'Berpirsîyarê nê şerî dewlete ya' 

2021-05-18 09:13:11


	 

	 

	ÎZMÎR - Maya Aştîye ra Medîne Kaymaz ke bi serran o hemverê teda û hêrişê dewlete fek aştî ra vera nêda wina vat: "Heta ma sax bê, ma do aştî biwazê. Ma dayîk ê, zulm nêwazenê. Ma hemverê şerî yê." 

	 

	Serra 90î de hêrişê hemverê kurdan xeylêk zêde bî, dewê girêdayê şaristanê herême de, qorîcîtî ame ferzkerdene û bi hezaran keyeyî  semedê tedayan mecbûr mendî ke dewanê xo veng bikerê. Nê şaristanan ra yew zî Mêrdîn bi.

	 

	Keyeyê Medîne Kaymaz zî yew nê keyeyan ra bi û Mêrdîn ra koçê Îzmîrî kerdî. Lajê Medîne, 26 serrî yo tepişte yo û kênaya aye zî 21 serrî verê tewrê PKKyî bî.  Medîne ke pêwa heme teda û hêrişan fek têkoşîn ra vera nêda û aştî waşt, bi komployê Mîyanneteweyî ke Rayberê PKKyî Abdullah Ocalan ardî Tirkîya, kîşte Dayîkê Aştîye de têkoşînê xo dewam kerd. 

	 

	‘Berpirsîyarê nê şerî dewlete ya'

	 

	Medîne dîyar kerd ke ê wazenê şer bi peynî bibo, kes nêmêro û vat: "Leşkerî zî tutê ma yê. Ma dayîk ê. Ma nêwazenê kes zirar bivîno. Semedo ke zulm peynî bibo, ma têkoşîn kenê la dewlete Dayikê Aştiye nêeşnawena. Tutanê ma kenê zindanan, yan zî tutê ma şinê ko. Dewlete keyeyê hemine xira kerd. Ma wazenê ke her kes bi ziwanê xo biciwîyo. Ereb, tirk, kurdî hem eyew ê. Berpirsîyarê nê şerî dewlete ya."

	 

	'Ma dayîkî zulm nêwazenê'

	 

	Medîne dewam de wina vat: "Heqê dewlete çin o ke leşkeran bierşawo serê tutanê ma û înan bikişo. Leşkerî zî gunayê. Dayîk û pîyê înan zî estê. Kezeba dewlete bi leşkeran nêveşêna. Xora tutanê ma ra zî vanê dişmin. Tutê ma semedê şar û ziwanê xo şî ko. Semedê şerî nêşî ko. Eke leşkerî operasyon nêkerê do şer zî çinî bo. No çîyo ke yeno kerdene zulm o, bê wijdanî yo. Heta ma sax bê, ma do vajê aştî. Ma dayîkî zulm nêwazenê, şer nêwazenê."

	 

	'Ma semedê her kesî aştî wazenê' 

	 

	Medîne wina vat: "Dewan de goristanê ma veşnenê. Semedê zulmî ma ameyî Îzmîr. La m atîya zî tedayan dir ameyî rî bi rî. Vatî şima 'terorîst ê', şima 'terorîstan' pawenê. Terorîst kam ê? Yê ke şer kenê, yê ke operasyonan kenê terorîst ê. Wa her kes bizano. Ma heta sax bê, ma do têkoşîn bikerê. Tena semedê kurdan ney ma semedê pêro şaran têkoşîn kenê. Ma semedê her kesî aştî wazenê."

	 

	'Hemverê Dayîkanê Aştîye rêzdar nîyê'

	 

	Medîne tewr peyîn wina vat: "Dewlete bi destbendkerdişan û tedayan hewl dana ke Dayîkanê Aştîye têkoşîn ra dûr bifîna. Nê tedayan ra yew zî no yo; her wext veng danê dayîkan û qereqol de persê tutê înan ça de yê kenê. Ez 4 rey ameya destbendkerdene. 3-4 rojan destbendkerde menda. Kelepçe ra qevdê destê mi dejayî. Hemverê Dayîkanê Aştîye rêzdar nîyê. Her roje kaxidêk yeno verê berê mi. Veng danê qerekole. Tutê mi bi îradeyê xo şî. Mi înan nêerşawit. Ez nê înan ra zî vana. Lajê mi zîndan de yo. Tena maneno. Yew berdibî odaya ci la reyna uca ra berdî. Yanî ma sey merdiman nêvînenê."