
'Qirkerdişê Helebceyî sewîyeya kînê dişminê kurdan dîyar kerd' 

2021-03-16 09:34:18


	&nbsp;

	&nbsp;

	Ronîda Hacî

	&nbsp;

	HESEKÊ - Endama Meclîsê Keyeyê Şehîdan Fehîma Ehmed dîyar kerd ke qirkerdişê Helebceyî plan û sîyasetêko bi amancê qirkerdişê şarê kurdî bi û heta roja ewro hemverê şarê Kurdî Vakur û Rojhelatê Sûrîye de dewam keno.

	&nbsp;

	16ê Adara 1988 de Rêjîmê BAASî û Îraqî bi serkêşîyê dîktator Sedam El-Hisên qirkerdişêk Helebce de kerd. Qirkerdiş de bi çekê kîmyewî şaristanê Helebceyî bombavarn kerdî û netîce de tewr zêde 5 hezar û 500 kurdî xeylê xo cinî û tutî dinyaya xo bedilnayî. Derheqê babete de Endama Meclîsê Keyeyê Şehîdan ê Kantonê Hesekî Fehîma Ehmed qirkerdişê Helebceyî erjna.

	&nbsp;

	'Plan û dişmin yew o, tena wext vuryeno'

	&nbsp;

	Fehîma destpêk de pakrewanê qirkerdişê Helebceyî ard vîr û vat: "Amancê qirkerdişê Helebceyî çinkerdişê şarê Kurdî bi, la no amanc heta nika zî bi qirkerdişê cîya xo dano teber. Qirkerdişê Şengalî, Efrîn, Serêkanî û Girê Spî qirkerdişê Helebçayî dûr nîyê. Sîyaset û plan yew ê, tena wext vuryeno. Qirkerdişê Helebceyî sewîyeya kînê dişminê kurdan dîyar kerd. A roje de reyna îqtîdarî destê xo dayî yewbînan û hemverê kurdan qirkerdiş kerdî. Ma qet xo vîr ra nêkenê, tarîx xo vîr ra nêkeno û do tutê ma zî xo vîr ra nêkerê. Her çiqas sewîyeya qirkerdişî pîl bo zî, reyna kurdî cu danê. Bi têkoşîn û xoverdayîşê xo ma bîyayîşê xo pawenê. Wa her merdimêkê kurd nê rastî de bo, eke ma yewbîyayîşê xo awan nêkerê do tarîx xo tekrar bikero."

	&nbsp;

	'Qirkerdişê Helebceyî sewîyeya kînê dişminê kurdan dîyar kerd'

	&nbsp;

	Fehîma dewam de wina vat: "Ma wina prosesêk de ciwîyenê, herkes wazeno darbeyêk bido îradeyê kurdan ro û destkewtişê înan binpay bikero. Helebce, sewîyeya kînê dişminanê kurdan dîyar kerd. Şarê kurdî qirkerdişê Helebceyî û heta îxanet çî bînan ra tecrube girewtê. Coka kurdî koletî qebul nêkenê û rûmetê xo pawenê. Eke komel win anêbîne, nameyê înan tarîx de çinbi. Helbet ma nêeşkenê vajê hêriş serê ma de çinbo, Girîng oyo ke ma dewaya xo ra anêgêrê û bi ruhê kurdbîyayîşî têbigeyrê."

	&nbsp;

	'Yewbîyayîşê kurdan do serkewtiş mende bikero'

	&nbsp;

	Fehîma veng da partîyê sîyasî yê Kurdî ke yewbîyayîşê xo awan bikerê ke vernîya îşxalkerdiş û qirkerdişan bigîrê û wina qedêna: "Waştişê ma partîyê Kurdan ra oyo ke yewbîyayîşê xo awan bikerê ke ma rayîr vernîya îşxalkerdiş û qirkerdişan bigîrê. Eke ma nêbê yew do çaranûsê ma vinî bibo."

	&nbsp;

	&nbsp;