Tepişteya nêweşe Aysel Daglar nîna dermankerdene 

2021-04-12 09:08:41


	 

	 

	COLEMÊRG - Tepişteya nêweşe Aysel Daglar nêeşkena lazimîyê xo zî ca bîyara. Dayîka aye Emîne Daglar dîyar kerd ke ganî kênaya aye bêra dermankerdene û veng da wezaretê dade.

	 

	Aysel Daglar 2018ine de Muş de netîceyê îxbarêke de ameye destbendkerdene û tepiştene. Derheqê Aysele de bi îdiayê ‘xirakerdişê yewîya dewlete’ û ‘endamîya rêxistine’ di rey cezaya muebetê giran ame deyene. Aysel Daglar semedê parçeyê şarapnelî yê sereyê aye de bi tehlukeyê felcî dir rî bi rî yê. Aysele zîndanê Tîpê T yê Wanî de tepişte ya û nîna dermankerdene. Rewşa Aysele her ke şina giran bena û lazimîyê xo zî bi hetkarîya embazanê xo kena. Perdeyê goşê Aysele îşkenceyî de teqyabi û lingê aye de zî deriznayîş esto. Dayîka aye Emîne Daglar dîyar kerd ke semedê pandemî bi serrêke serdayîşê kênaya xo nêkerda û bi mengêke zî pêvînayîşê telefonî nêeşkena kênaya xo dir bikera.

	 

	'5 hewteyo kênaya mi nêeşkena telefon ma rê bikero'

	 

	Emîne dîyar kerd ke 5 hewteyo nêeşkenê pêvînayîşê telefonî bikerê û vat: "No hewte newe yo ma qisey kerd. Ma nêzanê çira ma nêgeyrena. Ma zîndan o do uca çi bikerê? Ez veng dana wezaretê dade, çi cezaya kênaya mi esta, wa bêro keye de bianco. Ez rewşa kênaya xo ra bi guman a. Îmkanê mi çin o ke ez şêra kênaya xo bivîna. Bi di serrî yo semedê pandemî nêeşkena şêra verê kênaya xo."

	 

	'Semedê îşkence perdeyê goşê aye teqya'

	 

	Emîne qiseykerdişê xo wina qedêna: "Kênaya mi nêweş a, lingê aye, çimê aye dejenê. Nêweşîya kênaya mi giran a û nêverdenê şêro nêweşxane zî. Lingê aye de derznayîş esto. Wexto ke ameye tepiştene îşkence ra perdeyê goşê aye teqya. Kênaya mi nêeşkena rayîra şêro. Benê doktor vanê, 'şore ma nêeşkenê çîyêk bikerê.' Kênaya mi nêeşkena lazimîyê xo bi ca bîyara. Eke nêro dermankerdiş do felç bibo. Yewin waştişê mi oyo ke bêra dermankerdiş."