Pakîzeya ke keyeyê ci ame veşnayene: Nê dejî nînê xovîrrakerdiş   

2021-03-14 09:28:28


	 

	COLEMÊRG - Qedexeyê tebervejîyayîşê kuçeyan ê Geverî ke 79 rojan dewam kerd de, yew kesa ke keyeyê aye ame veşnayîş Pakîze Işik a. Pakîze nika bi keyeyêke eynî qeza dir cuya xo dewam kena. Pakîze vat, keyeyê ke ameyê veşnayîş, xemê înan de nîyo la hema zî boya goyî her kuçe ra yena.

	 

	Mabêne 2015-2016 de xeylêk şaristanî xoverdayîşê îdarekerdişê xoser dayî dest pêkerdene û nê dir zî şarê Kurdî hemverê hêrişan xover dayî. Nînan ra yew zî Geverê Colemêrgî bi. Qezaya Melîsa Demokratîkî ya Geverî 1ê Sibata 2016 de awankerdiş deklere kerd û bi nê dir qedexeyî dest pêkerdî. 13ê Adara 2015 de xoverdayîşê îdarekarîyê xoser ame îlankerdene û nê dir zî qedexeyê tebervejîyayîşê kuçeyan ame kerdene û 79 rojan dewam kerd. Qedexeyan de bi seyan kesî ameyî qetilkerdene, keyeyî ameyî veşnayîş û welatijî nêeşkayî keyeyê xo ra vejîyê. Hîn welatijan koç kerdî. Pakîze Işik zî nînan ra yew bî.

	 

	'Ê cenazeyê ke erd de bî canê mi veşnayene'

	 

	Pakîze dîyar kerd ke bi zêdebîyayîşê pêrodayîşan dir keyeyê xo dir koçê Şemzînanî yê Colemêrgî kerdê û seba ekonomî mecbûr mendê înşatêke de bimanê û vat: "Qedexeyan de zaf zêde topî ameyîne eştiş. Keyeyê ma veşa bi, eşyayê ma salone de veşnabî. Wextê vengê topan ameyîne, merdimê ke ameyîne qetilkerdiş canê ma dejnayîne. Televîzyonan de ma dîne ke keyeyî yenê bombavarankerdiş û nê dir canê ma veşayîne. Ma nêeşkayîne çîyêk bikerê. Cenaze kuçeyan de mendêne. Pîsîng û kutikî şîne ser. Ê cenazeyê kuçeyan de canê ma veşnayîne."

	 

	Pakîze wina dewam kerd: "Dimayê qedexeyî ma agêrayî qeza. Keyeyê mi veşa bi. Tutê mi qij bî. Ez nişta ro û bermaya. Ne ceyran estbi û ne zî awe. Seba rewşa ekonomî ma nêeşkayîne şêrê cayêke bîn. Ma jeneratorêk dî ke ma keye şut, kirêç kerd. Ma di hewteyî mendî. Ne berî ne zî paca bî. Dêsê keyeyî rijyayî bî. Tespîtêko kêm xesar dayî keye. Mi bi hetkarîya cîranan esasê keyeyî eşt. 5 serrî yo hema o esas sey xo yo."

	 

	'Ma muracatê TOKî nêkerd'

	 

	Pakîze dîyar kerd ke bi keyeyêk dir banêk de mendê û vat: "Ma muracatê TOKÎ zî nêkerd. Sebebê nê zî oyo ke şarî ra pereyê awanî yenê girewtiş."

	 

	'Serrî derbaz bibê zî no dej nîno xovîrrakerdiş'

	 

	Pakîze tewr peyîn wina vat: "Ma Gever de gêrenê, hema zî boya gonî her kuçe ra yena. Hema aqûbetê bi desan kesî dîyar nîyo. Hema zî wexto ke ma şinê kuçe, nasnameyê ma ma ra gênê. Her ca de panzerî estê. Ma serê herra xo de rehet nêkenê. Şandînan ma nêeşkenê vejîyê teber. Tewr girîng zî hema boya gonî kuçeyan ra yena. Ban xemê ma de nêbi. Semedo ke cesedî boye nêdê dolaba qeşayî de ameyîne nimtene. Serrî zî derbaz bê nê dejî do nêrê xovîrrakerdiş."