'Tepişteyê sîyasîyan rê îşkence yeno kerdene' 

2021-03-07 09:32:21


	 

	 

	MÊRDÎN - Dayîka Serhat Yildirimo ke Zîndanê Osmaniye yê Turkoglu de yeno tepiştene Sultan Yildirim dîyar kerd ke îşkence û tecrîd Serhato ke gervê vêşanîye de yo, yeno kerdene û wina vat: "Êdî sebra ma qedîya. Tutê ma hemverê tecrîdî kewenê grevê vêşanîye, na rey seba ke kewtê grev rastê nêzdîbîyayîşê lêşînan yenê. Wa her kes berpirsyarîyê xo bîyaro ca û vengê xo seba nê berz bikero."

	 

	Serhat Yildirim (24) ke Zîndanê Osmanîye yê Turkoglu de yeno tepiştene, çalakgero ke hemverê tecrîdî û binpaykerdişê heqê zîndanan de dest bi grevê vêşanîye kerdo yo. Qiseykerdişê ke bi rayîrê telefonî keyeyê xo dir kerdo; seba ke kewtê grev rastê şîdet, tecrîdo girankerde û nêzdîbîyayîşê şaşî yenê. Dayîka ey Sultane Yildirim zî vat, reya ewil o ke Serhat derheqê problemê ke cuyenê de zanayîş dano înan û vat, Serhatî vengdayîşê berzkerdişê vengê grevê vêşanîye kerd.

	 

	'Tecrîdêko her rey ra tewr tehlukeyîn esto'

	 

	Keyeyê Serhatî çend rey şî pêvînayîşê ey û demêk nêzdî de zî bi rayîrê telefonî kewtî têkilî. Nê pêvînayîşan de Serhat wina qal kerdo: "Rewşa her rey ra tewr tehlukeyîn a. Tecrîd û şîdetêk her rey serê ma de dewam kerdêne estbi. Xora amancê ma yê kewtişê grevê vêşanîye sere de tecrîd û nê nêheqîyê ke zîndanan de yenê ciwîyayîş bî. La vera ke bibê cewabê tepişteyan û peynîya grevan bîyarê, bi tecrîdo girankerde cewab danê çalakîya ma. Çalakgerê grevê vêşanîye rê cezaya disiplînî yena dayene. Her roje teda ma rê yeno kerdene, şîdet ma rê kenê. Grev de awa ke danê nîna şimitiş. Gardîyanê ke yenê koxuşê ma de cigêrayîş kenê, gardîyanê her wextî nîyê. Komêke taybet yena. Sewbîna ma hucreyan de embazanê xo ra yenê dûrvistiş. Nika rewşa înan senîn a ma nêzanê."

	 

	'Serhatî vengdayîşê pîlkerdişê têkoşînî kerd'

	 

	Serhatî dewamê qiseykerdişê xo de veng da şarî û vat: "Ewro a roja ke ma paştdayîş bidê yewbînan. Ganî kes xo bêveng nêkero. Sîyasetmedaran ra heta pêro ferdê komelî lazim o vengê xo berz bikerê. Lazim o wayîrê têkoşînê ma vejîyê. Eke serkewtişêk estbo, do pîya mimkin bo. Ganî ma bi moral bê.”

	 

	‘Tecrîd serê înan de giran kerdê'

	 

	Dayîka Serhatî, Sultane Yildirim zî wina qisey kerde: "Bi 6 serrî yo lajê mi ameyo tepiştiş û 30 serrî ceza dayê ci. Xora seba ma kurdan nêzdîbîyayîşêk winasî esto; eke ti kurd bê to 'tepiştiş heq kerdo' tepişnenê û nêverdenê boya înan vejîyo. Bi tecrîd înan teng kenê. Bi 6 serrî yo ez şina pêvînayîşê lajê xo û ci dir qisey kena. Mi reyke zî nêdîyo ke vato, rewşa ma baş nîya. Tim ma rê bîne moral. Nika bi eynî rengî moral dano ma. Rewşa asanî de ma bi telefon 10 deqeyan qisey kerdêne, la na rey bi qasê 2 deqeyan qisey kerd û ey telefon pada. No ma zaf aciz kerd. Zîndanan de tecrîd serê înan de giran kerdê."

	 

	'Ganî ma veng bidê vengê tepişteyan'

	 

	Sultane wina dewam kerd: "Nika ma heta ke şinê pêvînayîşan, ma bi desan rey derbaz benê û yenê temaşekerdiş. Ê rehîne yê, ûca zî înan ra tersenê. Sebebê hende tecrîd û tehdîdî no yo. Lazim o ma pêro vera nê nêzdîbîyayîşan wirzê serê lingan. Seba tecrîd û binpaykerdişê heqan peynî bibo, ganî ma paştdayîş bidê înan. Bi no rengî ma heme bar danê serê milê înan û no zî çareserî xo dir nêano."

	 

	'Tecrîd sûcê merdimayî yo'

	 

	Sultane tewr peyîn wina vat: "Tecrîd sucê merdimayî yo. Ma her tewir teda û şîdet şermezar kenê û qebul nêkenê. Tutê ma yenê îşkencekerdiş. Ma dayîkî êdî hew qedênenê. Sebrê ma nêmendo. Ez vernê de veng dana sîyasetmendaran, dima ra selahîyetdaran û heme dayîkan ez vana wa veng bidê vengê tepişteyan. Wa êdî bêveng nêmanê. Bêvengî do biba sebebê merdişan."