Ver bi 1ê Gulane de: Cinîyê ke keda înan nîna vînayene 

2021-04-27 14:21:37


	 

	 

	Medya Uren

	 

	MÊRDÎN - Cinîyê ke tekstîlê cilan de xebityenê, derheqê 1ê Gulane de Roja Karkeran ê Dinya de dîyar kerdê ke keda cinîyan nîna vînayene û wina vat: "Cinî keye û kar de xebityena. Ê qehremanê ke keda înan nîna vînayene yê. Semedê nê zî verê pêro çî roja cinîyan pîroz bo. Heta keda ma bêro vînayene, ma têkoşîn bikerê."

	 

	Cinî kedkarê ke tewr zêde keda înan nêvînenê û yê ke kargehan de tewr zêde rastî şîder, mobîng û îstimarî yenê. Bi taybet zî kargehê pîlan de no yeno kerdene û kedkarî semedê krîzê ekonomî û zehmetîyê hetê ekonomî de ciwîyenê, mecbûr manenê ke nê şert û mercan rê sere bitewênê. Ma bi wesîleyê 1ê Gulane Roja Karkeranê Dinya bi kedkarê tekstîlî dir qisey kerd û persê m acewab kerdî.

	 

	'Keda cinîyan nîna vînayene'

	 

	Evîn Ugura 31 serrî ke dayîka 3 tutan a, semedê debara xwe bikera,  tekstîl de sey xebatkarêke xebityena. Mêrdeyê Evîne zî semedê krîzê ekonomî zî karê xo ra yeno eştene û rewşa înan zî her ke şina xirab bena. Evîne wina vat: "Ma sey cinî kêm û vindîkerde dest bi cuye kenê. Heta ke ma pîl benê zî no vinîbîyayîş tewr zêde beno. Hetê keye, komel, camêrd û ekonomî de zî nêheqî ma rê yeno kerdene. Ez xo vajî, keye nêverda ma biwanê, semedo ke ma cinî bî. Ma dayî zewicnayîş û na rey zî semedo ke ma cinî yê, rastê bindestî yenê. Ez keye de her kar kena, la nîno vînayene. Nika zî mi dest bi karê teksîtîlî kerdo."

	 

	'Ma cinsê bi hêz ê'

	 

	Evîne dîyar kerd ke semedê cinî azad bê ganî azadîya înan a ekonomî biba û vat: "Ma cinî her tewir kedêke pîl danê, heta ke ma ciwîyenê. La tim nêaseno. Coka mi waştêne ke ez zî bi keda destê xonanê xo biwera. Semedê nê zî tewr zêde ez roja kedkaran, cinîyan rê pîroz kena. Ma cinî ma do heqê xo, bi xoverdayîşê xo dir bigîrê. Ma eşkenê her ware de ca bigîrê. Ma cinî cinso kêm yenê vînayene yê, la ma zaf bi hêzdar ê."

	 

	'Kedkarî eyneyê edaletî yê'

	 

	Besna Gomuş zî semedê debara xo bikera 15 serrî yo karê tekstîlî kena û nika zî sey westayê tekstîlî xebiteyna. Mêrde û lajê aye zî nê karî de xebityenê. Besna wina vat: "Kedkarî eyneyê edaletî yê welatêkê yê. Eke xebatkarî heqê xo girewtî, o welat welatêko bi hizûr û bi edalet o. La ma yenê asîmlekerdene, bi taybetî zî sey cinî. Ma heqdestê xo tam nêgînê. Ez sey westa xebityena û ciwanan rê zî kar musnena. Cayê karî de tena ney, ma keye de zî rastê bêtêduştî yenê. Karê ke cinî kenê, karê asan vînenê."

	 

	'No xoverdayîş ganî her wext geş bo'

	 

	Besna dîyar kerd ke çiqasî bieşkê serê lingan de vinderê hende weşik benê û vat: "Cinî her wext bi xoverdayîş dir weşik benê. No xoverdayîş, ganî tim geş bibo. Ez zî sey cinîyêke kêfweş a ke muhtacê camêrdî nîya. Ez bawer a ke cinî her wext eşkenê serbikewê û do bi guman no bibo. Roja kedkaran reyna pîroz bo."

	 

	'Ma heqdestê xo nêgînê' 

	 

	Naîme Oner zî tekstîl de werdê xebatkaran amade kena. Naîme wina vat: "Ez semedê 20 merdiman werd amade kena. Ma şefeq ra wirzenê û ver bi şan de qedênenê. 3 tutê mi estê. Ez keye de ewnîyena înan ra, teber de xebiteyna û reyna xebityena. Heta rojê mi qedêno wina yo. La ma heqdestê xo nêgînê. Heto bîn ra ma qij fînenê. La ma cinî her ware rê vila bîyê. Netîceyê bedelê pîl ê têkoşînê cinîyan de no wina bi. Coka ma ganî wayîrê mîrasê înan vejîyê. Ganî ma heqê xo, keda xo bipawê. Ma cinî jîyatî yê. Ez zî sere de na roje pêro kedkarê cinî û yê bînan pîroz kena."