Hemdîye Bilek Turgay: Dem demê wayîrvejîyayîşê ziwanê xo yo 

2021-04-28 09:07:14


	 

	Medya Uren

	 

	MÊRDÎN - Nuştoxe û Hemsereka MYDyî Hemdîye Bilek Turgay derheqê kampanyaya îmzayê ziwanê kurdkî de wina vat: "Kampanya lazimîyêk bî, ganî bêra xurtkerdene. Ziwan nasname û bîyayîşê şarî yo. Semedo ke ma bibê ganî ziwanê xo her ware de bikerê ziwanêko fermî. Dem o demo ke ma wirzê. Demê wayîrvejîyayîşê ziwanê xo yo."

	 

	Torra Ziwan û Kulturê Kurdî û Komîsyonê ziwanî yê 21ê Sibate yê Platformê Ziwanê Kurdkî, semedo ke kurdî bibo ziwanê fermî û perwerdeyî 22yê Sibate de kampanyaya îmza dabî destpêkerdene. Kampanya do heta 15ê Gulane dewam bikero. Hemsereka Komeleya Nuşteyê Mezopotamyayî (MYD) Nuştoxe Hemdîye Bilek Turgay semedê kampanya veng da û vat, hemverê asîmîlasyonî ganî şarê kurdî mîyanê xoverdayîşî de bo.

	 

	'Ziwan sey xercê komelî yo'

	 

	Hemdîye sere de bi qalkerdişê girîngîyê ziwan ê semedê komelî dest bi qiseykerdiş kerd û vat: "Yê ke  koemlan, şaran serê lingan de verdeno ziwanê înan o. Ma tim vanê ziwan nasname yo. Eke o nasname çin bo, ma zî çin ê.  Ma do mehkûmê rijnayîşî bibê. Têkoşîno ke ma bidê zî do bêwate bo. Semedê têkoşînêko sererast, ganî m awayîrê kultur û ziwanê xo vejîyê. Ganî ma destpêk de bingeyêke qeyîm nê het ra awan bikerê. Semedo ke kultur û ziwan sey xercêê komelî yê. Eke qayîm bêro do rew birêjo. Semedê ziwanê ma gane bimano û aver şêro zî ganî ma hewl bidê. Nê ra çi lazim bo, sey perwerde ganî ma bi ca bîyarê. Ma mecbûr ê nê bikerê."

	 

	'Kampanya lazim a'

	 

	Hemdîye kampanyaya îmzayan semedê ziwanê kurdkî bibo ziwanê perwerde ard vîr û vat: "Na kampanya lazim a. Ganî şarê kurd wayîr vejîyo û pîl bikero. Heta 15ê Gulane ganî ma biresê sewîyeyêka berz. Dem o demo ke ma wayîrê kulturê xo û ziwanê xo vejîyê. Siba do erey bo. Dayîk, pî, ciwan, tutî ma waştişê xo yew bikerê. Eke ma yew bê, ma eşkenê serkewte bibê. Ma eşkenê xo, nasname  û bîyayîşê xo bipawê. No semedê ma îmtîhanê peyîn o. Tena kampanya dir ney, ma ziwanê xo yê dayîke bikerê mîyanê cuya rojane zî."

	 

	'Mekteban de nîjdaperestî esta'

	 

	Hemdîye wina dewam kerd: "Semedê bazirganî lazim nîyo ma ziwanê şarî bimusê. Yê ke yenê ma dir bazirganî kenê mecbûr ê ziwanê ma bimusê. Perwerde ganî bi ziwanê dayîke bibo. Eke wina nêbo, no bêedaletî yo. Tutê ke bi ziwanê xo perwerde nêvînenê, zehmetîyê pîlan ancenê. Xora asîmîlasyon hema wextê tutî de dest pêkeno. Mekteban de sloganê nîjadperestan sey, "Ez tirk a, rast a û jîyatî ya" bi tutan danê wendiş. Nasnameyê înan çin yeno hesibnayîş û sey tena yê  tirkî eşkenê baş û rast bê, danê ramojnayîş. Tutî, hema nê demî de kewenê binê psîkolojîyê bindestî."

	 

	'Ziwanê xo azad bikerê'

	 

	Hemdîye tewr peyîn wina vat: "Ziwanê ma ziwanêko qedexe yo. Ziwanzan, nuştoxî, mamoste, hunermend, sîyasetmendarê ke kurdî bê, bi kurdkî xebate bikerê bêşik rastê hêrişan yenê. Nameyê taxan, dewan yê ke kurdkî yê vurnenê. Her ware de tena bi tirkî yena qiseykerdene. Hemraya ma Nuştoxe Gulgeş Deryaspî bi hawayêke bê huqûqî ameye tepiştene. No  hêrişêko tena semedê aye nîyo, no hêriş hemverê nuştoxê kurdan û ziwanê kurdkî yo zî. Ma nê qerarî şermezar kenê. Ez hêvîdar a ke çimê her kurdî abibo û wayîrê bîyayîşê xo vejîyo."