'Çîyêk bi tepişteyan bibo berpirsîyar hukmat o' 

2021-02-24 09:14:04


	 

	 

	Rojda Aydin

	 

	ŞIRNEX - Merdimê tepişteyan yê Şirnexî, bale antî serê grevê vêşanîye ke 90 rojî yo dewam keno û wina ercnayîş kerdî: "Ma keyeyê teber de seba tepişteyan vengê xo berz bikerê. La zîndanan de çîyêk bi tepişteyan bibo, berpirsîyar hukmat bi xo yo."

	 

	Grevê vêşanîye ke hetê tepişteyan ra 27ê Teşrîna peyêne 2020 de ame destpêkerdene 90 rojî yo dewam keno. Tepişteyê PKKyijî û PAJKî vera tecrîdê hemverê Rayberê PKKyî Abdullah Ocalan û binpaykerdişê heqê tepişteyan grev dabî destpêkerdene. Merdimê tepişteyan yê Şirnexî, dîyar kerdî ke eke zîndanan ra cenaze vejîyê berpirsayarê nê hukmat bi xo yo û veng dayî je veng bidê, vengê tepişteyan.

	 

	'Ez cuya kênaya xo ra bi endîşeyîn a'

	 

	Dayîka tepişteya bi nameyê Saadet Îdîn ya ke 10 mengî yo Zîndanê Tîpê T yê Şirnexî de ya Alîye Îdîn, dîyar kerd ke 14 serrî û 6 mengî ceza kênaya aye rê ameya dayene. Alîye, dîyar kerd ke kênaya aye seba fikr û fehmê xo azad ardo ziwan ewro tepişteya û vat: "Kênaya mi verê ke bêro tepiştene 10 roj verê krîz derbaz kerd, kênaya mi hetê çepê ci bi felç û nêeşkayîne qisey bikero. Kênaya mi hema nêweşxane de bî veng dayî aye vatî ke bêro îfade bido. Dima ra ameyî kênaya berdî û tepiştî. Nika hetê rastî kênaya mi baş nîyo û her wext maseno. Seba nêweşîya aye îdarekarê zîndanî beno nêweşxane labelê tu çîyêk nêvanê. Derzenêke danê piro û erşawenê. Kênaya mi nêeşkena lazimîyê xo bi ca bîyaro. Zîndan de embazê aye hetkarîya aye kenê û lazimîyê aye bi ca anê. Seba nêweşîya kênaya xo ma zaf bi endîşeyîn ê. Eşyayê tutanê ma nînê dayene."

	 

	'Tutê ma tena azadî û aştî wazenê'

	 

	Alîye, dîyar kerd ke zîndan de serê tepişteyan de tedayî xeylêk zêde bîyê û wina vat: "Zîndanê Şirnexî de 3 cinîyê sîyasî tena estê. Gardîyan destûr nêdanê ke pîya şêrê telefon de qisey bikerê. Wexto ke yew bi yewe benê heqaret bi înan kenê. Tutê ma sucdar nîyê. Ewro bi hawayêko bê sûc yenê tepiştene. Pêro tepişteyê tecawuzkar, dizd û sewbîna vera dayî. La tutanê ma vera nêdayî. Tutê ma tena cuyêka azad û aştîye wazenê."

	 

	'Wa tecrîd bêro wedaritene'

	 

	Alîye, bale ant serê çalakîya grevê vêşanîye yê zîndanan de ameyê destpêkerdene û vat: "Wa teda û zordarîyê serê zîndanan bêro wedaritene. Ma wazenê cuyêka azad û têduşt bêro awankerdene. Ma dinyayêka bê şer wazenê. Verê ke zîndanan ra cenaze vejîyê, wa waştişê tutanê ma bi ca bîyarê. Wa tecrîd bêro wedaritene. Eke tecrîd bêro wedaritiş do no zulm û zordarî zî peynî bibo."

	 

	'Bi tepiştiş û kiştiş wazenê ma çin bikerê'

	 

	Dayîka Fatma Uyara ke 4ê çeleyê 2016 de Silopî de wextê qedexeyê tebervejîyayîşê kuçeyan de kuçe de ameye qetilkerdene Hatîce Uyar wina bale ant serê mêrdeyê xo û vat: "Mêrdeyê mi 9 serrî yo tepişteye yo û hema zî ceza ci rê nêameya birnayene. Dosyeya ey nika daraz de ya. Wexto ke mêrdeyê mi ame tepiştene, vernê de zîndanê Mêrdînî de mend, ûca raardî zîndanê Şirnexî. Dima ra surgunê Zîndanê Gîresûnî û ûca ra zî surgunê Zîndano Girewte yê Tîpê T yê Beşîkdûzû yê Trabzonî ame kerdene. Mêrdeyê mi bi 9 serrî yo tepişte yo. Zîndanan de heqê înan yeno binpaykerdiş. Bi tepiştiş û kiştişî wazenê ma çin bikerê. Kesê ke kênaya mi kiştî, ewro zî zîndan de teda mmêrdeyê mi rê kenê."

	 

	‘Her roja ke derbaz beno nêweşîyê ey giran beno'

	 

	Hatîce, dîyar kerd ke xeylêk nêweşîyê mêrdeyê aye estê û vat: "Mêrdeyê mi verê ke bêro tepiştiş tu nêweşîye ey çinbi. Labelê dimayê ke ame tepiştene nêweşîyê ey vejîyayî werte. Nika nêweşîyê ey didan, ulser û kanserê prostatî peyda bi. Seba nêweşîya ey ez bi endîşeyîn a. Wa mêrdeyê mi vera bidê. Mêrdeyê mi tu suc nêkerdo. Seba emrê ey pîl o her roje nêweşî ci benê giran. Ma wazenê mêrdeyêmi bêro veradayîş."

	 

	'Wa hukmat waştişê tepişteyan bi ca bîyaro'

	 

	Hatîce, tewr peyîn wina vat: "Ma dayîkî zulm û şer nêwazenê. Ma dayîkî tena weşî wazenê. Ma wazenê no tecrîd serê serek û pêro tepişteyan ra bêro wedaritene. Hemverê tecrîdî ewro zîndanan de grevê vêşanîye ameyo destpêkerdene. Ganî ma zî teber de seba tepişteyan vengê xo berz bikerê. Eke zîndanan de çîyêk bi tepişteyan bibo, berpirsyarê nê hukmat bi xo yo. Wa hukmat waştişê tepişteyan bi ca bîyaro."