Terzîye Bîrgule: Ma do meydanan de wayîrê keda xo vejîyê 

2021-03-07 09:34:03


	 

	 

	Rojda Aydin

	 

	ŞIRNEX - Bîrgula ke bi serran o terzîtî kena, dîyar kerd ke her çiqas eleqeyê deştişê cil û belgan seba krîzê ekonomî û pandemî kêm bîyo zî cinî, bi coş û heyecanêke pîl amadekerîyê pêşwazîkerdişê 8ê Adare kenê. Bîrgule, dîyar kerd ke do meydanan de wayîrê keda xo vejîyê.

	 

	8ê Adara 1857 de şaristanê New-Yorkî de cinîyê ke fabrîqayê tekstîl de xebityayîne, seba bidestkerdişê heqanê xo yê têduştî çalakî kerdibî û netîce de rastê hêrişî ameyî û 129 cinî seba waştişê heqê xo fabrîqe de ameyî veşnayîş. Serra 1910 de Danîmarka de konferansê Sosyalîst Enternasyonel yê Cinîyan ame kerdene û bi destpêkerdişê têkoşînê cinîyê Amerîka 8ê Adare têkoşînê cinîyê Amerîkayijî 8ê Adare seke Roja Cinîyê Kedkar yê Dinya ame îlankerdene. Serra 1977 de zî Neteweyê Yewbîyaye 8ê Adare seba pêro cinîyan, a roje seke Roja Cinîyan ê Dinya bi fermî qebul kerd.

	 

	Herême û Tirkîya de tevgerê cinîyan zend û bendê xo girêdayî û amadekarîyê pêşwazîkerdişê 8ê Adare kenê. Emsar Tevgerê Cinîyan ê Azadan bi sloganê, "Ma vera qirkerdişê cinîyan cuye, vera tecrîdî azadî pawenê" 1ê adare de startê çalakîyan ame dayene. Nê wextî de xeylê xo karê terzîyan zêde beno. Xeylêk cinî seba 8ê Adare verê xo danê terzîxanan. La pandemî û krîzê ekonomî senî tesîrê heme wareyan kerd, wareyê terzîtîye zî kerd. çiqas muşterî kêm bê zî bi kelecan cil û belg yenê deştene. Yew nê terzîyan ra Bîrgûl Îslamogluya 42 serrî ya.

	 

	'Pêro kar serê milê mi de yo'

	 

	Bîrgula ke verê karê deştişî, tentene viraştêne û rotêne û pê debara xo kerdêne, wina qiseykerdişê xo dest pêkerd: "Mi tentene viraştêne û rotene wina debara xo kerdêne. La dima ra mi dest bi karê deştişî kerd. 2009 ra ez nê karî kena. Kerê deştişî her çiqas zehmet bo zî la ez ci ra hes kena. Seba ke cilê herême, parçeyêk kulturê ma yo. Ma bi nê karî wayîrê kulturê xo vejênê. Sewbîna bi nê debara xo kena. Nê keyeyî de tena ez xebityena. Seba ke kar çin o, mêrdeyê mi nêxebityeno. Pêro kar û bar serê milê mi de yo."

	 

	‘Pandemî karê ma rê bi asteng'

	 

	Bîrgule, bale ant serê vîrusî û vat: "Verê pandemî karê ma zaf baş bi. Qezencê ma baş bi. La nika seba pandemî dawet û mîtîngî nînê kerdene. Seba nê cinî cilanê herême xo rê nêderznenê û ê kanan danê xo ra. Cinî her serre 8ê Adare û Newroze de ameyîne cilanê mintaqa deştêne. Emsar seba 8ê Adare cinî nêameyî û cilan nêdayî deştiş. Ma verê reng bi reng cilanê herême deştêne û ma verê xo dayîne meydanê mîtîngî. Omidê ma o yo ke ma reyna seke verê 8ê Adare pîroz bikerê."

	 

	'Ma her wext wareyan de bê'

	 

	Bîrgule tewr peyîn win avat: "Ma seke cinî, her wext vera sîstemê pederşahî têkoşîn kenê. Ma do wayîrê keda xo vejîyê û têkoşîn bikerê. Ma emsar 8ê Adare de pêwa her çî ma do vengê xo berz bikerê. Ez veng dana pêro cinîyan ke wa 8ê Adare de wareyan de bê. Ma wazenê her wareyê cuye de paştdayîşê seba cinîyan bêro dayene. Wa peynîya şîdet û qirkerdişan bêro. We kerdoxî bêrê cezakerdene. Wa cinî vera zulmî sere wedarnê. Ma cuyêka azad û têduşt wazenê."