Semedê Konferansê Demokrasîyî 'Koma Xebate ya Cinîyan' do bêro awankerdene 

2021-05-16 13:05:10


	 

	STENBOL - DÎB, amadekarîyê xo yê Konferansê Demokrasîyî dewam keno. Semedê konferansî Koma Xebate ya Cinîyan do bêro awankerdene. Do Koma Xebate de ercnayîş û pêşnîyazê cinîyan konferans de bêrê ziwan.

	 

	Semedê Demokrasîyê Yewîye (DÎB), do menga hezîrane de bi sloganê, "Nan, azadî û edalet" Konferansê Demokrasî organîze bikero. Dawetkarê Konferansê Demokrasîyî sîyasetmedar, nuştox, akademîsyen û temsîlkarê sazgehê komelê sivîlî  yê, amancê xo yê hempar bi kombîyayîşêk dîyar kerdibî. Konferans de yeno amanckerdene ke hêzê demokrasî hêzê xo bikerê yew û bieşkê pêro hetê komelî bîyarê têhet. DÎB, amanc keno ke bi yewîye rayîrêko newe yê sîyasetî şarpawitoxî abikero û bibo platformêk meşrû yê waştiş û vengê heme bindestan.

	 

	Amadekarîyê konferansê ke menga hezîrane de do bibo, dewam kenê. DÎB ra Cemîle Baklaci ajansê ma rê qalê amadekarîyê cinîyan yê konferansî kerd.

	 

	Cemîle, bale ant serê Konferansê Demokrasî û dîyar kerd ke do cinî, karker, ciwan û pêro beşê komelî konferans de cayê xobigîrê. Cemîle, dîyar kerd ke do hewl bidê ke bi nêzdîbîyayîşêk kollektîf waştişan bîyarê ziwan û vat: "Semedê konferansî komê xebatan ameyî amadekerdene. Semedê problem û çareserî problemê cinîyan konferansî de bêro ziwan Koma Xebate ya Cinîyan do bêro awankerdene. Na kome de temsîlkarê sazgehê cinîyan, şexsî û femînist bibê."

	 

	Cemîle, dîyar kerd ke semedê konferansî komê dawetkarî ameyî amadekerdene û vat: "Ma cinî do 20ê gulane de mîyanê koma dawetî de cayê xo bigîrê. Sewbîna 17ê gulane de zî bi cinîyan dir kom bibê û bale antî serê babetê ke konferansî de bêrê munaqeşekerdene."

	 

	Cemîle, dîyar kerd ke prosesê pandemî de xeylêk cinî mîyanê keyeyî de şîdetî dir rî bi rî mendî yan zî ameyî kiştene. Cemîle wina qedêna: "Pêwa şîdet û kiştişan, cinî bi feqîrî û bêkarî dir rî bi rî manenê. Nê problemê cinîyan her roje ke derbas beno tewr kûr beno. Prosesê pandemî de tewr zêde cinî mîyanê şert û mercê bêasayîşî de ameyî xebitnayîşî. Ma do Konferansê Demokrasî de problemê sereyîn yê cinîyan bîyarê ziwan. Ma vanê hemverê her tewir hêrişê hemverê cinîyan, ma do îradeyê xo bipawê û metodê têkoşînê xo yê hempar awan bikerê."