Nebahata ke bi tilîlîye xo yena naskerdiş: Hemverê şîdetî sere wedarna 

2021-03-06 09:08:20


	 

	Rojda Aydin

	 

	ŞIRNEX - Nebahata ke bi serran o bi şîdetî dir rî bi rî menda, tewr peyîn vera şîdetî sere wedarna. Nika keye bi keye gêrena û hîkayeyê cinîyan goşdarî kena û serewedaritişê xo nimûne dana û vengdayîşê xopawitişî hemverê şîdetî kena.

	 

	Vakur ra heta Başûr, Rojhelat ra heta Rojawan cinîyê kurdî hemverê zulm û hişmendîyê pederşahî xo ver dayî û bî rayberê komelî. Xeylêk cinîyê kurdî serê na cografya de tarîx nuştî û bî sembolê têkoşînê azadîya pêro cinîyan. Ma wazenê ewro hîkayeya Nebahat Îşçî bîyarê ziwan. Nebahate seke bi hezaran cinîyê bîn, bi serran o bi şîdetî dir rî bi rî menda û tewr peyîn zî hemverê şîdetî sere wedarnaya. Nebahate hêrs û bêvengîya xo ya bi serran bi tilîlîyan ana ziwan. Mîyanê çalakîyan de zî bi tilîlîyanê xo yena naskerdiş.

	 

	Nebahata ke 40 serrî yo bi eslê xo Meydînê Cizîrê yê Şirnexî ra ya û tutîyêke weş derbaz kerda. Emrê qij de dayîke û pîyê aye qezeya trafîkî de dinyaya xo bedilnenê. Nebahate êdî verê xalê xo de manena. Tutîya ke mîyanê weşî de derbaz bîne, reyke de cuya aye açarêna cehenem. Nebahate 14 serrîya xo de bi zor yena zewicnayîş.

	 

	Nebahate ke qalê hîkayeya xo ya bi dej kena, bihîs bena. Nebahate wina qalê zewicnayîşê xo kerd: "Ez 14 serrîya xo de bi zor ameya zewicnayîş. Ez hema tute bîye û tutê mi virazyayî. Mi o wext zana ke mêrdeyê mi qûmare kay keno. Bi rojan û mengan nêameyîne keye. Rojê ke ameyîne keye zî dayîne mi ro. Ez her roje rastê şîdetê ey ameyîne. Seba ke mêrdeyê mi qûmare kay kerdêne, kes çinbi tutanê mi wey bikero. Ez û 6 tutê xo her wext keye de vêşan mendêne."

	 

	‘Her roja mi bi şîdet derbaz bîne'

	 

	Nebahate seba tutanê xo dest bi kar kerd û wina vat: "Mi goreyê îmkananê xo, dest bi kar kerd. Mi dendikê zebeşan grinayîne û rotêne. Mi bi nê metodî tutê xo pîl kerdî. Roja ke mi qezenc nêkerdêne, tutê mi vêşan mendêne. Mêrdeyê mi êdî çim kerdbi peranêmi, bi şîdet pereyê mi mi ra girewtêne. Her roje deyindarêk ameyîne verê berî." Nebahate, hîkayeya xo wina dewam kerd: "Reyke seba ke mi pere nêda, bi kardî hêrişê mi kerd û ez bi giranî birîndar bîya. Mi berdî nêweşxane, ûca de dimayê îfadeyê mi mêrdeyê mi ame destbendkerdene û dima ra ame veradayîş. Eke cîranî nêresayîn hawarê mi nika ez cuye de nêbîne. Rastî tena mêrdey mi ney, keyeyê mêrdeyê mi zî hêrişê mi kerdêne. Tewr peyîn mi qerar da û ma yewbînan ra cîya bî û ma nika pîya nêciwîyenê."

	 

	Hemverê şîdetî sere wedarna

	 

	Nebahate dewam wina vat: "Dimayê ke ez hemverê şîdetî vejîyaya û mi qerarê xo da û tercîhê xo kerd. Ez serrêke çayxaneyê HDPyê Cizîrî de xebityaya. Dima ra zî ez derbazê beşê pakitî yê şaredarî bîya. Seba ke mi karê pakitî kerdêne, xeylêk kesan yarîye xo bi mi kerdêne. Labelê mi qetî goş nêda vatişê înan. Karê ke camêrdan nêkerdêne, mi kerdêne. Ez seba tutanê xo serê lingan de menda. Mi xo ra her wext vatêne, ez tu wext hemverê zulmî sere nêtewênena."

	 

	'Ma do hemverê şîdetî xo bipawê'

	 

	Nebahate nika bi hawayêk aktîf HDP de xebate kena. Nebahate wina vat: "Wexto ke ma şîne serdayîş keyeyan, ma hîkayeyê cinîyan goşdarî kerdêne. Mi înan ra vatêne, tu wext vera zulmî û şîdetê camêrdan sere nêtewênê û xo ver bidê. Mi têkoşînê xo nimûne dayîne. Sewbîna eke ma cinî bê, ma eşkenê her çî bikerê û hemverê zulmî vinderê. Ganî cinî xo vera şîdetê camêrdan bipawê."

	 

	Bi tilîlîye xo yena naskerdene

	 

	Nebahata ke mîyanê xebatê HDPyî û cinîyan de cayê xo girewt, tewrê pêro çalakî û bernameyan bena. Sewbîna Nebahate çalakîyan de bi tilîlîye xo yena naskerdene. Nehabate qiseykerdişê xo wina qedêna: "Nika ma xebata kampanya Meclîsê Cinîyan ê HDPyî yê 'seba cinîyan edalet' kenê. Sewbîna nika vernîya ma de 8ê Adare esta. Ma kuçe bi kuçe gêrenê û vengdayîşê tewrbîyayîşê çalakîyanê 8ê Adare kenê."