Raporê qeyûmî: Îradeyê 4 mîlyon û 356 hezar û 819 weçinîtoxan ame xespkerdene 

2021-02-24 15:07:56


	 

	 

	ENQERE - Heyetê Îdareyanê Herêmîyan ê Demokratîkan ê HDPyî qeyûman ser o raporêk amade kerd. Hemvervatoxe Hedîye Karaaslan vat: “48 şaredarîyan de dest nîya îradeyê 4 mîlyon û 356 hezar û 819 weçinîtoxan ser.”

	 

	Heyetê Îdareyanê Herêmîyan ê Demokratîkan ê HDPyî  merkezê pêroyî yê partî de kombîyayîşêkê çapemenîye kerd û hemvervatoxanê heyetî Salîm Kaplan û Hedîye Karaaslan raporê xo yê bi serrnameyê 'Destsernayîşê îradeyî û raştîya qeyûman' eşkera kerd.

	 

	Hedîye derheqê raporî de wina vat: “Seke zanîyeno îqtîdar û Wezaretê Karanê Zereyî vera partîya ma propagandaya reşkerdişî kenê. 2016 tayînê qeyûman ra nata na propaganda dewam kena. Wezaretî pê naye qîm nêkerd derheqê mesele de kitabêkê porpaganda zî amade kerd. Ma wazenê verî 19ê tenbaxa 2019î ra nata pêro doneyanê destsernayîşanê îradeyê şarî pare bikerê.”

	 

	‘650 serrî ceza dayî şaredaran sebebê nê çi yo’

	 

	Hedîye dewamê qiseykerdişê xo de nê doneyî pare kerdî: ''3 şaredarîyanê şaristanan ê pîlan rê, 5 şaredarîyanê şaristanan rê, 33 şaredarîyanê qezayan rê bi temamî 48 şaredarîyan rê qeyûm ame tayînkerdene. 78 hemşaredarî ameyî destbendkerdne. 19ê ci cinîyî 37 hemşaredarî tepişîyayî. Hema zî 15 hemşaredarî zîndanan de yê. Nê wextî de 7 hemşaredaran rê cezaya hepsê keyeyî dîyaye. 6 hemşaredarî 10 mengî yo zîndan de yê. 807 endamê meclîsanê şaredarîyan nêeşkenê larê xo bikerê.”

	 

	‘Hende erjê merdimayî ra dûr kewtê’

	 

	Hedîye da zanayene ke bi nê hawayî dest nîya îradeyê 4 mîlyon û 456 hezar û 819 weçinîtoxan ser û vat: “Dewrê nê îqtîdarî de her wextî ra zêdêr vera destkewteyanê cinîyan û sîstemê hemserekîye hêrişî ameyî kerdene. Qeyûman destkewteyê cinîyan çin kerdî. Ma sîstemê hemserekîye bi hawayêkê nimiteyî nêrona. Ma weçînayîşanê 2014-2019î de sîstemê hemserekîye eşkera kerd û ard ca. Qanûno Bingeyî zî meşrûtîya sîstemê ma tesdîq keno. Ma sîstemê hemserekîye de israr kenê.”

	 

	Hedîye îfade kerd ke îqtîdarî polîtîkaya qeyûman ra dima rayê xo vînî kerdî û ard ziwan ke şarî bi nê hawayî mojna ke ê sîstemê qeyûman qebul nêkenê. Hedîye vat: “No sîstem reyna sey weçînayîşê 2019î rîyê şima de biteqo.”