemsereka qezaya merkezî ya HDPyî Ozlem Toprak derheqê şewatê daristanan de ercnayîş kerd.

	 

	'Parçeyêk polîtîkayê şerî yo'

	 

	Ozleme dîyar kerd ke şewat dimayê operasyonî dest pêkerdo û selahîyetdaran  mudaxaleyê şewatî nêkerdo, nê dir zî semedo ke mudaxeleyê şewatî nêkerdî vernîya înan zî ameya padayene. Ozleme wina vat: "Vindertişê selahîyetdaran ê hemverê şewatî polîtîkayê şerê taybetî yo û xoser nîyo. Hemverê Kurdan, herêma Kurdan û xozaya ci rê dişminî kenê. Serranê 90î de dewî ameyî veşnayene, vengkerdene û bê merdim verdayene. Nika zî bi şewatê ke daristanan de vejenê, wazenê wina bikerê. Şewatê daristanan parçeyêk polîtîkayê şerê taybetî yo."

	 

	'Cayê pîroz veşnenê' 

	 

	Ozleme dîyar kerd ke xoza semedê Dêrsimî pîroz a û semedê nê zî no şewat hêrişêk hemverê bawerîye yo û vat: "Wareyê ma yê pîrozî yenê veşnayene. Daristanan de ganeyî yenê qetilkerdene. Rojnamegerê ke şinê herême hewl danê ke dîmenê qirkerdişî biancê. Pezkovî, luye, nebatî yenê qetilkerdene. Hêrsê înan verê ma xeylêk pîl o. Binê nameyê seydwanî de qirkerdişan kenê. Ma nê bi tu hawayî qebûl nêkenê."

	 

	'Şarê Dêrsimî sere nêtewêna û nêtewêneno zî' 

	 

	Ozleme tewr peyîn wina vat: "Dewê ma, keyeyê ma veşnayî, rijnayî. La zorê ma nêberdî. Bi veşnayîşê daristananê ma nêeşkenê ma bêhêz bikerê. Çend ciwanê ma bîlasebeb ameyî qetilkerdene. Dewlete vana qey do bi veşnayîşê daristanan ma herra ma ra bikera. Sîstem bi serran o bi nê caardişan xoza qetil kena, bawerîyan çin kena. La se kenê wa bikerê do nêeşkê ma bêhêz bikerê. Şarê Dêrsimî tu wext sere nêtewêna û do nêtewêno zî."