Cinîyê tepişteyî seba 8ê Adare mesaj erşawitî

2021-03-08 15:07:21


	 

	MERKEZÊ XEBERAN - Tepişteyanê dewaya PKK û PAJKî seba 8ê Adare eşkerayî dayî û vatî: "Cinîyê ke bi rengêke rêxistinî û xopawitîşî xover danê, têkoşîn kenê do qetî bi ser kewê."

	 

	Tepişteyanê cinîyan ê dewaya PKK û PAJKî bi wesîleya 8ê Adare Roja Cinîyanê Kedkaran ê Dinya mesajêko nuştekî erşawit.

	 

	Mesajê tepişteyan wina yo: “Ma sey cinîyanê PKK û PAJKî zîndanan de bi hawayêkê pîlî xo ver danê û têkoşîn kenê bi wesîleya 8ê Adare Roja Cinîyanê Kedkaran ê Dinya pê heskerdişî selam kenê. Na roje bi keda bêhempa ya cinîyan ê kurdan newe ra werişte payan ser û pê sebrêkê pîlî resaye nê rojan.

	 

	Sîstem û hîşmendîya kapîtalîzmî pê çimeyê ’emanetî’ ewnîyeno cinîyan rê, cinîyan bêîrade keno û verê fikranê cinîyan gêno. Roja ke na hîşmendî binî ra bêra wedaritene hînî azadî do bêra. Cinîyan tim xîret kerd ke vera neheqîyan têkoşîn bikerê. Xeyrê keda nê cinîyan û teqîbkerdoxanê înan ra 8ê Adare sey roja cinîyan ê kedkaran ame îlankerdene.

	 

	Patrîarka her ca de bi xurtî hêrişê cinîyan keno la cinîyî zî vera ci xoverdayîşêkê xurtî anê ca, pê têkoşînê xo vera hîşmendîya pederşahîye xopawitişê xo afernenê û rêxistinîya xo kenê pîlêr. Rayberîya ma azadîya komelî pê azadîya cinîyan girê daye. Vera têkoşînê têxistinbîyayeyî yê cinîyan ê kurdan hêrişê qirkerdişî zêdîyayî. Tepişîyayîşê dadîya 79 serre mojneno ke tersêko senî kewto zerrîya Erdoganî, sîstemo faşîzm senî qels bîyo û bêhêz bîyo.

	 

	Hêzê AKP-MHPyî yo faşîst-qirkerd seba ke hêzê ci ra terseno Rayberîya ma tecrîd keno û giranîye dano polîtîkayanê qirkerdişê cinîyan û komelî. Seba ke têkoşînê ma yê azadîya cinîyan bibo pîlêr û faşîzm qelsêr bibo çarçewa hemleyanê ‘Tecrîd, faşîzm, qirkerdişî rê bes o; wext wextê azadîye yo’ û ‘Vera qirkerdişê cinîyan ma cinîya azade û komelê azadî bipawê’ de ma do çalakîyanê xo dewam bikerê. Pê xoverdayîşê xo wexto ke ma tecrîd biqedînê, faşîzm birijnê û azadîya Rayberîya xo bîyarê ca hînî ma do bibê embazê Rayberîye.”

	 

	Mesaj de şexsê Bêrîtane, Zîlane, Leyla, Sara, Sema, Aynûr, Kurdê, Aytene, Zehra, Medya û Yonca de şehîdanê têkoşînê azadîye bi minetdarî ameyî yadkerdene û 8ê Adare Roja Cinîyan ê Kedkaran a Dinya ameye fîrazkerdene.

	 

	Tewr peynî de 8ê Adare yê dadîyan û cinîyan ê Kurdîstanî ame fîrazkerdene û wina ame vatene: ”Seba ke seserra 21. ma bikerê seserra cinîyan îdîa û hêvîya ma pîl û xurt ê. Serkewtiş her tim ê xoverdayoxan o.”