Cinîyê Amedijî do bi rengê xo meydanê Newroze de bê 

2021-03-19 14:53:40


	 

	Sema Çaglak - Şehrîban Aslan

	 

	AMED - Cinîyê Amedijî, do bi sloganê, "Ma bi adirê Newroze xo ver danê û azad benê" bi cel û belgê xo yê herême meydanê pîrozkerdişî de cayê xo 

	 

	Emsar pîrozkerdişê Newroze bi sloganê, "Ma bi adirê Newroze xo ver danê û azad bibê' de bêro kerdene, xeylêk şaristanan de startê pîrozkerdişî ame kerdene. Amedekarîyê semedê pîrozbîyayîşê ke 21ê Adare de Amed de bêro kerdene, dewam kenê. Cinîyê Amedijî semedê Newroze qisey kerdî û dîyar kerdî ke ê do bi cil û belgê xo û bi coşêke pîl meydanan de cayê xo bigîrê.

	 

	'Bi cil û belgê rengînan ma verê xo dayîne pîrozkerdişan'

	 

	Kedkara keyeyî Muhabbet Kurt (66), bale ant serê Newrozanê verênan û vat: "Pîrozbîyayîşê Newrozê verênan weş bi. Ma cil û belgê xo yê rengîn dayîne xo ra û ma taxan de kom bîne. Dima ra zî ma verê xo dayîne meydanê pîrozkerdişî. Demê verê zî polîsî bîne asteng la ma zî bi qerar bî. Ma bi hêz û bi heyecan bî. Qedexe û teda hemverê coş û heyecanê ma yê Newroze nêbîne asteng. Ma semedê Newroza emsarî amade yê. Ez semedê nêweşî nêeşkan şêrî la tutê mi do şêrê. Ez wazena sey verê Newroze weş bo."

	 

	'Ma estê û ma do bibê'

	 

	Kedkara Keyeyî Hacer Kurt (33), zî dîyar kerd ke Newroze semedê kurda serewedaritiş a û vat: "Wexto ke vanê Newroze, cuyêka newe û wisar keweno vîrê merdiman.  Newroze tena herême de ney, hetê pêro kurdan ra yena pîrozkerdiş. Wexto ke ma kewenê menga adare semedê ma pêrûne serrêke newe dest pêkena. Wextê Newroze ma bi kelecanêko pîl cil û belgê xo amade kerdêne, porê xo mûnayîne, mûra kerdêne mîyanê porê xo. Ma reyna zî bi heme coşê xo amadekarîyê xo kenê. Verê ma bi kom kom şîne la nika her kes bi tena sereyê xo şino. La reyna zî ma do bi coşêk pîl tewrê pîrozkerdişê Newroze bibê û ma do verê xo bidê meydanan. Ganî heme kes roja Newroze meydan de bo û vajo, 'Newroze pîroz bo!' Çi beno wa bibo ma fek vera nêdanê. Ma estê û ma do bibê."

	 

	'Newroze vengdayîşê wisarê newe ya'

	 

	Kadriye Esîn zî kedkara keyeyî ya û vat: "Ez zêde nêşîya Newroze la gama ke ma televîzyon de dîne, ma coşê meydanî hîs kerdêne. Newroze semedê ma pêrûne rojêka taybet û erjaye ya. Ez vîrîye Newrozê verênan kena."

	 

	Dîlber Suad zî kedkara keyeyî aye zî wina vat: "Ez verê ra şîne Newroze, ma pîroz kerdêne. O wext zafweş bi. Ma şîrînayî viraştêne û tîya bi cîran û cinîyan dir wextê weş derbaz kerdêne. Ez êdî nêşin ala televizyon de temaşe kena. Tehmê verê nêmendo."

	 

	'Ma do bi coşêke pîl pîroz bikerê'

	 

	Kedkara keyeyî Ayşe Yilmaz zî wina qal kerd: "Wexto ke Newroze nêzdî bena, ma cilê xo yê herême amade kenê û kewenê meydan. Ma bi coş û heyecanêk pîl meydanan de govende kenê. La par semedê korona ma Newroze pîroz nêkerd. Tena tax û kuçeyan de pîrozbayî ame kerdene. La emsar ma do bi coşêke pîl pîroz bikerê."

	 

	'Ma do bi rengê xo meydanan de bê' 

	 

	Semîha Guneş, dîyar kerd ke aye do bi rengê xo meydan de bo û vat: "Ma do bi cilê xo yê herême vejîyê meydanan. Newroze semedê ma pîroz a, roşanê ma ya. Qezayê kesk û sûr û zer sereyê xo de girê bidê û bi govend û tilîliyan ma do Newroze pîroz bikerê."