Keyeyê tepişteyan: Têkoşînê înan seba ma rûmet o 

2021-02-28 09:23:16


	 

	 

	AGIRÎ - Keyeyê tepişteyan dîyar kerdî ke têkoşînê tepişteyê sîyasî seba înan serberzî yo û vengdayîşê paştdayîşê seba grevê vêşanîye kerdî û vatî: "Ganî Abdullah Ocalan û pêro tepişteyî azad bê."

	 

	Tepişteyê sîyasî bi amancê tecrîdê hemverê Rayberê PKKyî Abdullah Ocalanî bêro şikitiş û peynî binpaykerdişê heqan bêro, 27 teşrîna peyêne de dest bi grevê vêşanîye ya bêdem û bidor kerdî. Grev roja 93ine de dewam keno.

	 

	Makbule Kahraman û Fîgene Baş dîyar kerd ke waştişê tepişteyan de heqdar ê û vengdayîşê paştdayîşê grevî kerdî.

	 

	‘Bi grevan dir tedayî zî zêde bîyê'

	 

	Fîgene Baş dîyar kerd ke birayê aye Serkan Erkuş 2013 de ameyo tepiştiş û surgunê zîndanê Tîpê L yê Espiye yê Gîresunî ameyo kerdene û birayê aye Ercan Erkuş zî 2011 de ameyo tepiştiş û surgunê zîndanê Tîpê F yê Kirikkaleyî ameyo kerdene û vat: "Ercan, hucrayê yew kesî de yeno tepiştene. Linga Serkanî seqet a. Pêro tepişteyî rastê ceza yenê. Dem di dem koxuşê înan yenê vurnayîş. Pere û cilê ke ma şawenê nêdanê. Bi grevan dir tedayî tewr zêde bîyê."

	 

	'Keyeyî verê berê zîndanan de mexdur benê'

	 

	Fîgene dîyar kerd ke seba problemê ekonomî xeylêk wexto birayanê xo nêvînena û wina vat: "Rojê pêvînayîşî de keyeyî problemê cidî cuyenê. Ma bi saetan teber de yenê vindarnayîş. Heta ma şinê yenê, tutê ma nêweş kewenê, hetê psîkolojîk tesîr benê. Heta ma kewenê zere, belkî ma 15 beran ra derbaz benê. Tena ma ney, ma pêro keyeyî wina mexdur benê. Ma hende rayîr şinê, seba saetêke. Ma nêeşkenê qisey bikerê."

	 

	'Ganî keyeyî zî bikewê grev'

	 

	Fîgene dîyar kerd ke ganî waştişê tepişteyan bi ca bîyarê û vat: "Grev zirar danê weşîya tepişteyan. Eke waştişê tepişteyan bi ca bi ameyîne, do nêkewtêne grev. Ez wazena ke keye zî bikewê grev. Ê ûca de grev de yê. Ganî ma zî tîya bikewê grev. Ganî ma vengê tepişteyan bieşnawê."

	 

	 'Wa Abdullah Ocalan û tutê ma azad bê'

	 

	Tepişteyo bi nameyê Kemal Kahraman 9 serrî yo zîndanê asayîşê berzî yê Wanî de tepişte yo û birayê ey Ridvan Kahraman zî 6 serrî yo zîndanê hûmara 2 yê Elezîzî de yo. Dayîka înan Makbule Kahraman zî reaksîyon vera bêvengîya hemverê grevan da û vat: "Tutê mi rayîrê xo tercîh kerdê. Seba heq û ziwanê xo têkoşîn kenê. Tutê mi dizdî nêkerdê, çîyêko xirab nêkerdê. Tutê ma seba azadîya Ocalanî kewtî grev. Hemverê tedayan kewtî grev. Wazenê azad bê. Ma wazenê Ocalan û tutê ma serbest bêrê veradayene. Ma heta peynî pey tutanê xo de yê. Tutê ma kezebe ma yê, bêguman ma do pey înan de bê. Ganî her kes paştdayîş bido tepişteyan. Wa pêro tepişteyî azad bê."