Semedê ziwanê kurdkî bi tena sereyê xo 6 hezar îmza kom kerd  

2021-04-24 11:04:53


	 

	Derya Ren

	 

	RIHA - Çarçewaya kampanyaya îmzayan a ke Platformê Ziwanê Kurdkî û Torra Ziwan û Kulturê Kurdkî bi amancê Kurdkî biba ziwanê fermî dabî destpêkerdene de, bi tena sereyê xo 6 hezar îmza ame komkerdene. Derheqê babete de Aynur Gezor vat: “Wa her kes hemverê polîtîkayê sîstemî, bi Kurdkî qisey bikero."

	 

	Hetê Platformê Ziwanê Kurdkî û Torra Ziwan û Kulturê Kurdkî 21ê Sibate de Komîsyonê ziwanî ame awankerdene û bi amancê ziwanê Kurdkî bibo ziwanê perwerdeyî û fermî 22yê Sibate de kampanya îmzayan da destpêkerdene. Seranserê welatî de heta nika bi hezaran îmza ameyî komkerdene û heta 15ê Gulane do kampanyaya îmzayan dewam bikera.

	 

	Îdarekara HDPyî ya qezaya Halîliye ya Rihayî Aynur Gezgor heta nika 6 hezar îmza çarçewaya kampanya de kom kerd.

	 

	'Wa paştdayîş bidê kampanya' 

	 

	Aynure bale ant serê girîngîyê kampanyaya îmzayan û dîyar kerdî ke esasê pêro hêrişan de tecrîd esto û tena zîndanan de ney her hetê kombîyayîşê tecrîdî esto û nê dir zî nameyê dewe, ko û qezayan zî tesîr bîyo. Aynure wina vat: “Serrê 1980 de ma nêeşkayîne nameyê tutanê xo zî binuştêne. O wext leşkerê Esat Oktay zîndanê Amedî de vatêne, ‘Tirkî qisey bikerê.' Destûr nêdayîne ma kurdkî qisey bikerê. Ma o wext nêeşkayîne tutanê xo bierşawê mektebe. Nameyê dewan, taxan û kuçeyê ma kerdî tirkî. Ez veng dana şarê kurdî ke paştdayîş bidê na kampanya. Ma Newroze de zî îmza kerd."

	 

	'Bi ziwanê xo qisey bikerê'

	 

	Aynure dîyar kerd ke Riha de serê 6 hezarî ra zêdeyêr îmza kom kerda û vat: "Ganî ziwanê kurdkî keye de bi sînor nêmano. Ma heta nika 6 hezar îmza kom kerd la no qîm nêkeno. Hedefê mi 20 hezar îmza yo. Ez veng dana şarê kurdî û tirkî ke îmza bikerê. Wa kurmancî û kirmanckî biba ziwanê fermî û perwerdeyî. Şarê kurdî polîtîkayan vîneno û qebul nêkeno. Ziwanê mîlyonan çin yeno hesibnayîş. Ez veng dana pêro kurdan. Ziwanê xo qisey bikerê. Wayîrê ziwanê xo vejîyê."

	 

	'Bi zor tirkî dayî musnayene'

	 

	Aynure vat, Tirkîya û herême de semedê kampanyaya ziwanê dayîke komîsyon ameyo awankerdene û kampanya 22yê sibate de ameya destpêkerdene û wina qedêna: "Ma wazenê tutê ma bi ziwanê xo perwerde bivînê. Mekteban de bi zor Tirkî bi ma dayî musnayene. Nê zî bi zanabîyayîş kenê. Êdî ma bi ziwanê xo qisey bikerê. Ma îmza kom bikerê û hewl bidê ke kurdkî biba ziwanê fermî.”