'Ma vera tecrîdî sere wedarnenê'

2021-02-20 09:11:19


	 

	AMED - Cinîyê Efrînijî yê ke kampa Lavrîon ya Yunanîstanî de grevê vêşanîye de yê, veng dayî ke ganî tecrîdê serê Abdullah Ocalanî peynî bibo û vat cinîyan vera tecrîdî sere wedarnayê.

	
		 


	Bi amancê wedaritişê tecrîdê serê Rayberê PKKyî Abdullah Ocalan û peynîkerdişê binpaykerdişê heqan, tepişteyî 27ê Teşrîna Peyêne de grevê vêşanîye bêdem û bidor dest pêkerdî. Sewbîna welatê cîyan de kurd û dostê kurdan zî bi amancê paştdayîşî tewrê grevê vêşanîye bî.

	 

	Bi amancê paştdayîşî tepişteyan Kampa Multecîyan ê Şehîd Rustem Cudî yê kampa Mexmurî ya, bi rayberîya Meclîsê Îştarî çalakîya grevê vêşanîye ame destpêkerdene û roja 62ine de dewam keno. Çalakîya Kampa Lavrîon ya Yunanîstanî ame destpêkerdene zî roja 48ine de dewam keno.

	 

	Salîha Xelîl û Zarîfe Omer Osman yê ke kampa Lavrîon tewrê grev bî, 2018 de seba hêrişê hemverê Efrînî koç kerdê.

	 

	'Ma do bi çalakîya xo netîce bigîrê'

	 

	Zarîfe Omer hêrîş û çîyê ke cuyaya wina qal kerd: "Mêrdeyê mi Abdo Şexo 28 serrî yo Tirkîya de bi hawayêko bêhuqûqî tepişte yo. Mêrdeyê mi tewrê grevê 2018 bi û demêk derg grev de mend. YEwin waştişê înan wedaritişê tecrîdî bi. Ma do bi çalakîya xo netîce bigîrê. Heta rayberê ma zîndan de bo ma do fek çalakîya xo ra vera nêdê. Wa tecrîd wedarnê. Dewleta Tirkî vana ê hukmatêko demokrat ê. La no zûr o. Eke demokrat bibayîne, nê zulmî nêkerdêne."

	 

	‘Rayberî seba cinîyan sere wedarna'

	 

	Zarîfe dewam de wina vat: "Mesût Barzanî nê prosesî de kîşte Kurdan de ca nêgirewt. Berjewendîyê kurdan nêfikrîyayî. Ma zanê ke bi Mesût Barzanî kay keno la ma vanê ke ma wayê û birayê yewbînan ê. Heta Rayberê ma azad nêbo, azadîya ma zî çin a. Ez seba pêro kesê ke grev de yê serkewtiş wazena."

	 

	‘Ez seke cinîya kurde sere wedarnena'

	 

	Salîha Xelîl zî mêrdeyê xo hêrişî de vinî kerda û vat: "Ganî vera hêrişan, ma xo ver bidê. Çalakîya înan baş derbaz bena. Şarê Yunanîstanî çalakîya grevê vêşanîye ra xeberdar ê. Ma nika welatê xo ra dûr ê. La no têkoşînê ma rê asteng nîyo. Ma hewl danê ke vengê xo bidê eşnawitiş. Ganî tecrîd bêro wedaritiş û waştişî bi ca bêrê."