'Paştdayîşê ma yê semedê Rosa û TJAyî mîyanê çar dêsan de nêmaneno' 

2021-04-19 12:31:28


	 

	 

	Melîke Aydin

	 

	ÎZMÎR - Temsîlkarê rêxistinê cinîyan dîyar kerdî ke hêrişê hemverê Komeleya Cinîyan a Rosa û TJAyî de yeno manaya ke do wareyê ke destê cinîyan de yê bigîrê û vatî: "Ma do têkoşîn pîya bikerê. Paştdayîşê ma mîyanê çar dêsan de nêmaneno."

	 

	Amed de 5ê nîsane de, mîyan de endamê TJA û Komeleya Cinîyan a Rosa û muxabira ma Berîtan Canozer zî tede 26 cinî sereştişê keyeyan de ameyî destbendkerdene. 11 cinî hetê dadgehe ra ameyî tepiştene û semedê dayîka Aştîye Nezahat Teke hepsê keyeyî ame dayene. 14 cinî zî bi şertê kontrolê edlî serbest ameyî veradayene. Cinîyan dîyar kerd ke operasyonê destbednkerdiş û tepiştişî bi amancê terorîzekerdiş û marjînalkerdişê cinîyan yeno kerdene û taybetî zî bajarê kurdan de tedayî zaf zêde yê. 

	 

	'Ma paştdayîş danê têkoşînê înan'

	 

	Endama Paştdayîşê Morî Cansur Erkmen, vat ke îqtîdar bi ferzkerdişê cinîya makûle, dişminîyê hemverê cinîyan eşkera keno û bi feshkerdişê Pêkerdişê Stenbolî dir no dişminî do hîna zêde bo û vat: "Hêrişê hemverê Komeleya Rosa yewin nîyo. Bi qestî yeno kerdene û hewl danê ke vernîya têkoşînî padê. Ma hêriş tena hemverê Komeleya Rosa nêercnenê, ma sey hemverê têkoşînê cinîyê Tirkîya ercnenê. Ma rêxistinê cinîyan vanê ke ma kîşte embazanê xo yê tepişteyan de yê. Dûrî ra bo zî ma paştdayîş danê têkoşînê înan."

	 

	'Şaristanê kurdan de tedayî hîna zêde yê'

	 

	Komeleya Cinîyan ê Îzmîrî Zeynep Tuna vat, 2019 ke wextê Sadullah Ergîn wezaretê Dade bi, merdişê cinîyan se ra hezar û 400 zêde bîyo û vat: "Ewro nîno zanayîş ke na hûmare se bî. Komele bi îmkanê kêm xebatê hemverê şîdetê serê cinîyan kena. La tedayî hemverê ma estbî û nêqedênê. Bêguman nê tedayî şaristanê Kurdan de hîna zêde yê. Ma pêro para xo şîdet ra gênê. Ma paştdayîş de yê. Goreyê xeylêk cigêrayîşê ke ameyê kerdene, cinî bi sazgehê cinîyan bawer ê. Pêwa nînan wareyê cinîyan yew bi yewe yenê padayîş. Cinî cinîyan ra bawer kenê. Mercîyêk bîn çin o. Gelo do şêrê qereqole? Yan zî cayêk bîn? Cewabêke uca de bigîro dîyar o. Qalê mutabakatê Enqereyî yeno kerdene. La rêxistinê cinîyan ra pers nêkenê, yan zî ê rêxistin ma nîyê."

	 

	'Hewl danê ke terorîze bikerê'

	 

	Pawitişê Cinîyan ra Emîne Akbaba zî wina vat: "Îqtîdar şertê pandemî kerd îmkan û bêhuqûqî meşrû kerd. Her şaristan de cinîyan kenê binê ablûqa. Hêrişê hemverê Komeleya Rosa, bi amancê terorîzekerdiş û marjînalkerdişî yeno kerdene. La ma pîya têkoşîn kenê. Wezîfeyê ke dewlete bikerdêne, komeleyê cinîyan kenê. Ma sey hêrişê hemverê Komeleya Rosa, bi tayînkerdişê qeyûman zî dî. Vernê de komeleyê cinîyan û stargehan padayî. Ma eynî çî  ûnîversîteya Bogazîçî dî. Ma do vengê Komeleya Rosa berz bikerê. Şima eşkenê înan mîyanê çar dêsan de heps bikerê la ma mîyanê çar dêsan de nêmanenê, paştdayîşê ma mîyanê çar dêsan de nêmaneno."