'Padayîşê HDPyî derbeyê hemverê destkewtişê cinîyan o' 

2021-04-04 14:45:00


	 

	Hîkmet Tunç

	 

	WAN - Cinîyê HDPyijî dîyar kerdî ke partîya înan partîya cinîyan a û dewaya padayîşê HDPyî sey 'derbeyê hemverê destkewtişê cinîyan' erjnayî.

	 

	Hetê Serdozgerîya Komare ya Dadgerî ra bi amancê padayîşê HDPyî Dadgeha Destûrê Bingehîn (DDB) dewa akerd. Raportorê ke dewa de ame wezîfedarkerdene zî derheqê cigêrayîşî yê ewilê îdianemeyî de rapor amade kerdibi, pêşkêşê DDByî kerd. Heyetê Pêroyî yê DDByî cipersayîşê ewil yê dewaya padayîşê derheqê HDPyî de temam kerd. DDByî kêmasiyê hetê uslubî de tespît kerd û bi yew vengî qerarê teslîmkerdişê îdianameyî yê semedê Serdozgerîya Dadgerî kerd.

	 

	Cinîyê HDPyijî yê Wanî derheqê dewaya padayîşê partîya înan de ercnayîş kerd ke HDP destkewtişêke têkoşînî cinîyan o û vatî ê tu wext fek partîya xo ra vera nêdanê.

	 

	'HDP partîyêke pey şarê xo de ya'

	 

	Îdarekara HDPyî ya Erdîşî Hatîce Yildiz derheqê babete de qisey kerd û dîyar kerd ke do padayîş demokrasîya welatî hîna peyser bierzo û vat: "Bi padayîşê partî nêeşkenê îradeyê şarî bişiknê. Çiqas partî ameyî padayîş la nêbê çareserî. Ma sey pêlê behrî ameyî û ma do reyna bêrê. Partîya ma wina hîrê, çar kesê ke şî YSK û partî akerdê nîya. Partîyêka bi kok a. Partîyêka bedel daye ya. Partîya şarî ya. Partîyêka pey şarê xo ya."

	 

	'HDP mozaîkê şaran o'

	 

	Hatîce dewam de wina vat: "Tifaqê AKP-MHPyî semedê kaos û krîzî vejêno, wazeno HDPyî bi pelçiqnê û na rewşe qebul nêkenê. HDP mozaîkê şaran o. Nêeşkeno bêro padayîş. Ti semedê 600 sîyasetmedaranê ci qedexe anê, gelo ti do mîlyonan se bikerê? 8ê Adare, Newroze de cinîyan, ciwanan, şarê kurdî vat ‘HDP şar o’. Bi tepiştiş û tedayan nika bi hezaran endamê ci tepişte yê. Gelo HDP bi nê qedîya? No bi çare? Ney. Heta nika xeylêk partî padayî, la bi mîlyonan kesî binê HDPyî de bî yew. Biewnê ma reyna tîya yê."

	 

	'HDP partîya Mazlûm Doganan a'

	 

	Îdarekara HDPyî ya Wanî Gurbet Oktay zî dîyar kerd ke HDP partîya cinîyan a û wina vat: "HDP partîya Mazlûm Doganan a. Partîya Ferhatan a. Wina asan nêame awankerdene. HDP şar o, şar tîya yo. HDP serê têkoşînê cinîyan de ameyo awankerdene."

	 

	'Do têkoşînê ma hîn tewr xurt dewam bikero'  

	 

	Hemsereka HDPyî ya Erdîşî Sarya Bîlîcî: “HDPyî padê ma do bi nameyêke bîn reyna têkoşînê xo dewam bikerê. Padayîşê HDPyî semedê înan feyde nêkeno. Do hende merdimî senîn bitepişnê. Serrê 90an ra heta nika xeylêk partî ameyî awankerdene û padayene. La ma bi hawayêke xurt têkoşînê xo dewam kerd. HDP partîyêka ke Kurd, Tirk, Ereb, Çerkez binê sîwanê ci de ameyê têhet a. HDP nêeşkenê padê."

	 

	'HDP destkewtişê cinîyan a, amanc çinkerdiş o'

	 

	Hemsereka HDPyî ya Qelqelî Sakîne Kutpinar: “Bi qeyûman dir destkewtişê cinîyan hedef ame girewtene. Qeyûmê ke ameyî zî çîyê derheqê cinîyan de çin kerdî. No di dem o ke HDPyî bi hemserekîyê şaredarî tepişnayî. Qeyûm ameyî û destkewtişê cinîyan çin kerdî. HDP zî bi eynî mantiqî hewl yeno dayene ke bêro padayîş. Padayîşê HDPyî hêrişê hemverê destkewtişê cinîyan o. Ma nê eşkera vînenê; HDP destkewtişê cinîyan o. Amanc çinkerdişê destkewtişan o. Ma tu wext fek partîya xo ra vera nêdanê. Her şertî de ma cinî têkoşînê xo dewam bikerê.