
Cinî do vera asîmîlasyonê ziwanî wirzê serê lingan 

2021-02-21 09:35:22


	&nbsp;

	&nbsp;

	STENBOL - Seba bale biancîyo serê rolê tarîxî yê cinîyan ê serê ziwan û pawitişê ziwanî Koma Cinîyan ê Ziwanê Dayîke ame awankerdiş. Rozerîn Îldan ke kome de ca gêna wina vat: "Babeta têkoşînê vera asîmîlasyonî de berpirsyarî keweno serê milê cinîyan. Seba asîmîlasyon peynî bibo, ganî cinî xo newe ra awan bikerê û hemverê sîstemî sere wedarnê."

	&nbsp;

	Rêxistinê Kultur, Zanist û Perwerdeyî (UNESCO) yê Neteweyê Yewbîyaye (NY) 2000î de 21ê Sibate Roja Ziwanê Dayîke ya Dinya îlan kerd. Seba ciwîyayîşê ziwanê ke ver bi çinbîyayîşî yê, bername û xebatê tewir bi tewir yenê kerdene.

	&nbsp;

	Cinîyê ke Ziwanê Dayîke bi koma ke awan kerdê hedefê wayîrvejîyayîşê ziwanî kenê. Rozerîne Îldan ke koma Cinîyê Ziwanê Dayike de ca gêna ya, eynî wextî de endama Komeleya Cigêrayîşê Kurdkî de ca gêna, derheqê kome û amancê ci de qisey kerd.

	&nbsp;

	Rozerîne dîyar kerd ke serrêke verê reya ewil kome çarçewaya kampanya ‘seba vurnayîş û azadî ti zî wirze serê lingan' ya TJAyî de ameyê têhet û dima ra qerarê kome dayê û vat: "Ma munaqeşe kerd ke ma eşkenê serê ziwanî de se bikerê. Ma cinîyan bi kolektîf ercnayîş kerd. Ma vat, ma komêke awan bikerê. Ma xebatê xo binê nameyê, ‘Cinîyê Ziwanê Dayîke’ de kerd. Xebata ma ya ewil 25ê Teşrîna Peyêne de ma kerd. Ma kome xo bi 25 kesî awan kerd la nika ma 40 kesî yê. No seba ma serkewtişêk pîl o."

	&nbsp;

	Têkiliyê cinî-ziwan

	&nbsp;

	Rozerîne bale ant serê amancê awankerdişê koma cinîyan û vat, tarîxê têkilîyê cinî û ziwanî yo û wina dewam kerd: "Qiseykerdişo ewil bi cinîyan vejîyayo werte. Xebat û averşîyayîşê ziwanî cinîyan awan kerdo. Cinîyan temamê cuye awan kerdo. Girêdayê nê zî cinîyan ziwan awan kerdo. Têkilîyê cinî-ziwan zaf kûr o. Nika serê ziwan de zî asîmîlasyonêko pîl esto. Coka zî hetê têkoşînî de berpirsyarî keweno serê milê cinîyan. Ganî ma wayîrê ziwanî vejîyê."

	&nbsp;

	‘Ganî ma her ca de ziwan bipawê'

	&nbsp;

	Rozerîne bale ant serê 21ê Sibate Roja Ziwanê Dayîke û vat, rojêke tena ney ganî her wext ziwan bipawê û wina qedêna: "Ma do na çarçewa de panel viraznê. Ma spotêk amade kerd. Ma girîngîyê ziwanî bîyarê ziwan."

	&nbsp;

	Vîdeoyê 25ê Teşrîna Peyêne ke Cinîyê Ziwanê Dayîke amade kerdê û panelê seba 25ê Sibate do bêro kerdene lînko cêr de yo:

	&nbsp;

	https://www.youtube.com/watch?v=6ar4iwb4NnM&feature=emb_logo

	&nbsp;

	https://us02web.zoom.us/meeting/register/tZEpdOuqpj0qHNfW_b5Ed1hvN3sxYu4tN5cv

	&nbsp;