Keyeyê tepişteyan: Hemverê tecrîdî bêveng memanê  

2021-04-21 13:00:02


	 

	 

	Medya Uren

	 

	MÊRDÎN - Keyeyê tepişteyan ke hemverê tecrîdê serê Rayberê PKKyî Abdullah Ocalanî û binpaykerdişê heqê zîndanan grevê vêşanîye de yê, wazenê ke waştişê bêrê qebulkerdene. Keyeyî veng danê ke her kes na babete de hîsgêr bê û paştdayîş bidê çalakîyê grevê vêşanîye.

	 

	Tepişteyê sîyasî yê PKK û PAJKî 27ê teşrîna peyêne 2020ine de bi amancê peynîkerdişê tecrîdê serê Rayberê PKKyî Abdullah Ocalanî ke 22 serrî yo Zîndanê Îmraliyî yê Asayîşê Berzî yê Tîpê F de yeno tepiştene û peynîkerdişê binpaykerdişê heqê merdiman yê zîndanan de dest bi çalakîya grevê vêşanîye kerdî.  Çalakîya tepişteyan roja xo ya 145ine de dewam keno.

	 

	Keyeyê tepişteyan problemê ke tepişteyî ciwîyenê qrdî ziwan û reaksîyon vera tecrîdî dayî.

	 

	'Tecrîd pêro zîndanan de vila bi'

	 

	Alî Aykut (42) 4 serrî yo Zîndanê Mêrdînî de yeno tepiştene. O pîyê 4 tutan o û emrê tutanê mabêne 5 - 14 serreyan de yo. Nêweşîya Alî yê sey sara û astimî esto. Alî hemverê tecrîdî û binpaykerdişê heqan zîndan de kewt grevê vêşanîye. Dayîka ey Cemîle Aykut sere de qalê rewşa Alî kerd û wina vat: "Bi çend serrî yo bi hawayêke bê huqûqî o yeno tepiştene. Hem nêweş o û hem zî wayîrê çend tutan o. Mecbûr o ke yew înan ra biewno zî. Dayîka tutan nêresana pêro çîyan. Ê bi meaşê min ê pîrîkî debara xo kenê. Ma Alî rê zî her menge pere şawenê. O û xeylêk tepişteyê sîyasî eynî problemî ciwîyenê. Oyo ke înan rê yeno kerdene bêhuqûqî yo. Tecrîd pêro zîndanan de û pêro keyeyê tepişteyan de vila bîyo."

	 

	'Waştişê înan waştişê ma yo'  

	 

	Cemîle dewam de bale ant serê tecrîdî û vat: "Heqê tepişteyan ê merdimayî yenê mehrûmkerdene. No tecrîd o û tecrîd zî sucê merdimayî yo. Ma sey keye êdî hew eşkenê dayax bikerê. Ma zî tepişteyan dir tecrîd de yê. Waştişê înan, waştişê ma yo û heta bi ca bêro zî ma pey înan de yê."

	 

	'Mi bi feqîrî tutanê xo pîl kerd' 

	 

	Kemal Kaplan zî 28 serrî yo Zîndanê Balikesîrî de yo. O zî yew ê tepişteyan ra yo ke 9 tutê ey yê qij estbî. Cinîya ey Ayten Kaplan tutanê xo bi tena sereyê xo û mîyanê feqîrî de pîl kena. Aye karkerîya mewsîmî kerd û serê erdê xo de eynî wextî de karê ramitişî kerd. Bi pereyê ke qezenc kerdêne zî tutanê xo û mêrdeyê xo yê ke zîndan de bi wey kerd. Aytene bale ant serê rewşe û vat: "Mi tutê xo bi feqîrî pîl kerd. Ez nêweş kewta û embazê mi zî nêweş o. Ez tîya nêeşkena biewnî xo ra. O zî uca çi rewşe de yo ma pê zanê. Na rewşa tewr giran ya tecrîdî ya. Nika dewlete tena embazê mi ney,  keyeyêk û 9 tutî mexdûr kerd û cuya ma serûbin kerd. Ma pêrûnan kerd binê tecrîd."

	 

	'Bibê vengê tepişteyan'

	 

	Aytene dîyar kerd ke tepişteyî heta nika surgunê xeylêk cayê sey Îzmîr, Mêrdîn û Manîsa û şaristanê sewbînan rê ameyî kerdene û vat: "Emrê ma verê berê zîndanan de derbaz bi. Şîyayîş û ameyîşê ma problemêko pîl o. Yenê surgunkerdene û wexto ke ma şinê zî pere lazim o. Waştişê ma oyo ke peynîya tecrîdî bîyarê. Tecrîd serê pêro tepişteyan de sucê merdimayî yo. Ma şermezar kenê. Semedo ke peynîya tecrîdî bêro ma waştiş kenê ke pêro şar wirzo serê xo û hemverê înan reaksîyon ramojno. Grevê vêşanîye çalakîyêke heq a û ma paştdayîş danê."