
'Wa êdî hesire çimê dayîkan nêvarê'  

2021-05-09 14:32:32


	&nbsp;

	&nbsp;

	Sema Çaglak&nbsp;

	&nbsp;

	
		AMED - Dayîkên ke tutê înan tepişteyê bi zerrîyêka xemgîn Roja Dayîkan pêşwazî kenê. Dayîkê tepişteyan dîyar kerd ke wa êdî dayîkî hesiran nêvarnê û vatî: "Tutê ma zîndanan ra pîr û kal bî. Zerrîya ma zî pirr kul û dej bi. Wa êdî dayîkî biresê tutanê xo."
	
		&nbsp;


	Tepişteyê herême û Tirkîya hemverê tecrîdê serê Rayberê PKKyî Abdullah Ocalanî û binpaykerdişê heqê tepişteyan dest bi çalakîya grevê vêşanîye kerdibi. Çalakî 164 rojî yo dewam kena. Sewbîna ewro zî Roja Dayîkan a, labelê dayîkê ke tutê înan tepişteyê na roje de tewr zêde xemgîn ê. Tutê Sultan Ceylan û Xezal Yildirim tepişte yê û her di dayîkî wazenê ke wa êdî dayîkî hesiran nêvarnê.

	&nbsp;

	Di kênaya aye tepişte yê&nbsp;

	&nbsp;

	Sultan Ceylan 70 serrî ya û di kênayê aye tepişte yê. Fahriye Ceylan (44), serra 1992ine de amey atepiştene û xeylêk rey ameya surgunkerdene. Fahrîye 10 serrî yo zî Zîndanê Alanyayî de ya. Alîye Soyer (40) zî bi 3 serrî yo Zîndanê cinîyan ê Amedî de ya. Fahrîye û Alîye her tim zerrî û vîrê Sultane de ya. Sultan wina vat: "Çi heqê înan esto ke hende zerrîya ma dayîkan dejnenê. Bi 3 serrî yo ez nêşîya Alanya. Zerrîya mi dejena ke ez tutanê xo bi hawayêke azad nêvîna û na dinya ra şora."

	&nbsp;

	'Wa dayîkî biresê tutanê xo'

	&nbsp;

	Her di kênayê Sultane beşdarê grevê vêşanîye bibî. Sultane waştişê xo wina vat: "Gama ke ma werd amade kena, tutê mi yenê vîrê mi. Kezeba mi veşena. Ez bi serran o Fahrîye ra dûrî ya. Emrê Fahrîye zîndanan de derbas bi. Ez wazena êdî her di kênayê mi serbest bêrê veradayene û ez wextê xo bi înan dir derbas bikerî. Tutê ma zîndanan de pîr û kal bî. Zerrîya ma zî bi dej a. Ez wazena wa efûyêke pêroyî bo û heme tepişteyî bêresê dayîkanê xo."

	&nbsp;

	'Wa tutî bê dayîkanê xo pîl nêbê'

	&nbsp;

	Sultane di kêneyê Alîye zî estê û her roje persê Alîye kenê. Sultane wina vat: "Tutê Alîye her roje pers kenê û vanê, dayîka ma ça de ya. Ê tutî so senîn Roja Dayîka xo pîroz bikerê. Xora bi çend mengî yo dayîka xo nêdîyê. Çira nê zulmî ma rê kenê. Wa tutî bê dayîka xo pîl nêbi."

	&nbsp;

	'Dayîkî tutanê xo ra dûr ê'

	&nbsp;

	Xezal Yildirim 11 serrî yo lajê xo al Mehmet Yildirimî ra dûrî ya. Xezale dîyar kerd ke xeylêk dayîkî bi serran o tutê xo ra dûrî yê û vat: "Nika remezan o la kerbê lajê xo ra ez nêzena bi roje ya yan nê. Wa êdî no zulm serê ma dayîkan ra wirzo. Gama Roja Dayîkan yena dejê m atewr pîl beno. Verê tutê mi verê mi de bî û bi dîyariyan roja mi pîroz kerdêne. Lajê mi reyna zîndan de bi destê xo dîyarîyan amade keno û erşaweno."

	&nbsp;

	'Wa hesiran nêvarnê'

	&nbsp;

	Xezale tewr peyîn wina vat: "Ma wazenê êdî no dej xelas bo. Wa aştî bikerê. Tutê ma bêrê veradayene û ma înan dir biciwîyê. Hêvî kena şer biqedîyo û rayîrêk aştî abibo. Wa &nbsp;êdî hesirê çimê dayîkan nêvarê. Ma nê rojan bi dej nêvînê û do rojê weş bivînê."

	&nbsp;