Dayîka Aştîye ya hemverê serdestan têkoşîn pîroz dî: Selma Ozturk 

2021-03-16 09:32:48


	 

	 

	Medya Uren

	 

	MÊRDÎN - Endama Meclîsê Dayîkê Aştîye Selma Ozturk ke her wext şîdetê camêrdan ci rê ameyîne kerdene la tu wext fek xoverdayîşê xo ra vera nêda û vat: "Têkoşîn mi rê rayîrê serkewtiş û nîşaneyê azadîye yo. Ez seke cinîyêke kurd hemverê hişmendîyê camêrdan û hemverê hişmendîyê serdestan têkoşîn kenê pîroz vînena. Ganî pêro cinî zî fek xo ra vera nêdê."

	 

	Cinî temamê dinya de bi hişmendîyê camêrdan ê serdest dir rî bi rî manena û her wext hemverê nê têkoşîn kena. Cinîyê Rojhelato Mîyanên têkoşînêk zaf het ra danê. Selma Ozturk hetê mêrdeyê xo û keyeyê ey ra rastê şîdetê sistematik ameyîne, hişmendîyê keyeyî yê feodalî de vurnayîşê pîl înan de awan kerd. Mîyanê Meclîsê Dayîkê Aşitîye de ca girewte û bi hawayêke çalak xebityena.

	 

	Selma Ozturk serra 1974 de Dewa Qurunî ya girêdayê Qoserî de ameya dinya. 18 serrîya xo de bi lajê dedê xo dir bi zor yena zewicnayîş. Keyeyê Selma keyeyêk feodal bi. Her wext teda û zorî ci rê kerdêne. Wexto ke zewicyena zî rastê şîdetê mêrde û xwezurê xo yena. Selma, hemverê nê şîdetan û hişmendîyê feodal her wext têkoşîn kena û wazena înan bivurno. Selma emrê 39 serrîya xo de bena Dayîka Aştîye û bi hawayêke çalak xebityena. Keyeyê înan de cinî nêvejênê teber û karê winasî de ca nêgînê. La Selma pêro dêsan xira kena û cayê cînî mîyanê komelî de nîşan dana.

	 

	'Zewac mi rê sey xelasî ameyîne'

	 

	Selma destpêkê qiseykerdişê xo de qalê şîdetê ke dîyo kerd û vat: "Ma cinî her wext sey zayendê diyîn û hîrên yenê vînayene. Ma ne wayîrê statuyêke ne zî wayîrê heqêke yê. Wexto ke ez tut bîya, yeno vîrê mi dayîke mi xeylêk rastê şîdetê pîyê ameyîne. Xêrcê ke sebebêk bibo, dayîne dayîke mi ro. Nêheqî û zulm mi rê seke îşkeceyêk ameyîne. Mîyanê tutanê dayîk û pîyê xo de tewr zaf mi sere wedaritene. Terso ke do bido mi ro estbi la no nêbîne sebeb ke ez vinderî. Ez ameya zewicnayîş û no zewac mi rê sey xelasî bi. La çi heyf qet sey fikrê mi nêbi."

	 

	'Ez sey cehenemî de bî'

	 

	Selma dewam de wina vat: "Wexto ke ez zewcîyaya mi vat, ez o şîdet ra bixelîsyî. La roja ewil ra zewac mi rê bibê cehenem. Her kes cîya bi, xerîb bi. Keyeyêk newe mi rê cîya ameyîne. La çîyo ke dayîke mi ciwîya na rey zî ez cuyaya. Mêrdeyê mi, pîyê ey, dayîke ey û heme keyeyê ey bi sebebê rêze dayîne mi ro. Mi bi serran nê îşkence dî. Ez seke mîyanê cehenîmî de bî."

	 

	'Cinî eşkenê sere wedarnê, ez kênaya xo ra musaya'

	 

	Selma ma rê qalê Meclîsê Dayîkê Aşitîye kerd û wina vat: "Mi rê kurdbîyayîş manayêke cîya bi. Heskerdişê min o yewin û peynî yo. Kênaya min a pîle emrê xo yê 18 serrî de tewrê mîyanê refê gerîla bena. Wexto ke tewr bî, ez aciz nêbîya kêfweş bîya. Mi vatêne do hemverê hişmendîyê camêrdan de têkoşîn bikero û çin bikero. Ez hema pê sereberz a. A hêzêko pîl da mi. Cinî eşkayîne wirzê serê lingan û heqê xo bi wazê. Mi Dayîkê Aştîye bi nê rayîrî nas kerd û tewrê înan bîya. Dimayê ke demêk kilm ez seke vervatoxê dayîkan ê Qoserî ameya weçînayîş. Mi omid nêkerdêne ke ez bi eşkî vejîyî û bixebityî, la na yo ez tam kewta mîyan. Mi pêro têkoşînê xo mîyanê Dayîkê Aştîye de dewam kerd."

	 

	'Ez o her wext têkoşîn bikerî'

	 

	Selma heta ewro mîyanê Meclîsê Dayikê Aştîye de bi hawayêke çalak ca girewta. Aye seke Dayîke Aştîye semedê pêro komelan aştîye waşt. Selma hetêk bîn ra zî nexşan viraznena û resiman xêz kena. Selma tewr peyîn wina vat: "Têkoşîn mi rê rayîrê serkewtiş û nîşaneyê azadîye yo. Ez sekecinîyêka kurd hemverê hişmendîyê camêrdan û hemverê hişmendîyê heme serdestan têkoşînî pîroz vînena û ez o têkoşîn bikerî. Ganî pêro cinî zî omidê xo vinî nêkerê."