6 serrî yo cenazeya Zeydan Yanar nêameya vînayene  

2021-03-12 15:33:10


	 

	 

	COLEMÊRG - Cenazeya Zeydan Yanaro ke xoverdayîşê îdarekarîyê xoserî yê Geverî de dinyaya xo bedilnabi 6 serrî yo nîna vînayene. Pêro hewldayîşê keyeyî bê netîce mend û dayîka ey Sabîha Yanar dîyar kerd ke cenazeya lajê ey binê awanîyê Geverî de ya û waşt ke ganî cenazeya lajê aye bêra vînayene.

	 

	Qezaya Geverî ya Colemêrgî de 13ê Adara 2015 de hetê Meclîsê Komelê Demokratîkî ra îdarekarîyê xoser ame îlankerdene. Dimayê îlankerdişê îdarekarîyê xoser, pêwa ke 6 serrî derbaz bîyo zî çîyê ke ameyê ciwîyayîş taze yê. Sîvîlê ke ameyî qetilkerdene, nuştişê cinsperestî, keyeyê ke ameyî veşnayîş û rijnayîş çîyo tewr girîng zî cezaneyê ke nêameyê vînayene. Bi hezaran ciwan û cinîyî vera hêrişê hemverê herra xo pawitişê meşrû erdî û bi îmkananê xo pawitiş kerdî. Dimayê pêrodayîşê bi desan ciwanan ameyî têhet û Yewîneyê Pawitişê Sîvîl (YPS) awan kerdî û hêrişê hemverê herra xo vatî êdî bes o. Nînan ra yew zî Zeydan Yanaro 18 serre bi.

	 

	'5 serrî yo mi cenazeya lajê xo nêdîya'

	 

	Sabîha Yanar ke dimayê îlankerdişê îdarekarîyê xoser şî Colemêrg û vat Zeydan Gever de mendo û wina vat: "Zeydan seba pawitişî serê herra xo de mendo. Dimayê qedexeyî 4 rojî dima ma zanayîş girewt ke Zeydanî dinyaya xo bedilnayo. La 5 serrî yo ma cenazeya ey nêdîya. Eke merdo wa vajê, eke cuyeno wa vajê. 5 serrî yo ma hema nêdîyo. O wext 18 serre bi. Tewrê YPS bibê ma ra nêvatêne. Dimayê ke ma zanayîş girewt ke şehîd kewto, ma înan ra vat, la vatî lajê to nêmerdo. Ez hema zî lajê xo gêrena. Ez vana belkî do rojêke bêro. Çimê mi rayîrê ey de yo. Dimayê qedexeyî ez agêraya Gever. Keyeyê mi amebi veşnayîş. Tu çîyêk nêame verê çimanê mi. Tena çimê mi lajê mi de bi."

	 

	'Ez bawer kena ke do lajê mi vejîyo û bêro'

	 

	Sabîha dewam de wina vat: "Derheqê ciwîyayîşê Zeydanî de her wext zanayîş yeno. Yê ke Gever de dinyaya xo bedilnabî, cenazeya înan berdibî Erzirom. Ez şîya Erzirom. Ez şîya morg. La çîyêk aîdê lajê mi çinbi. Mi tu rêçêke nêdî. Mi waşt ke DNA bidî, la dozgerî destûr nêda û nameyê mi nêgirewt. Selahîyetdaran vatêne ke eke ma bivînê ma do zanayîş bidê. Ez hema zî bawer kena ke lajê mi do cayêk ra vejîyo û bêro. Mi waşt gonî bidî la dozgerî destûr nêda. Tena waştişê mi no yo, eke lajê mi kişti zî wa vajê. Eke ciwîyeno wa vajê ciwîyeno. Ha keweno serra 6ine. Eke rojêke cenazaya lajê mi bêro vînayîş zî wa bi poşetêke nêarê, do canê mi zaf bidejo."

	 

	'Lajê mi binê awanîyan de yo'

	 

	Sabîha ke tew peyîn wina vat: "Pêro hewldayîşî veng vejîyayî, bênetîce mendî. Lajê mi hema Gever de binê awanîyan de yo. Ez zana lajê mi binê na herre de yo, la ez nêzana ça de yo. Lajê min o bêkes binê awanîyan de yo. Wa ganî lajê mi bivînê."