TJA 8ê Adare rê amade yo: Ma do her ware de bi cinîyan dir bêrê têhet 

2021-02-24 09:17:16


	 

	 

	AMED - TJA bi wesîleyê 8ê Adar Roja Cinêyanê Dinya de bi şîarê ‘ma vera tecrîdî azadî, vera qirkerdişê cinî cuye pawenê' vejenê wareyan. TJAyî do wareyan de xeylêk bernameyan viraznê û bi cinîyan dir bêrê têhet.

	 

	Tevgerê Cinîyê Azadî (TJA) seke her serre emsar zî do 8ê Adare de wareyan de bê. TJA her serre bi şîarêk cîya vejêno wareyan. Emsar zî bi şîarê ‘ma vera tecrîdî azadî, vera qirkerdişê cinî cuye pawenê' vejênê meydanan.

	 

	'Tewr zêde cinî tecrîd hîs kenê'

	 

	Aktîvîsta TJAyî Sevîcan Yaşar vat, emsar bi taybet tecrîd girewtê dest û dewam de wina vat: "Tecrîd Îmrali de dest pêkeno. Ûca de zî serê cinîyan û komelî de yeno caardene. Bi taybet cuya cinîyan kerdê binê ablûqa. Wazenê fikrê Îmrali nêreso cinî û komelî, coka tecrîd kenê. Wazenê bi tecrîd ma heme çî ra dûr bifînê. Çiqas binimnê zî heme çî binê tecrîdî de yo. Çîyê ke ma vanê suc yenê hesibnayîş. Vera bîyayîşê cinîyan polîtîkayêko cidî yeno kerdene. No 5 serrî yo resayo sewîyeyêka xidar. Vera cinîyan polîtîkayê qirkerdişî yeno kerdene. Tewr tay 30-40 cinî yenê qetilkerdene."

	 

	'Cinî hem qirkerdişê psîkolojîk hem zî yê ruhî ciwîyenê’

	 

	Sevîcane dewam de wina vat: "Lazimî bi rêxistinêk cidî esto. Ma xebatan de hişmendîyê cinîyan vejenê werte. Qirkerdişê cinîyan tena fîzîkî nîyo. Hem psîkolojîk û hem zî ruhî yo. Wazenê cinîyan bi pêroyî teberê heme çî bigîrê. Dimayê korona cinî hepsê keyeyî ameyî kerdene. No polîtîkayêko bi zanayîş o. Coka vernê de îqtîdar vernê de hêrişê cinîyan keno."

	 

	'Têkoşînêko pîl lazim o'

	 

	Sevîcane tewr peyîn wina vat: "Bi serran o şîdet serê cinîyan de dewam keno. Cinî barê pêro cuye gêna la nîna vînayîş. No problemêko cidi yo. Garantîya tu cinîyêke çin o ke rastê şîdetî nêro. Seba nê ganî cinî bi hişmindî têbigeyrê. Ma do sloganê, ‘Seba cinîyan edalet’ kuçeyan de bê. Ma do bi ziwan û kulturê xo wareyan de bê. Wa pêro cinî bi nê hişmendî wareyan de bê."

	 

	TJA stardê bernameyê 8ê Adare 2ê Sibate de Sêrt û Hezexî de dano, Amed de zî 1ê Adare de stard dano.