'Tu hêz nêeşkeno vera têkoşînê dayîkan de vindero' 

2021-02-26 09:13:29


	 

	AMED - Dayîka Îhsan Topuz, Halîme Topuz ard ziwan ke qey tena seba kurdan heqê merdiman çin o û vat: "Bi 27 serrî yo ez lajê xo ra dûrî ya û hesreta ey de ya. Qey kezeba ma kezeb nîya. No şer û pêrodayîş wa êdî biqedîyo û rayîrê çareserî abibo." Dayîka Mehmet Alî Baykal, Fatma Baykal zî dîayr kerd ke ê aştîye wazenê, merg nêwazenê.

	 

	Tepişteyê PKK û PAJKî 27ê Teşrîna peyêne de zîndanê herême û Tirkiîya de bi amancê wedariitişê tecrîdê serê Rayberê PKKyî Abdulah Ocalan dest bi grevê vêşanîye yê bêdem û bidor kerdî. Bi seyan zîndanan de tepişteyî kom bi kom bi hawayêko 5 roj bidor çalakîyê xo dewam kenê.

	 

	Yew nê tepişteyan ra zî Îhsan Topuz (41) ke Zîndanê Tîpê T yê Wanî de tepişte yo. Îhsan serra 1992 de ame tepiştene. 8 serrî zîndanê Tirkîya de mend. Dima ra tewrê PKKyî bîyo û nêzdîyê 4 serrî dima ra hetê Îranî ra ameyo tepiştiş. Îran de zî 10 serrî tepişte mendo. Bi np hawa serra 2016 de Îranî, Îhsanî teslîmê Tirkîya kerdo. Îhsan, nika nêzdîyê 4 serrî yo Zîndanê Wanî de tepişte yo û 45 serrî ceza ci rê ameya birnayîş.

	 

	'14 serreyê xo de amebi tepiştiş'

	 

	Dayîka Îhsanî, Halîme Topuz vat ke zulm û nêheqîyê serê tepişteyan qet nêqedîya yo coka tepişteyî kewenê grev û vat: "Lajê mi gama ke ame tepiştiş 14 serre bi. Eştibî serê keyeyê ma û zulm û teda bi ma kerdibî. No zulm bi serran o dewam keno. Nika zî zîndan de maneno. Werdêko baş nêdanê, awa germ nêdanê, kalorîferan nêfînenê ta. Ma seba zimistanî cilan şawitib la hema nêameyê dayîş. Yan zî muameleyçko bi kêfî înan rê yeno kerdene. Tutê ma ûca de pêrîşan bîyê. Ma dayîk ê. Wa êdî nê zulmî bi ma nêkerê. Tutê ma heqdar ê û ma zî pey înan de yê. Çend zulm û binpaykerdişî serê înan de bikerê, îradeyê înan xurt o. Heta ke waştişê tutanê ma bi ca nîyarê, ma do kuçeyan de bê."

	 

	'Tena seba kurdan heqê merdiman çin o?'

	 

	Halîme dewam de wina vat: "Ez veng dana Wezirê Dade û dinya ke çira vera nê zulmî de bêveng ê. Ma miletêo qij nîyê. Bi hezaran tepişteyan dest bi grevê vêşanîye kerdo. Tirkîya hende qalê heqê merdiman kena, la qey babete biba kurdî heqê merdiman qedêno. Vengdayîşê mi seba dayîkan zî esto ke wa xo zere de nêverdê û tepişteyanê ma tena nêverdê. Wa paştdayîş bidê. No çi cîya yo ke mabêne ma de esto."

	 

	'27 serrî yo lajê xo ra dûrî ya'

	 

	Halîme qiseykerdişê xo wina dewam kerd: "Her kes zano ke azadîya şarê kurdî bi wedaritişê tecrîdî û aştîyêke mende mimkin o. Wa kes xo nêxapêno û no gore têkoşîn bikerê. Bi 27 serrî yo ez lajê xo ra dûrî ya û hesreta ey de ya. Qey kezeba ma kezeb nîya. No şer û pêrodayîş wa êdî biqedîyo û rayîrê çareserî bêro kerdene. Bi 2 mengî û nîm ke tepişteyî grev de yê. Kam ci dayîke eşkena nê çî qebul bikera û bi zerrîyêka rehet sereyê xo bida serê başna."

	 

	'Tu hêz nêeşkeno vera têkoşînê dayîkan de vindero'

	 

	Halîme tewr peyîn wina vat: "Dejo tewr giran serê milê dayîkan de yo. Tu ca dayîkan rê çin o. Dayîkî seba kezeba xo her çî eşkenê bikerê. Yan zî tu hêzêk ke dayîke vindarno çin o. Ez hêvî û rica dayîkan ra kena ke ma destê xo bidê yewbînan û tutanê xo nê zulmî ra bixelesnê."

	 

	'Dimayê ke ame tehlîyekerdiş 3 rojî dima reyna ame tepiştiş'

	 

	Mehmet Alî Aykal zî 4 serrî yo Zîndanê Tîpê D yê Amedî de tepişte yo. Dayîka ey Fatma Aykal vat lajê aye 16 serre de ameyo tepiştene û vat: "Lajê mi gama ke ameyo tepiştene, hema tut bi la reyna qet nêtersabi. Gama ke polîsî ameyî ci ra vatî, 'ti çira hende rehet ê seke to suc nêkerdo' Mehmet zî vat, 'Sûcê mi çin o ke ez bitersî' bi no hawa lajê mi tepiştî û 9 mengî û nîm zîndan de mend. Dima ra serbest ame veradayîş la senîn ke ame veradayîş 3 rojî ra dima reyna ame tepiştiş. Ma şaş mendî, ma waşt lajê mi serbest bêro veradayîş la pêwa nêrazîbîyayîşî reyna ey tepiştî."

	 

	'Ma aştîye wazenê, merdiş nêwazenê'

	 

	Fatma dewam de wina vat: "Lajê reya ewil zî kewtibi grev, nika reyna kewto. Qey kes nêzano ke grevî ra mergî virazênê? Gama ke sereyê xo danê serê başna, senî eşkenê rehetî rakoyê? Ez seke dayîkêka tepiştî nêeşkena rehet rakoyî. Lajê mi her wext hişê mi de yo. Gama ke ez ewnîyena awe û werd ra tepişteyî yenê mi vîr. Destê kamî ra çi yeno wa bikerê û vernîya merdişan bigîrê. No çîyêk yarî nîyo, peynîya ci merg o. Tepişteyî heta ke waştişê înan bi ca nêrê, fek grevê xo ra vera nêdanê. Bes êdî wa zerrîya ma dayîkan nêveşo. Ma tena aştî wazenê, merg nêwazenê."

	 

	'Wa vengê ma şêro dinya'

	 

	Tepişteyî çalakîya xo de bi israr ê. Tutê ma seba ke azadî waştî û heqê kurdan pawitî ameyî tepiştiş. Xêrcê nê tu sucêke înan çin o. Kam vengê xo vera zulmî berz bikero, yeno tepiştiş. Bi cezayê dîsîplînî hem tepişteyan rê hem zî keyeyan rê îşkence kenê. Nêverdenê bi telefon zî qisey bikerê. Çi heqê înan esto seba nê çîyan. Wa vengê tepişteyanê ma bieşnawê û dinya rê bidê eşnawitiş. Nê zulmî rê wa tu kes kerr û kor nêbo."