
Bê Cemîle Roja Dayîkan...   

2021-05-09 13:57:17


	&nbsp;

	&nbsp;

	Rojda Aydin

	&nbsp;

	ŞIRNEX - Bi hezaran dayîkê Kurdistanî bê tutanê xo Roja Dayîkan pêşwazî kenê, înan ra yew dayîka Cemîle, Emîne Cagirga ya. Emîne vat: "Kênaya mi Fatma û Cemîle verike mi de dinyaya xo bedilnayî. Semedê mi bê tutan tu manaya Roja Dayîkan çin o. Wa êdî tutê ma nêrê qetilkerdene."

	&nbsp;

	Xeylêk dayîkê Kurdistanî Roja Dayîkan de verê xo danê goristanan û şinê serdayîşê tutanê xo yê ke ameyê qetilkerdene. Emsar bi hezaran dayîkê kurdî bi hesretê tutanê xo bi zerrîşikite Roja Dayîkan pêşwazî kenê. Nînna ra yew zî dayîka Cemîle Çagirga, Emîne Çagirga ya. Cemîle verê berê keyeyê xo de ameye qetilkerdene û 11 rojan cenazeya ci dolaba qeşayî de mende. No çi zerrîya dayîka ci de bi birînêko bê derman.

	&nbsp;

	Serebûtê serra 1992ine yê Cizîrî de Emîne kênaya xo ya 7 serrî vinî kerdebî. Sewbîna eynî serebûtî de zî vistewrî û vistewreyê xo bi pêroyî &nbsp;7 kesî keye ra ameyî qetilkerdene. Dimayê 23 serrî ra dima 7ê êlule 2015ine de kênaya aye Cemîle ya 10 serrî ameye qetilkerdene. Emîne, dîyar kerd ke tedayê dewlete tu wext serê înan de kêm nêbîyê.

	&nbsp;

	'Kênaya mi verika mi de dinyaya xo bedilnaye'

	&nbsp;

	Cemîle verika Emîne de dinyaya xo bedilnaye û Emîne hem hêsir varayîne û hem zî qala kênaya xo kerd: "Qedexeyê tebervejîyayîşê kuçeyan ê yewin 9 rojî dewam kerd. Ma 9 rojî keyeyê xo ra nêvejîyayî. La Cemîle vejîyabî û verê berê keyeyî de roniştibî. Ez zere de bîya. Reyke de vengê teqayîşî ame. Mi veng da la veng Cemîle ra nêvejîya. Ez şîya verê berî û mi kênaya xo kerd xo verike. Vatişê aye peyîn, 'Dayê' bi. Kênaya mi verika mi de dinyaya xo bedilnaye. Her di tutê mi zî verika mi de nê keyeyî de dinyaya xo bedilnayî."

	&nbsp;

	Bê Cemîle tu manaya Roja Dayîkan çin o...&nbsp;

	&nbsp;

	Emîne, dîyar kerd ke 5 serrî serê qetilkerdişê Cemîla ra derbaz bi û Emîne vat: "5 serrî yo semedê mi roja dayîkan sey rojêko sîya yo. Ez bi zerrîşikte na roje pêşwazî kena. Cemîle Roja Dayîkan de tena roja mi ney, roja pêro dayîkê derûdorî pîroz kerdêne. Roja Dayîkan de şekir, vilî û şîrînayî vila kerdêne. Roja dayîkan semedê ma sey roşanêk derbas bîne. La dimayê ke kênaya mi ameye qetilkerdene, ez êdî roja dayîkan pîroz nêkena. Bê Cemîle roja dayîkan semedê mi nîna tu mana. Ez tu wext &nbsp;Cemîle xio vîr ra nêkena. Tutê mi bi hawayêke bêhuqûqî û bê ehlaqî ameyî qetilkerdene. Sewbîna tena ez ney, zerrîya xeylêk dayîkan sey mi bi dej a. Her roje dayîk û tutê ma yenê qetilkerdene. Çi sucê ma esto? Her roje kezebema veşena. Tutanê ma her wext yenê qetilkerdene. Hem bi îşkenceyî dir rî bi rî manenê û hem zî yenê tepiştene. Ma tu wext rehetî nêdî. Ma êdî nêwazenê ke zerrîya dayîkan bêveşa."

	&nbsp;

	'Wa tutê ma nêrê qetilkerdene'

	&nbsp;

	Emîne tewr peyîn wina vat: "Ez Roja Dayîkan, dayîkên têkoşer û xoverdayoxan rê pîroz kena. Ma bê tutanê xo Roja Dayîkan pêşwazî kenê. Wa êdî tutê ma nêrê qetilkerdene. Ez veng dana ke pêro dayîkî dest bidê yewbînan û waştişê azadî bikerê. Semedê tutanê xo ganî ma azadî bi dest bikerê. Tena waştişê mi azadî ya."

	&nbsp;