Cinîyê ke tewrê mîtîngê Amedî bî: Ma do her wext bi rengê xo wareyan de bê

2021-03-08 16:17:20


	 

	 

	 

	AMED - Cinîyê ke tewrê mîtîngê 8ê Adare ya Amedî bî dîyar kerdî ke ê do her wext bi rengê xo meydanan de bê û vatî, tena 8ê Adare de ney, ganî her roje bi coşê 8ê Adare bêro derbazkerdene.

	 

	Bi rayberîya Platformêcinîyan ê  Dîcle Amedî û Meclîsê Cinîyan ê Partîya Demokratîke ya Şaran (HDP) ewro Amed de bi sloganê, "Ma vera qirkerdişê cinîyan; cuye, vera tecrîdî, azadî pawenê" Meydanê Îstasyonî yê Amedî de mîtîng organîze kerdî. Xeylêk cinî bi cil û belganê xo yê kurdî vejîyayî meydanan û sloganê "Cinî ciwîyayîş azadî" berz kerdî. Cinîyê ke tewrê mitîngî bî ajansê ma rê qisey kerdî.

	 

	'Tena 8ê Adare de ney her roje çalakî'

	 

	Narîn Sevîm hîsê xo yê derheqê ewro de wina ard ziwan: Sere de 8ê Adare pêro cinîyan rê pîroz kena. Seba nê zî zaf kelecan a. Ma pêro cinî pabeyê 8ê Adarî bî. Ganî tena 8ê Adare ney her roje çalakî û bernameyê bi nê hawayî bêrê kerdene. Coş û heyecanê cinîyan seba ewro hêz da mi û ganî her wext wina dewam bikero."

	 

	'Wa cinî her wext bi rengê xo meydanan de bê'

	 

	Mîhraç Dag zî wina vat: "Ma wazenê ke her roje cinî bi rengê xo wareyan de bê. Seba ke camêrd û dewlete her wext cinîyan rê şîdet kenê. Ganî cinî êdî vajê bes o. Mi seba cinîyê ke ameyê qetilkerdiş waşt şîîîrêke binusî û biwanî la seba ke polîsan destûr nêda qeleme xo dir bîyarî zere, waştişê xo mi bi ca nêard. Ganî ma cinî seba nêrê kiştiş her wext mîyanê têkoşîn de bê. 8ê Adare pêro cinîyan rê pîroz bo."

	 

	'Hemverê cinîyan tu hêz nêeşkeno vindero'

	 

	Vasfîye Şahîn zî wina vat: "Her ca de cinîyan rê koletî û bindestî yeno ferzkerdene. La cinî ne koleyê û ganî bindestî qebul nêkerê. Wa êdî sere wedarnê. Camêrdî vanê qey xêrcê înan hêzêk bîn çin o, la wa bizanê ke hemverê cinîyan tu hêz nêeşkeno vindero. Biciwîyo 8ê Adare."

	 

	Mîtîng bi coşêk pîl û bi kelecan dewam keno.