Ebrû Gunay: Îradeyê Ocalanî bivînê, vengê tepişteyan bieşnawê 

2021-03-01 14:57:13


	 

	 

	ENQERE - Vervatoxa HDPyî Ebrû Gunay derheqê çalakîyê ke do 8ê Adare de çarçewaya kampanya "Her kesî rê edalet" viraznê de eşkerayî daye.

	 

	Vervatoxa HDPyî Ebrû Gunay derheqê çalakîyê ke seba 8ê Adare de çarçewaya kampanya "Her kesî rê edalet" viraznê de eşkerayî da. Ebrûye derheqê sergerra Mutabakatê Dolmabahçeyî de zî vat, "Îradeyê çareserîyî yê Ocalanî bivînê, vengê tepişteyan bieşnawê." Kampanyaya "Seba her kesî edalet" do temamê adarî de dewam bikero

	 

	Ebrûye dîyar kerd ke înan çalakîyê kampanya "Seba her kesî Adalet" yê Sibate pey xo de verdayê û kampanya înan do Adare de zî çarçewaya pîrozbayîyê 8ê Adare de dewam bikero.

	 

	'Mutabakat rayîrê aştîye yo'

	 

	Ebrûye bale ant serê Mutabakatê dolmabahçeyî zî û vat: "Endamê rêzdar yê çapemenîye, seke şima zî zanê şeş serrî verê nika demê 'Prosesê Çareserî’ dewam kerdêne. Dolmabahçe de mutabaqatek 10 madeyan ameyîne meydan bi raya umumî dir ame parekerdene. No mutabaqat mabêne birêz Ocalan û selahîyetdarê dewlete de bi hawayêko hempar vejîyabi meydan. Seba problemê şarê Kurdî bi rayîr û metodê demokratîk bêro çareserkerdene û qanûnêko demokratîk bi ca bêro, firsendêko tarîxî bi. Ma ewro zî bi nê çimî ewnîyenê.

	 

	No firsend qurbanê îqtîdarî kerdî

	 

	La çi heyf Erdoğan vejîya û vat, ‘Mutabaqatê çi? Mutabaqatêko wina çin o' dimayê a roje heme wareyê cuye de vera hêzê demokratîk şerêk û zordarîyêk pîl ame kerdene û heta ewro zî dewam keno. Bi nê vatişê Erdoganî dir firsendêko tarîxî kerdî qurbanê îqtîdarê xo! Serê birêz Ocalanî de tecrîd û îzolasyonêko xidar heta ewro zî dewam keno û heta no tecrîd ewro seranserê no welatî de vila bîyo. Nê rojan reyna verfatox û wezîrê dewlete wazenê partîyama serê Prosesê Çareserî de sîya bikerê. Wazenê rol û wezîfeyê a roje sey sucêk vejê vernîya ma.

	 

	Ma xeta aştî û demokrasî yê

	 

	Ma tîya veng danê pêro raya umumî! Ma vizêr çi bî, ma ewro zî o yê! HDP xeta aştî û demokrasî yo! A rojan zî ma barê aştî û têduştî dabi serê milê xo, ewro reyna o bar bikewo serê milê ma, ma ewro zî amade yê. Coka ma xeta demokrasî, aştî û azadiye yê.

	 

	Wazenê serê prosesê çareserî de ma terorîze bikerê, ma sucdar bikerê. Ma sey înan xo serê gonî û şer de awan nêkenê. Ma xo serê aştî û azadî de awan kenê. Ê kesê ke serê çapemenî de ê prosesî qal kenê, wa bifetelyê vatişê xo yê ê rojan biewnê. Ê rojan de omidêk pîl awan bibi, cenazeyê ciwanan nêkewtêne erd û adir nêkewtêne tu keye. Ê kesê ke ê rojan xirab kenê, wazenê şer û pêrodayîş awan bikerê. La ma seke HDPyî sey xeta  azadî, aramî û têduştî ma do têkoşîn bikerê. Ma do şarê xo dir heta peynî têkoşîn dewam bikerê. Ma do bi şarê xo dir û embazanê xo dir na xeta xo bipawê û bedel çi beno wa bibo, ma peyser game nêerzenê.