Cinîya ke hemverê zulmî sere nêtewêna: Hedîye Temel 

2021-05-06 09:03:29


	 

	Rojda Aydin

	 

	ŞIRNEX - Dayîka Aştîye Hediye Temela ke hemverê zulmê dewlete sere nêtewêna û bi têkoşînê xo ameyîne naskerdene, 2yê Gulane de semedê nêweşî, şîye rehm. Kênaya Hedîye Zubeyde dîyar kerd ke dayîka aye heta peynîya emrê xo têkoşînê xo dewam kerda û cinîyêka vera zulmî sereyê xo nêtewênabî bî.

	 

	Dayîka Aştîyê Hedîye Temel 80 serrî, dewa Setkarî ya qezaya Elkî ya Şirnexî ra bî, hemverê zulmî heta peynîya emrê xo, xo ver da. Hedîyeya ke bi awanbîyayîşê PKKyî dir rêxistine nas kerd, heta peynîya cuya xo bi hawayêke rêxistinkerde cuya xo dewam kerde. Serrê 90ine de leşkerî erzenê sere dewe û keyeyî rê qorîcîtî ferz kenê. La HEdîye û keyeyê aye qorîcîtî qebul nêkenê û koç kenê dewêke. Tedayê dewlete uca de zî dewam kenê la pêwa nînan û Hedîye têkoşînê xo girs kena, mîyanê Meclisê Dayîkê Aştîye de zî ca gêna.

	 

	Dayîka Hedîyeya têkoşer ke vernîya 6 mengan  nêweşîya dejê weremî û Koah ci de peyda beno, nêzdîyê mengêke nêweşxaneyêke Edeneyî de amebî dermankerdene û dima ra agêrabî Şirnex. Hedîye, Nêweşxaneyê Dewlete ya Şirnexî de 2yê Gulane de şîye rehm û dewa xo ya Setkarî de ameye definkerdene. Kênaya Hedîye, Zubeyde Temel û veyva aye Sadîye Temel serê xoverdayîş û têkoşînê dayîka Hedîye de qisey kerdî.

	 

	'Dayîka mi bi zerrî û can xo ver dayîne'

	 

	Kênaya Hedîye, Zubeyde Temel (45), dîyar kerd ke tutîya înan dewa Setkarî de derbas bîya û vat: "Ma o wext hema tut bî. Dayîka mi o wext zî mîyanê xebatan de bî û aştî waştêne. Dayîka mi her tim vera dişminî xo ver dayîne. Serrê 90ine de leşkeran eşt serê dewa ma û vatî ganî şima bibê qorîcî. La keyeyê mi nê çî qebul nêkerd û şî nêzdîyê dewe, dewêke awan kerdî. Dayîka mi uca de zî fek têkoşîn ra vera nêda û tu wext vera zulmî sere nêtewêna. Dewlete nêverda ke ma bi dayîke xo dir bi hizûr biciwîyê. Dayîka mi her wext mîyanê têkoşîn de bî."

	 

	'Di tutê aye mîyanê tevgerî de ca girewtî'

	 

	Zubeyde, dewam de wina vat: "Demê hêrişê serê Kobanî de birayê mi Yusuf Temel verê xo da Kobanî û şi. Nêzdîyê 3 mengan uca de têkoşîn kerd û dimayê ke nêweş kewt ame. Birayê mi dimayê tedawîyêke kilm dinyaya xo bedilna. Birayê mi Abdullah Temel zî hîrê mengî zîndan de mend û îşkenceyêko giran ci rê ame kerdene. Birayê mi dimayê ke zîndan ra vejîya, hemverê nê zulmî bêveng nêmend û tewrê mîyanê tevgerê azadî bi. Birayê mi 13 serrî mîyanê tevgerê azadî de têkoşîn kerd û di serrî verê şehît kewt."

	 

	'Mîyanê xebatê partîye de ca girewte'

	 

	Zubeyde, tewr peyîn wina vat: "Dayîka mi dimayê ke birayê mi Yusuf dinyaya xo bedilna, mîyanê Meclîsê Dayîkê Aştîye de ca girewt. Dayîka mi 6 serrî mîyanê Meclîsê Dayîkê Aştîye de kar û xebatî kerd û verê nê zî mîyanê xebatan de bî. Ça çalakî bibayîne, dayîka mi şîne tewrê ci bîne. Dayîka mi keye bi keye gêrayîne û xebatê partîye kerd. Cuya dayîka mi mîyanê xoverdayîşî de derbaz bî. Waştişê dayîka mi tena azadî û têduştî bi, heta peynîya emrê xo semedê nê têkoşîn kerd."

	 

	'Cinîyêka zaf zanaye û jîyatî bî'

	 

	Veyva aye Sadîye Temel (53) zî wina vat: "Cuya aye her wext mîyanê zor û zehmetî de derbas bî. Hem karê keyeyî kerdêne û hem zî karê partî kerdêne. Ma serra 94ine de wexto ke dewe ra vejîyayî, bi vindertişê xo dewlete rê bî cewab. Qorîcîtî qebul nêkerd. Demê koçkerdiş de zî tedayê dewlete nêqedîyayî. Tutê aye ameyî tepiştiş û teda keyeyî rê ame kerdene. Dayika Hedîye hetê şarî ra zaf ameyîne heskerdene. Cinîyêka zaf zana û jîyatî bî. Problemêk bibayîne ca de çareser kerdêne. Dejê dayîka Hedîye xeylêk zêde bi. Di tutê aye netîceyê têkoşînî de dinyaya xo bedilnayî. Xora verê nê zî mîyanê xebatan de bî. Waştişê Dayîka Hedîye o bi ke aştî û azadî welat de awan bo."