Sebahat Tuncel: Senaryoyêk ameyo awankerdene 

2021-04-30 09:02:37


	 

	Oznur Deger

	 

	ENQERE - Avûkata Sebahat Tuncel, Cemîle Turhalli Balsak, dimayê pêvînayîşê bi Sebahate dir kerd, ercnayîşê Sebahate ya derheqê dewa de wina pare kerd: "No bi pêroyî ameyo awankerdene, senaryoyêk ci esto. Esas de serê nêdayîşê heqê vatişî, ameyo destpêkerdene û hewl danê vatişê hînan bêro vînayene, hîn zî binê tedayan de bêrê tepiştene. No pratîkêk wina yê muhakemekerdene yo."

	 

	Mîyanê hemserekê demê verî yê HDPyî ra Fîgen Yuksedag û Selattîn Demîrtaş zî estê, 28 ci ra tepişte, derheqê 108 kesî de Dewaya Kobanî amebî akerdene û roniştişê yewin 26ê Nîsane de Edliyeyê Kampûsê Zîndanê Sîncanî de ame vînayene. Bi seyan huqûqnas, sîyasetmedar û xeylêk kesî dewa taqîb kerd. Reaksîyonê vera dewa dewam kenê.

	 

	Dewa taloqê 3yê gulane bî. Avûkata dewa û eynî wextî de avûkata Sebahat Tuncel, Cemîle Turhalli Balsak derheqê dewa de ercnayîşê xo ajansê ma rê qal kerd.

	 

	Hemsereka Pêroyî ya Verê DBPyî Sebahat Tuncel dimayê roniştişê zîndanê cinîyan ê Kandirayî berdî Zîndanê Cinîyan ê Sîncanî û uca de bi Cemîle Turhalli dir pêvînayîş kerd. Cemîle dîyar kerd ke muvekîla aye hucreyê yew kesî de karantînayî de yena tepiştene û û vat: "Lazimîyê ci bi ca nêanê. Buinê tecrîdî de yena tepiştene. Beno ke prosesê karantînayî do derg bibo. Têkilîyê bi teberî dir hetê îdareyê zîndanî ra bîyo sey metodê cezakerdişî."

	 

	'Vengdayîşê wayîrvejîyayîşê merdimayî bi'

	 

	Cemîle derheqê babete de wina qal kerd: "Na dewa, bi huqûqî nîna îfadekerdene. Na dewa bêhuqûqî eşkena bêra îfadekerdene. Na dewa xo sepernena serra 2014ine. Wexto ke DAIŞ dinya de bibi tehdîd,  Tirkîya de HDPyî ra vengdayîş ame kerdene. Vengdayîşê wayîrvejîyayîşê merdimayî bi.  Ma o wext dî ke no vengdayîş, hîn sucê îqtîdarî vejeno werte. Dimayê ke cipersayîşê 6 serrî ra dima, 2020ine de semedê hedefgirewtişê Fîgen Yuksekdag û Selahattîn Demîrtaşî, na dosya ra ameyî tepiştene. No nêzdîbîyayîş, gamêke sîyasî yo. Ameyîne pawitene ke Selahattîn Demîrtaş bêro tahlîyekerdene, la no tepişnayîş ame kerdene. Muhakeme dest pêkerd, îdianameyê ke 3 hezar û 530 rîpel o, kakilê ci yê 28 rîpelî ame waştene ke bêro wendene."

	 

	‘Hêzê edlî kursî îşxalkerdibî’

	 

	Cemîle dîyar kerd ke nêzdîbîyayîşê dadgehe yê hemverê înan û sîyasetmedaran taybet bîyo û vat: "Amancê înan muhakemekerdişêko bi şekil bi.  Mîzansenêk ke serê cezakerdişê siyasetmedaran amebi awankerdiş bi. Heqê vatişî nêdayî ma û sîyasetmedaran. Veng mîkrofonan ame padayene. Vengê hemserekan ke bi SEGBÎSî tewrê ci bî, ame birnayene. Xeylê qiseykerdiş nêame eşnawitene. Avûkatan nêgirewtî salone. Serê îtîrazî ra ma girewtî. Kursiyê salone hêzê edlî îşxal kerdibî. Ma îtîraz kerd la verê çiman de nêame girewtene."

	 

	‘Dewlete wayîrê hişê tewr pîl ê camêrdan a'

	 

	Cemîle dewam de wina vat: "Roniştiş taloqê 3yê gulane bi. Derheqê redê dadgerî de 7 rojî wextê ma esto. Îfade do sey îfadeyê pîya bêro dayene û do şêro dadgehêke cor. Dadgehêke cor zî mecbûr a qerarêk bida. Roniştiş de mîkrofonê Fîgene û Sebahate ame birnayene. No polîtîkayê serdestî yê dewleta ke wayîrê hişê tewr pîl yê camêrdan a.  Fîgene û Sebahate pêwa nasnameyê xo yê sîyasetî, têkoşînê femînîst zî kenê û nê bi têkoşînê komelî dir kerdê yew. Cinîyê ke çîyê pê bawer kenê û bi ca anê yê. Xoverdayîşê cinîyan serebûtê komelî de tewr zêde yenê vînayene. Dadgehe semedê nê xoverdayîşî bişikêno, refleks ramojna. Muhakemekerdiş de tewr zêde vengê cinîyan vejîya. Sebahate zî heqê vatişî girewte û vat, ê do qet nêbê parçeyêk nê muhakemekerdişî. Fîgene zî îfadeyê sey nê da."

	 

	Sebahat Tuncel: No senaryêk ameyo awankerdene yo

	 

	Cemîle tewr peyîn qiseykerdişê xo de dîyar kerd ke Sebahate tena na dewa ra tepişte nîya û  dewaya esas ya ci ra tepişte ya 5in Dadgeha Cezaya Giran ya Meletî de ame vînayene. Cemîle dîyar kerd ke 4 serrî yo na dewa ra tepişte ya û vatiş Sebahete wina neql kerd: "No pratîkêko muhakemekerdişê ke bi pêroyî ameyo awankerdene, senaryoyê ci ameyo nuştene yo. Serê nêdayîşê heqê vatişî, ameyo destpêkerdene û vatişê hîn kesan danê dîyayîş. Hîn zî binê teda de yenê tepiştene. Semedê nêzdîbîyayîşê tîya, vatişê selahîyetdarê îqtîdarî xoser nîyo. No tesaduf nîyo. Her eşkerayîya selahîyetdarê îqtîdarî bi muhakemekerdişî yenê vernîya ma. Xo bi muhakemekerdişî dano werte. Semedê nê zî ma şaş nêmendî. Ma hemverê nêzdîbîyayîşê dadgeran, pratîkê înan de şaş nêmendî.”