'Wa waştişê tutanê ma bêrê qebulkerdene, tecrîd bêro wedaritene' 

2021-03-17 09:17:34


	 

	 

	MANÎSA - Dayîka tepişteyê bi nameyê Ramazan Kizildag, Şukrîye Kizildag dîyar kerd ke ganî waştişê tepişteyê ke 107 rojî yo grevê vêşanîye de yê lezabez bêrê qebulkerdene.

	 

	Dayîka tepişteyê bi nameyê Ramazan Kizildag, Şukrîye Kizildag dîyar kerd ke tepişteyî bi amancê wedaritişê tecrîdê serê Abdullah Ocalan kewtê grevê vêşanîye û wina vat: "Wa zîndanan ra cenaze nêvejîyê. Wa waştişê tutanê ma bêrê qebûlkerdene. Ma wazenê ke înan serbest vera bidê."

	 

	‘Dewlete teda tutanê ma rê kena'

	 

	Şukrîye dîyar kerd ke tutê înan rehet biwanê û pîl bibê wareyê xo ra koç kerdê û wina vat: "Lajê mi 17 serreyê xo de ame tepiştiş. 26 serrî yo tepişte yo. Pêro zîndanan de geyrnayî. Ma hesretê yewbînan mendî. Ne ez eşkena lajê xo ko bikerî û ne zî o. Ma zî sey merdimî bînan semedo ke tutê ma rehet biwanê û pîl bibê wareyê xo terk kerd la reyna zî ma teda ra xelas nêbî. Tutê ma ya yenê kiştiş yan zî yenê tepiştiş."

	 

	‘Dewlete cinîyan ra tersena'

	 

	Şukrîye dewam de dîyar kerd ke tutî, kal-pîr, cinî û camêrdî ferq nêkeno, heme kurdan ra tersenê û wina vat: "Rojê vîyarte de dayîkanê 70 serrî tepiştî. Nêwazenê kurdî sîyaset bikerê, înan pelçiqnenê. La kurdî nêtersenê. Tewr zêde zî cinîyan ra tersenê."

	 

	‘Heta ez sax bî ez o şêrî zîndan'

	 

	Şukrîye bale ant serê grevê vêşanîye û vat: "Lajê mi zî verê 4 mengan kewtibi grev û kewtibi rojeyê mergî. Ma nêwazenê tutanê ma rê çîyêk bo. Dayîkî her wext nê vanê la kes veng nêkeno. Ez bi lajê xo serberz a. Heta ke ez sax bî ez o şêrî zîndan. Ez fek ci ra vera nêdana. Her wext pey lajê xo de ya. 1995 de semedê heqê pêvînayîşê akerde 3 mengî kewtî grev. Ê key bikewê grev ma pey înan de yê. Nika seba wedaritişê tecrîdê serê Abdullah Ocalan kewtê grev. Ganî tecrîdê serê Abdullah Ocalanî bêro wedaritene. Eke tecrîd wirzo do problemî zî çareser bê. Abdullah Ocalan tena rayberê şarê kurdî nîyoê pêro bindestan o."

	 

	'Semedê bikişê ma tutî nêardê dinya'

	 

	Şukrîye dîyar kerd ke tu welatêke de seke Tirkîya zulm û heqaret çin o û vat, ê wazenê şer bi peynî bo, gonî nêrijo û wina vat: "Kurd, Tirk, Ermenî, Elewî, Erebî kam beno wa bibo, wa kes nêmiro. Ma semedo ke tutanê ma bikişê nêardî dinya. Seke merdimê bînan heqê ma zî esto."

	 

	'Caardişê keyfî dewam kenê'

	 

	Şukrîye dîyar kerd ke zîndanan de radyo, kovar û rojname yenê desteserkerdiş û vat: "Kitabê ke ma benê peyser danê. Cigêrayîşê koguşan de yenê desteserkerdene. Caardişê keyfî dewam kenê. Cezayê hucreyî danê. Waştişê ma oyo ke wa çîyêk bi tutanê ma nêro û lezabez waştişê tutanê ma bêrê qebulkerdene û tecrîd bêro wedaritene."