
'Ma do her roje ziwanê Kurdkî gane verdê'

2021-02-26 09:11:11


	&nbsp;

	Sema Çaglak

	&nbsp;

	
		AMED - Derheqê kampanyaya “Wa ziwanê kurdkî bibo ziwanê fermî”,“Wa ziwanê kurdkî bibo ziwanê perwerdeyî” de endama sekreterîya Torra Ziwan û Kulturê Kurdkî, Zuhal Tekîner dîyar kerd ke seba na kampanya omidê înan zaf o. Sewbîna mamosteya MED-DERî Gulîzar Tellîoglu zî dîyar kerd ke hemverê tehlukeyê vindîbîyayîşê ziwanê kurdkî xebatanê xo dewam bikerê.
	
		&nbsp;


	Bi rayberîya Torra Ziwan û Kulturê Kurdkî û Platformê Ziwanê Kurdkî kampanyaya îmzayî ya “Wa ziwanê kurdkî bibo ziwanê fermî” û “Wa ziwanê kurdkî bibo ziwanê perwerdehî” 22ê Sibate de ame destpêkerdene. Kampanya do bi îmzayê dîjîtal û fîzîkî dewam bikera. Do nê îmzayî peynî de teslîmê Meclîsê Tirkîya bêrê kerdene. Derheqê babete de Endama Sekreterya Torra Ziwan û Kulturê Kurdkî Zuhal Tekîner û mamosteya Komelaya Cigêrayîşê Kultur û Ziwananê Mezopotamyayî (MED - DER) Gulîzar Tellîoglu qisey kerd.

	&nbsp;

	‘Kampanya seba temamê şarê Kurdî ya'

	&nbsp;

	Zuhale dîyar kerd ke ê wazenê astengîyê serê ziwanî vejê teber û vat: "Destpêkê na kampanya de hemkarîya Torra Ziwan û Kulturê kurdkî û Platformê Ziwanê Kurdkî dir game ame eştene. La bingehê Torra ziwan de heme sazgehê ziwanî ca gênê. Xêrcê nînan bingehê Platformê Ziwanê Kurdkî de 9 partîyê sîyasî yê kurdî ca gênê. Sewbîna ma wazenê waştişê şarî yê serê ziwanî de bi çi hawayî vejê werte. Kampanyaya ke ma da destpêkerdiş kampanyaya tewr pîl û yewin a. Çike heta nika çiqas xebat ameybî kerdene zî, waştişê temamê kurdan hetê ziwan de nêardo bi ca. Na kampanya tay serê nê babetan de zî vindena."

	&nbsp;

	Zuhale vengdayîşê tewrê kampanya kerd û wina qedêna: "Na kampanya hem bi rayîrê dîjîtalî hem zî do rî bi rî bêro kerdene. Yê ke seba medyaya dîjîtalî îmkanê înan çinbê, ma wazenê xo biresnê înan û paştdayîşê na kampanya tewr zêde bikerê. Seba na kampanya omidê ma pîl o ma do xurt dest pêbikerê."

	&nbsp;

	‘Perwerdeyî bi ziwanê dayîke gamêka bingeyîn a'

	&nbsp;

	Gulîzare, qiseykerdişê xo de bale ante serê girîngîyê perwerdeyê dayîke û wina vat: "Ziwanê ma binê tehlukeyê vindîbîyayîşî de yo. Seba ke ma vernîya nê tehlukeyî bigîrê, hewil danê ke ziwanê perwerdeyî bibo ziwanê kurdkî. Çike perwerdeyê ziwanê dayîke, seba temamê şarê Kurd gamêka bingehîn a. Seba ke kurdî xo biresnê her wareyê cuye."

	&nbsp;

	Gulîzare dîyar kerd ke seba girîngîyê 21ê Sibate înan maskeyê bi nuşteyê kurdkî vila kerdê û vat: "Ma ê maskeyan xeylêk cayan rê vila kerd. Seba ke ziwanê kurdkî her ca de xo gane bikero. Ganî ma ziwan bikerê zereyê keyeyî, bazar, sîyaset û komelî. Ma omid kenê ke ameyox de ziwanê kurdkî bikerê ziwanê perwerdeyî."

	&nbsp;

	&nbsp;

	&nbsp;