Dikano ke ci de xebityayîne, dewr girewte

2021-03-11 09:07:40


	 

	Aynur Aslan

	 

	AGIRÎ - Perîhan Yaşmîn ke emrê qij de ameye zewicnayîş û her wext rastê şîdetê sîstematîk ameye, dimayê ke zewacê xo peynî kerd newe ra dest bi têkoşînê cuye kerde. Perîhane seke karkerêke dikanê terzîxane dest bi kar kerde û dima ra dikan girewt. Perîhane dîyar kerd ke ganî cinî xo nêerzê planê diyîne.

	 

	Welat de problemo tewr girîng, zewacê emrê qij de yê. Bi zewacê emrê qij de wazenê cinîyan hepsê keyeyî bikerê û netîceyê nê de cinî yan yenê qetilkerdene yan zî îtîraz kenê ke wazenê cuyêka bê şîdet bimûnê. Perîhane Yaşmîn dîyar kerd ke ê her wext ya sere tewênenê yan zî seba tersî çîyêk bîn nêkenê. Perîhane 15 serrî de hetê keyeyê xo rê yena zewicnayîş.

	 

	'Şîdetê ekonomî dest pêkerd'

	 

	Perîhane 16 serrî de zî bena dayîke û wina vana: "14 serrî zewicnaye menda. 14 serrê mi bi dejê giran derbaz bî. Şîdetê ekonomî hemverê mi estbi. Mêrde û keyeyê nêverdayîne ez şêrî kurs. Seba ke ez pere mêrdeyê xo ra nêgîrî, mi waya xo vera xo erşawit kurs û mi vat, çîyêk ti musaya mi rê ramojne. Waya mi wina mi rê ramojna. Mi zîwaya xo nexş û deştiş musna. Mi pîyê xo ra makîneyê deştişî waşt. Pîyê mi girewt. Mêrdeyê mi xebityayîne, pere nêdayîne mi. Mi zî veng nêkerdêne. Mi waşt ez zî çîyêk bikerî la na rey zî nêverdayî ez wina bikerî."

	 

	Dikan dewr girewt

	 

	Perîhane dewam de wina vat: "Roja ke ci ra visyaya, tena nanê min ê tenûre estbi. Pereyê mi çinbi. Bi hetkarîya embazêke mi awanîya ci de keye dî. O wext keyeyê mi qij bi. Mi makîneyê deştişî da odayêke xo. Mi dest bi deştişî kerd. A mabêne de ez kar geyraya. Mi dikanêke deştişî de kar dî. Mi ûca de dest bi kar kerd. Dima ra mi dikan girewt û karê xo dewam kerd."

	 

	'Merdimî biwazê eşkenê her çî bikerê'

	 

	Perîhane vat, wextê ke zewicnaye bîya probleman ser o nêvinderta la poşman bîya û vat: "Ê serrê min ê vindîbîyaye yê. Cinî zaf fedekarî kenê. La dî ke çîyêk nêvuryeno, wa fek ci ra vera bido. Wa cuya xo nêerzê planê diyîne. Ganî cinî erje bidê xo. Cinî biwazê eşkenê her çî bikerê. Çimeyê cuya min kênayê min ê. Derûdorê mi vatêne, '6 kênayê to estê, cuye hende asan nîya. Madem problem estbi, to çira hende tutî viraştî' la ez qet wina nêfikrîyaya. Kênayê mi zaf bi erj ê. Başo ke mi kênayî ardî dinya."

	 

	Perîhane tewr peyîn dîyar kerd ke cinî her ware de xurt ê, eşkenê her çî bikerê û vat: "Camêrdî serkewtişê cinîyan hezm nêkenê. Her wext teda serê cinîyan de estbî. La kapasîtayê cinîyan ke eşkena xeylêk çîyê weş bikera estê. La teda cinîyan rê yeno kerdene, yenê astengkerdene.”