Cinîyan reaksîyon vera padayîşê HDPyî dayî: Ma estê û ma tîya yê 

2021-04-02 13:34:55


	 

	 

	Sema Çaglak

	 

	AMED - Cinîyê ke tewrê Newroza Amedî bîbî, serê HDPyî de qisey kerdî û dîyar kerdî ke çiqas partîyê kurdan bigirî zî do hêzdar bê û vatî: "Eke weçînayîş bêro kerdene ma do reyna derse bidê înan û raya xo bidê HDPyî. Ê do vinî bikerê û ma do serkewte bê."

	 

	Rojê vîyarte de Serdozgera Komara ya Dadgerî Bekîr Guneş semedê dewaya padayîşê Partîya Demokratîke ya Şaran (HDP) muracatê Dadgeha Destûrê Bingeyîn (DDB) da. Îdianameyê derheqê HDPyî de ame amadekerdene de derheqê 687 sîyasetmedaran de qedexeyê sîyasetî ame waştene û nê ser reaksîyonî ameyî ramojnayîş. Reaksîyonê hemverê rijnayîşê HDPyî dewam keno. Meydanê Newroze ya Amedî zî şar HDPyî tena nêverdabi, bi slogan û beyraqê xo wayîr HDPyî vejîyabi. Cinîyê ke beşdarê Newroza Amedî bîbî serê HDPyî de qisey kerdî û dîyar kerdî ke çiqas partîyê kurdan padê zî ê do tewr bi hêz bê.

	 

	'Ma estê û ma tîya yê'

	 

	Fatma Çelîk dîyar kerd ke ê pey heqê xo yê û vat: "Erdogan ma red keno, vano ke kurdî çin ê. La wa dîmenanê Newroze ra biewnê. Meydanê Newroze nêaseno. Ê kamê ke tîya pirr kerdê. Qey kurd nîyê! Vano wa kurdî vinî bibê. Ma do senî vinî bibê. Ma estê û ma tîya yê.  Ma zî heqê xo pawenê. Senîn ke ê qalê heqan kenê û pey heqê xo nê. Eke bêro padayîş zî do reyna bêro akerdene."

	 

	'Îradeyê ma nêeşkenê çin bikerê'

	 

	Nazîfe Çakir zî wina vat: "Ruhê ma bi partîya ma dir o. Ma kîşte partîya xo de yê û ma do heta peynî wayîrê partîya xo vejîyê. Ma do serbikewê. Heqê ma zî estê, rayê ma zî estê. Îradeyê ma nêeşkenê çin bikerê. Ma estê. Ê çiqas padê, ma do tewr zêde bêrê. Derdê înan çîyo?"

	 

	'Ê do vinî bikerê û ma do serbikewê'

	 

	Kiymet Balta zî dîyar kerd ke weçînayîş de hesab înan ra pers bikerê û vat: "Bahçelî û Erdogan kokê kurdan biqedênê zî zerrîya înan rehet nêbeno. Zîhnîyetê înan lêşin o. Kurdinê wirzê serê lingan. Şarê Amedî wirzê serê lingan. Televîzyon de serê HDPyî de xêrcê HDPyijan her kes qisey keno. Ez înan temaşe kena, dej keweno sereyê mi. Wazenê weçînayîş rew bîyarê la ma do weçînayîş de reyna dersa înan bidê. Ê do vinî bikerê û ma do serbikewê."

	 

	'Ma do tewrbi xurt bêrê'  

	 

	Nazê Ozel zî dîyar kerd ke HDP partîyêke pîl a û bena vengê pêro şaran û vat: "Ma bi nê polîtîkayan nêqedênê. Her wext serê ma de polîtîkayê winasî kenê. Ma êdî musayî û nêtersenê.Çiqas teda û zorî serê ma de bibo zî ma do tewr bi xurt bêrê û do cewabê înan bidê. HDP partîyêka demokratîk a, her kesî rê bena cewab. Polîtîkayê bi qanûnî û demokratîke kenê. Coka tewr zêde binê hêriş û hedefan de ya. Semedê aştî û demokrasî xebatan kenê. Ma zî kîşte partîya xo de yê. Meydanê Newroze de zî asayîne. Her çî meydan de yo. Hewce nêkeno ke merdim vajê."