'Destê dayîkan de çek çin o ê tena aştî wazenê' 

2021-03-06 09:10:33


	 

	Sema Çaglak

	 

	AMED - Cinîyan, reaksîyon vera operasyonê MEBYA-DERî û destbendkerdişê xeylêk kesê ke endamê Meclîsê Dayîkê Aştîye zî mîyan de yê, da. Cinîyan dîyar kerd ke destê dayîkan de tu çek çin o û tena dewaya aştîye kenê.

	 

	Polîsan, 27ê Sibate de eştibi Komeleya Kultur, Yewîye, Paştdayîş û Hetkarîya bi Keyeyê Merdimanê xo Dergûşê Şaristanî de Vindî Kerdî (MEBYA-DER) û xeylêk keyan ser. Netîce de de Dayîkê Aştîye Hatun Yildiz (72) û Meryem Soylu (79) zî mîyan de bi desan kesî ameybî destbendkerdene. 28ê Sibate de zî Hatun Yildiz û Meryem Soylû yê ke destbend kerdibî, ameyî tepiştene. Sewbîna polîsan 3ê Adare de reya diyîn vera MEBYA-DERî de operasyon kerd û sereştiş de îdarekarê komale Şehmûs Turk (81), Yildiz Damla, Ayşe Tutmaz, Halîme Topûz, Aysel Pehlîvan û Saît Borta zî mîyan de xeylêk kesî destbend kerdî.

	 

	Cinîyan tepiştişê dayîkan û hêrişê serê MEBYA -DERî şermezar kerdî û waştî ke bilez dayîkê ke ameyê tepiştene, bêrê veradayîş.

	 

	'Tepiştişê dayîkan rewşêka şermezarkerdişî ya'

	 

	Endama Meclîsê Dayîkê Aştîye Vasfîye Yîgît dîyar kerd ke dayîkî tena seba aştîye têkoşîn kenê û wina vat: "Tepiştişê dayîkan rewşêka şermezarkerdişî ya. Ma bi rastî zî ma zaf kewtî ver û xemgîn ê. Ez sey dayîkêke aştîye, tepiştişan şermezar kena. Êdî bes o, wa hêrişê dayîkan nêkerê. Dayîkî tena aştîye wazenê. Her ke dayîkî seba aştîye têkoşîn kenê, teda û zulmê serê înan zêde beno. Ma wazenê êdî seba aştî û hizûr game bêro eştene. Dayîkê ke ameyî tepiştene, wa ganî serbest bêrê veradayîş. Ma zî dayîk ê û ma tepiştiş xo rê heqaretêk vînenê. Wa zulmê serê dayîkan peynî bibo."

	 

	'Dayîkî aştîye wazenê'

	 

	Endama Meclîsê Dayîkê Aştîyê Guler Yuksekbag zî destbendkerdiş û tepiştişê endam û îdarekaranê MEBYA-DERî şermezar kerd û wina vat: "No çî nîno qebulkerdene. Prosesê pandemî de şert û mercê zîndanan werte de yo. Bi tepiştişî, cua di dayîkan kenê tehluke. Tepişteyê edlî serbest ameyî veradayîş. La dayîkê ke emrê înan 70-80 serrî yê kenê zîndan. Wazenê vengê înan bi tepiştiş û kerdişê zîndanan bibirnê. La dayîkê aya û zana yê. Teber de bê zî zere de bê zî vengê înan nîno birnayîş. Destê dayîkan de tu çek çin o. Tena seba tutê înan nêrê kiştiş û seba aştîye têkoşîn danê. YAnî vera şerî vindenê."

	 

	'Wext wextê wayîr vejîyayîşî yo'

	 

	Îdarekara Komeleya Kultur û Paştdayîşê Keyeyê ke Merdimê xo Dergûşê Şaristanî de Vinî Kerdê (MEYA-DER) ê Sêrtî Leyla Ozalp zî qisey kerd û vat: "Ma no şero ke hemverê komelê kurd û dayîkan de yeno kerdene, şermezar kenê. No îqtîdar dayîkanê 70-80 serrîyan ra terseno. Ma tena dewaya aştî, têduştî, demokrasî û heqanê xo kenê. Ma wayîrê komelê xo û merdimanê xo vejênê coka hende hêrişê ma kenê. Vengdayîşê ma pêro komel û dayîkan rê yo, wa ê zî wirzê serê lingan. Dem demê wayîrvejîyayîşê erjê xo yo."