'Bi unîversîteyanê cinîyan, cinîyê îtaetkar yenê amanckerdene' 

2021-02-27 09:15:55


	 

	Sema Çaglak

	 

	AMED - Hemverê projeyê, “Unîversîteyê Cinîyan" reaksîyon tewr zêde benê. Endamê Kordînasyonê Cinîyê Ciwanî dîyar kerdî ke bi nê projeyî cinîya îtaetkar yeno amanckerdene. Heto bîn ra dîyar kerdî ke bi nê projeyan nêeşkenê têkoşînê cinîyê ciwanan asteng bikerê.

	 

	“Unîversîteya Cinîyan" ke Serekê Pêroyî yê AKPyî û Serekkomar Tayîp Erdogan, serra 2019 de Japonya de dî û fermanê awankerdişê ci da, Bernameyê Serre ya Serekkomarîye ya Serra 2021 de ca girewt. Zanayîşê awankerdişê “Unîversîteya Cinîyan” Rojnameyê Fermî de zî ame parekerdene. Dimayê nê qerarî cinîyan nêrazîbîyayîşê xo hemverê nê qerarî ramojnayî. Sewbîna cinîyê ke unîversîta wanenê, rojê vîyarte de vera nê koma 'Ma do unîversîteyanê cinîyan nêdê awankerdiş' îlan kerdî. Endamê “Kordînasyonê Cinîyê Ciwanî” Ronda Bat û Tekoşîn Tekîn derheqê babete de qisey kerdî.

	 

	'Cinîya îtaetkar yena amanckerdene'

	 

	Ronda dîyar kerd ke bi projeyê Unîversîteya Cinîyan bêtêduştîya cinsî tewr kûr bena û wina vat: "No proje do teda û şîdetê serê cinîyan tewr zêde bikero. Labelê reaksîyonê cinîyê ciwanan a roje ra heta nika dewam keno. Do cinîyê ciwanî projeyo ke cinîya îttatkar amanc keno, tesdîq nêkenê. Seba ke no proje esasê xo de cinî komel û cu ra dûr fîneno. No proje dewamê Lîseya Meslegî ya Kêneyan û Lîseya Îmamxetîbî yo. Bi no hawa mektebê tekkesî kenê rojeve û perwerdeyîyê zanistî, azadî û bi ziwanê dayîke yeno astengkerdene. Ma seke cinîyê ciwanî nê tesdîq nêkenê û destûr nêdanê mudaxeleyêk wina ke hemverê cuye yo."

	 

	‘Têkoşînê cinîyan ê hemverê îqtîdarî pîl beno'

	 

	Ronda eynî wextî de dîyar kerd ke hedefêk înan zî Pêkerdişê Stenbolî yo û vat: “Ma nê israrî Pêkerdişê Stenbolî de zî dî. Cinîyê ke seba heqê xo bi dest bikerê têkoşîn danê, hêriş înan rê yeno kerdene. Seba ke têkoşînê cinîyan zî seke înan bi hêz o. Cinî bi îrade û vindertişêko xurtî vera polîtîkayê ke hemverê înan yenê kerdene, vejênê. Her ke şino têkoşînê cinîyan ê heemverê îqtîdarî pîl beno. Îqtîdar zî hemverê nê têkoşînê bi projeyê newe wazenê nê têkoşînî asteng bikerê. Ma prosesêko ke bi têkoşînan yeno bi namekerdiş ra derbaz benê. Nê prosesî de kerdişê projeyê tekkesî tewr zêde benê, cinî vera nînan xo bi rêxistin kenê. Seewbîna hemverê nê rêxistinbîyayîşî, komelî zî wazenê bi sînor bikerê û bikerê binê tecrîdî."

	 

	'Ma do têkoşînê xo bi rêxistin girs bikerê'

	 

	Ronda tewr peyîn qiseykerdişê xo de bale ant serê koma 'Ma unîversîteyanê cinîyan nêdanê awankerdiş' û wina vat: "Ma seke cinîyê ciwanî bi meclîsê cinîyan ê unîversîteyan dir kewtî têkîlî û vera nê projeyî reaksîyonê xo ramojnenê. Heto bîn ra peynî de ez wazena vengdayîşê şahîya ma ya 5ê Adare ya “Pêvînayîşê Cinîyê Ciwanan" bikera. Ma do 5ê Adare de bêrê têhet û têkoşînê rêxistinkerdişî girs bikerê."

	 

	'Wazeno goreyê hişmendîyê xo komelêk awan bikero'

	 

	Endama Koordînasyonê Cinîyê Ciwan, Tekoşîn Tekîn zî dîyar kerd ke Tirkîya bi akerdişê “Unîversîteya Cinîyan" dir cinîya meqûl hedef keno û vat: "Îqtîdar bi serran o unîversîteya cinîyan seba ke cinîyan yewbînan ra bivisno, seke hacetêk xebitneno. Îqtîdar wazeno ke hişmendîyê xo unîversîteyan de awan bikero. Sewbîna wazeno ke goreyê hişmendîyê xo komelêk awan bikero. Rol û modelê bêtêduştîya cinsî serê cinîyan de wazeno ferz bikero. Yan zî no tena Projeyê Unîversîteyanê Cinîyan o. Eynî wextî de hişmendîyê serdest yê camêrdan o."

	 

	'Ma unîversîteya azad wazenê'

	 

	Tekoşîne vat ewro zî sîstemêko cuya cinîyan rê qerar dano hemverê ma esto û wina vat: "Nimûneyê tewr peyîn mektebê mehrbirnayîşî ameyî akerdene. Hişmendîyê camêrdan her wareyê cuye de wazeno ke cinîyan çiman ra dûr bifîno. Seba nê zî cinî her wareyê cuye de vanê, "ma estê û ma pay heqê xo de yê." Prosesêko hende qetilkerdişê cinîyan û şîdetê serê cinîyan xo tewr zêde keno, îqtîdar wazeno ke bi projeyê bi no hawayî serdestîyê xo hemverê cinîyan tewr zêde xurt bikero. Labelê ganî vera înan projeyê îqtîdarî, qanûnê xo ra biewno. Waştişê ma, 'Unîversîtayê Azad ê' pêwa nînan koma “Ma do unîversîteyanê cinîyan nêdê awankerdiş" ma vera nê projeyî eşkerayî da û bi wendekaran dir atolye viraşt. Bi no hawa seba ke m acinîyan xeberdar bikerê, xebatê ma na çarçewa de hema zî dewam kenê."