Kampanyaya 'Seferberîyê morî resa amancê xo' 

2021-03-04 09:12:56


	 

	 

	Sema Çaglak - Gulîstan Azak

	 

	AMED - Endama Koordînasyonê Cinîyan ê Ciwanan Kezban Kuday dîyar kerd ke kampanyaya înan "Nika seferberîyê morî" resaya amancê xo û vat: "Bi ruhê cinîyê têkoşer ma do xebata xo bikerê."

	 

	Koordînasyonê Meclîsê Cinîyê Ciwanan ê Partîya Demokratîke ya Şaran (HDP), hemverê şîdetê camêrdan û dewlete 8ê kanûne de kampanyaya bi nameyê “Nika seferberîya morî” dabî destpêkerdene. Çarçewaya kampanyaya xo de xeylêk şaristan û dewan de tewir bi tewir çalakî û atolyeyan organîze kerd. Eynî wextî de tepiştiş, destbendkerdiş, remnayîş, ferzkerdişê ajanî, hêriş û tedayê vera endamê Meclîsê Ciwanan tewr zêde bî. Derheqê babete de endamê Koordînasyonê Meclîsê Ciwanan Kezbane Kuday qisey kerd.

	 

	‘Seferberîyê Morî hetê komelî ra ame pawitene'

	 

	Kezbane destpêkê qiseykerdişê xo de serê kampanyaya înan ya “Seferberîyê morî" de qisey kerd û vat: "Ma çarçewaya kampanyaya xo de îstîsmarê tutan, desteştişê cinîyan, qetilkerdişê cinîyan û tecrîdê serê birêz Abdullah Ocalanî de û tecrîdê serê komelî amanc kerd. Muhtewayê kampanyaya ma pirr a. Ma ewilî hetê hişmendîyê cinîyan û bi rêxistinkerdişî de vindertî. Yanî şerê taybet çi yo, çira bi taybetî serê ciwanan de caardê, ma serê înan de vindertî. Dima ra dewe bi dewe, şaristan bi şaristan ma cinîyan dir ameyî têhet. Kampanyaya ma ya 'Seferberîyê morî' hetê komelî û ciwanan de xeylêk baş ame pêşwazîkerdene. Ma moral û coşêk zaf baş dî û no zî hêz da ma."

	 

	‘Kampanyaya ma resa amancê xo'

	 

	Kezbane dewam de wina vat: "Sewbîna ma bi atolyeyan zî yenê têhet. Atolyeyanê xo de munaqeşeyê seke babetê bêtêduştîyê cinsî yê dinya, şero taybet çi yo, xopawitiş seba çi lazim keno. Beşdarbîyayîşê atolyeyê ma zaf baş dewam kenê. Heta 5ê Adare de şayî, çalakî û bernameyê ma dewam bikerê. 5ê Adare de zî şayîyêke ma girseyî esta. Ma do 8ê Adare de tewir bi tewir bernameyê xo de dewam bikerê. Fînalê kampanya xo zî 8ê Adare de bikerê. Helbet gama ke nê kampanya qedîyayî ma do dest bi kampanyayê neweyan bikerê."

	 

	'Polîtîkayê serrê 90an newe ra gane kenê'

	 

	Kezbane, bale ant serê remnayîşê ciwanan û vat: " Serrê 90an de zî no polîtîka ameyîne kerdene. O wext reyna ciwanê kurdî ameyîne remnayene, ameyîne kiştene û ewro reyna no polîtîka newe ra paytextê Tirkîya de embazê ma yê cinî yenê remnayene. Reyna Amed de embazanê ma rê tehdît yeno kerdene û wazenê bi înan ajantî bikerê kerdiş. Bi no hawa bi rêxistinbîyayîşê ciwanan ê hemverê polîtîkayê şerî yê taybetî wazenê qût bikerê. Ma do bi rijnayîşê faşîzmî dir azadî bi resnê her ca."

	 

	'Ma do nê polîtîkayan veng vejê'

	 

	Kezbane dewam de wina vat: "Ciwanî dînamîtê komelî yê. Ê çiqas serê ciwanan de bêrê zî seba ma çîyêk veng o. Ma do her wext wareyan de bê. Hêzê ma înan rê tehdîdêk o. Tewr zêde cinîyê ciwanî hedef yenê girewtiş. Seba ke tewr zêde cinîyê ciwanî hemverê polîtîkayê îqtîdarî têkoşîn kenê. Gama ke cinî xo nas kerd, wişte serê lingan de o wext dişmin tewr zêde serê cinîyan de yeno. Ma nê çalakîyan de zaf vînenê. Wexto ke eşkerayîyêke hetê cinîyan ra yena dayene, hûmara cinîyan ra hîna zêde polîsî kom benê. Bi no hawa wazenê ke cinîyan bitersnê."

	 

	'Bi ruhê cinîyê têkoşer ma do xebatanê xo bikerê'

	 

	Kezbane veng da cinîyê ciwanan ke şayîye 5ê û 8ê Adare bibê û vat: Ma mîrasê têkoşînê cinîyan ê bi hezar serran o gênê. Ma do bi ruhê Sêve, Pakîze, Leylayan mîrasê cinîyê têkoşer bi kar û xebatanê xo bikerê. Bi no hawa ma do rejîmê AKP-MHPyî dir bi têkoşînê xo bibê cewab. Ma do 5 û 8ê Adare bi coşêko pîl pîroz bikerê."