'Serewedaritişê 8ê Adare do bi xoverdayîşê Kawayî dir bibo yew' 

2021-03-17 09:23:18


	 

	 

	Gulîstan Azak

	 

	AMED - Cinîyê Amedijî semedê tewrbîyayîşê Newroze veng dayî û wina vatî: "Ma do serewedaritişê 8ê Adare bi xoverdayîşê Kawayî dir bikerê yew û hemverê zaliman bibê qîrînayîş."

	 

	Cinîyê ke hemverê şîdeto ke ci dir yenê rî bi rî û hêrsê înan ê hemverê tecrîdî de her ke şino pîl beno, 8ê Adare de waştişê xo reyke bîn ardî ziwan. Cinîyê ke hewteyê 8ê Adare pey xo de verdayî, nika semedê Newroze zî xoverdayîşê xo de bi qerar dewam kenê.

	 

	Cinîyê Amedijî dîyar kerdî ke 8ê Adare pirda ke 21ê Adare de şina ya û vatî, do bi eynî waştişî newe ra meydanan de bê.

	 

	'Ma do dorê adirê Newroze de bêrê têhet'

	 

	Kedkara keyeyî Remzeta Bulut bale ant serê girîngîyê yewîya neteweyî û wina vat: "Kurdî bi serran o rastê zulmî yenê. Sebebê nê zî nêyewbîyayîşê neteweyî yo. Serê na herre de kiştişê kerdoxê nêdayîr yenê ciwîyayîş. 4 merdimê mi Pasûr de helîkopter ra ameyî eştiş û veşnayîş. Ewro bi seyan tepişteyî zîndanan de yê. Hemverê nê hêrişan yewin çi caardişê yewîya neteweyî yo. Heta yewîya neteweyî bi ca nêro ma do çin bêrê hesibnayîş. Semedê nê zî Newroze girîng a. Ma do Newroze de bêrê têhet. Ma dest bidê yewbînan. Veng dana pêro kesan ke dorê adirê Newroze de bêrê têhet."

	 

	'Têkoşînê hemverê zulmî hema dewam keno'

	 

	Wendekara Melîs Berçem Yuce zî dîyar kerd ke Newroze sembolê xoverdayîşê ke Kawayê Hesinkar hemverê Dehaq dayo yo û wina vat: "Têkoşînê hemverê zulmî ameyo dayene, hema dewam keno. Menga Adare menga xoverdayîşî ya. Do ruhê 8ê Adar şêro 21ê Adare rê. Seke Mazlum Dogan vato, 'xoverdayîş ciwîyayîş o' ez veng dana şarî ke dorê adirî de bêrê têhet. Qebûlkerdişê bîyayîşê şarêke yewîya neteweyî ra derbas bena. Şarê ma bi serran o çin yeno hesibnayîş. Hemverê nê de zî serewedaritiş esto. Ma bi serran o hemverê nê caardişan sere wedarnenê. Bêguman ma 8ê Adare de zî û 21ê Adare de zî her wext xo ver danê."

	 

	'8ê Adare pirda ke şina 21ê Adare ya'

	 

	Zulfîye Kîşmîr vat ke Newroze roja serewedaritiş, xoverdayîş û newebîyayîşî ya û vat: "Cinî do serewedaritişê 8ê Adare berê Newroze. 8ê Adare pêwa astengîyan pêwa pandemî bi coş ame pîrozkerdene. Cinîyan hemverê binpaykerdişê kede û bedenî meydan pir kerdî. 8ê Adara ke serewedaritişê cinîyan do bi xoverdayîşê Kawayî bibo yew û hemverê zalimtî bibo qîrînayîş. Semedê nê zî 8ê Adare pirda ke şina 21ê Adare ya.”

	 

	'21ê Adare semedê cinîya kurdî roja, serewedaritiş, xoverdayîş û bîyayîşî ya'

	 

	Gulîstan Yilmaz dîyar kerd ke 21ê Adare semedê cinîyanê kurdî roja xoverdayîşî y aû vat: "Enerjîyê 8ê Adare do bi Newroze bireso qil. Semedê pandemî cinî mîyanê çar dêsan de yenê tecrîdkerdene. Cinî rastê her tewir şîdeto ke tecrîd rayîr akerdo. La cinîyan 8ê Adare de pêwa pêro astengîyan, vatişê xo qîrayî. Semedê Gulîstan Doku, Îpek Er û Şule Çet vatişê xo qîrayî. Bi taybet ma cinîyê ciwanî ma do coşê 8ê Adare bibê Newroza Amedî. Ma do semedê wekerdişê adiro ke Kawa tafînayo pîl bikerê bêrê têhet. Veng dana pêro kesan ke a roje bêrê têhet