'Seba ke nêvat ez poşmana, cezaya ci nêfînayî war 

2021-03-09 09:50:23


	 

	 

	AMED - Helîn Yapici, dewaya Sûrî ra ameyîne muhakemekerdene. Dozgerî derheqê Helîne de mutala amade kerd de 'cezaya muebetê giran’ waşt û bi baheneyê ke poşman nêbîya zî vat, wa ceza nêra vistene.

	 

	Helîn Yapici qedexeyê tebervejîyayîşê kuçeyan yê Sûrê Amedî de asê mendebî û wextê tahlîyeyan de amebî vetiş. Derheqê Helîne de bi îdiayê ‘yewîye dewlete xirakerdiş' û 'endemîya rêxistine' de dewa ame akerdene û 11in roniştişê dewa de dozgerî mutalayê xo da.

	 

	Dozgerî muebet waşt

	 

	Mutalayê ke mercîyê îdiayî da derheqê Helînê de bi sebebê ‘yewîya dewlete xirakerdiş’ û ‘teşebuskerdişê kiştişê kesêke wezîfeyê selahîyetdarî kerdêne' de cezaya muebetî ya giran ame waştene. Sewbîna mutalayî de ame vatene ke Helîne îdeolojîyê ‘rêxistina çekdarî’ esas gêna û dimayê îlankerdişê îdarekerdişê xoser ê Sûrê Amedî, pêwa endamê rêxistine bîne bîya, xendekî kendê û mewzîyan de nobeta çekdarî girewta û hemverê hêzê asayîşî çalakîya hêrişê çekdarî kerda. Sewbîna ame vatene ke prosesê muhakemekerdişî de Helîne poşmanîya xo nêarda ziwan, qerarê dewamkerdişê tepiştişê aye ame waştene.

	 

	‘Îfadeyan de nakokî esto'

	 

	Helîne dîyar kerd belgeyê ke nameyê aye ci de derbas benê estê û vat: "Ê belgeyan de derheqê mi de vanê ke ez 10ê Hezîrana 2015 de tewrê rêxistine bîya. Mektubêke bîn de zî vano 15 hezîrane. Canan Ceylan zî vat ke Gulana 2015 de tewrê rêxistine bîya. Rîpelêk defterê notî ra ameyo tirakerdiş esto. Ûca de zî nuseno ke 10ê êlule 2015ine yo. Ez Adara 2016 de ameya tepiştene. Bi qaso ke ez fam kena, belgeyan de zî îfadeyê şahidan de zî nakokî û têmîyanê esto. Ez wazena nê bêrê kontrolkerdene. Canan Ceylan bi israr vana mi menga gulane de merkezê awanî de dîya. Ez hezîrana 2015 de wezîfedarê sindoqe bîya. Ez menga Gulane de unîversîta de di rey kewta îmtihan. Ez wazena derheqê mutalayî de bi avûkata xo dir bêra têhet."

	 

	'Nê tarîxan de muwekîla mi Erzirom de bî'

	 

	Avûkata Helîne, Cemîle Turhalli Balsak, vat mimkin nîyo pawitiş bikerê, ganî delîlî bêrê komkerdiş û vat, ê do waştişê tahkîkatê tevsî bikerê. Cemîle dewam de wina vat: "Canan Ceylan şahid a la îfadeyê aye bi pêro delîlan dir yenê pûçkerdiş. Goreyê îdiayî menga Gulane de muvekîla mi Amed de bîya. La muvekîla mi beyan kerdibi ke o tarîx de Erzirom de bîya. Ganî dadgehe nê cigêrayîş bikera. Muvekîla mi muşahîd nêbî, bi hawayêke fermî wezîfedara sindoqe bîya. Na belge zî ifadeyê şahidêke, tewr xurt o. Muvekîla mi 7ê Hezîrana 2015 de Erzirom de wezîfedarê sindoqe ya. Îfadeyê Canan Ceylan zî bê bingehê.”

	 

	Cemîle tewr peyîn qiseykerdişê xo de vat, muvekîla aye 5 serrî bi bahaneyê ‘qestî kiştişê kesî’ û ‘xirakerdişê yewîya dewlete’ tepişte yena muhakemekerdene û vat: "Verê 2004 de Desturê Bingehîn de zî TCKyî de zî verbayê nê daliqnayîş o. Muvekîla mi bi tehdîdêke giranî yê ceza dir rî bi rî ya. Ganî heqê pawitişê muvekîle nêro sînorkerdene. Seke ma xeylêk rey vato, maddeyê 5ine yê AÎHSî de şertê tepiştişî yenê qalkerdiş. 19ine maddeyê Desturê Bingeyîn de zî zaf zelal o. Ma vanê ke tu dadgeh goreyê şertî destûrê Bingeyîn û AÎHS de tênêgeyreno. Nê babetan de şertê tepiştişî ameyê dîyarkerdene."

	 

	Cemîle dîyar kerd ke derheqê bi seyan kesî de goreyê usulê teşhîs ameyo kerdene û yê ke nê teşhîs kerdê zî kesê ke poşmanî ra feyde girewtê yê. Cemîle dîyar kerd ke Canan Ceylan na rewşe rê nimûneya û vat, do gerreyê xo HSKyî rê bikera û heyetê dadgehe red kerdo.

	 

	Heyetê dadgehe qerarê dewamkedişê tepiştişê Helîne da û roniştişo bîn taloqê 11ê Adare kerd