Dayîkê tepişteyan: Wext wextê xoverdayîşî yo 

2021-02-19 15:07:28


	 

	 

	Sema Çaglak - Safiye Alagaş

	 

	AMED - Dayîkê tepişteyan seba tutanê xo mîyanê endîşeyî de yê û vengdayîşê hîsgêrî kenê. Meryeme Soylu, dîyar kerd ke CPT bi helwestê xo bi şirîkê îşkenceyê Îmraliyî û Sebrîza Yilmaz zî dîyar kerd ke ganî her kes seba tepişteyan têkoşîn bikero.

	 

	Tepişteyê PKKyî û PAJKî, vera tecrîdê hemverê Rayberê PKKyî Abdullah Ocalan û binpaykerdişê heqê tepişteyan 27ê Teşrîna peyêne de çalakîya grevê vêşanîye ya bêdem û bidor dayî destpêkerdene. Çalakîya ke bêdem û bidor amebî destpêkerdene bi dewirgirewtişê koma 17ine roja 85ine de dewam kena. Sewbîna Wargehê Multecîyan ê Şehîd Rustem Cûdî (Mexmûr) 64 û Wargehê Multecîyan Lavrîon yê Yunanîstanî zî grev 46 rojî yo dewam kenê. Meryem Soylu û Amîne Kaya seba paştdayîşî vengdayîş kenê.

	 

	'Ez 9 serrî û nîm zîndan de binê zulmî de menda'

	 

	Mehmet Soylu Zîndanê Tîpê T yê Afyonî û Amîne Kaya zî Zîndanê Cinîyan ê Bakirkoyî de tepişteye yê. Dayîka wina qal kerd: "Serra 2011 de ez û lajê xo pîya ameyî tepiştiş. Dimayê serr û nîm lajê mi serbest ame veradayîş. 2 serrî mendibi ke cezaya mi biqedo, lajê mi reyke bîn ame tepiştiş. Lajê mi 5 serrî yo tepişte yo. Kênaya Amîne Kaya zî 2 mengî verê Stenbol de ameye tepiştene. Ez bi xo 9 serrî û nîm zîndan de menda. Şert û mercê zîndanan bi vatiş nîno ziwan û kesê ke zîndanan de manenê û ciwîyenê tewr zaf rewşe zanê."

	 

	'Hemverê bîyayîşê ma hêriş kenê'

	 

	Meryeme wina dewam kerd: "Ganî pêro tepişteyî eynî heqan ra feyde bigîrê. Lazim o rayberê ma zî heq ra feyde bigîro. Heta ke rayberê ma azad nêbo, mimkin nîyo ke aştî û azadî bêro no welatî. Tutê ma dizdî nêkerdê, malê kesî talan nêkerdê û tu kesî nêkiştê. Tena seba heqanê xo û seba cuyêka bi rûmet têkoşîn dayê. Seke pêro şaran heqê ma yê cuye esto. Wexto ke ma vanê, 'Ma estê' o wext hêrişê ma kerdî."

	 

	'CPT beno şirîkê îşkenceyê Îmralî'

	 

	Meryeme dîyar kerd ke nêzdîyayîşê CPT tecrîd tewr zêde keno û vat: "Ez veng dana heqê merdiman yê dinya û Ewropa kena ke çira hemverê zulmî bêveng ê. CPT çend rojî verê ame tîya û nêşê Îmrali. La belê tecrîdo sereyîn Îmraliyî de yo. Çira CPT rolê xo kay nêkeno. Wezîfeyê ci vernîgirewtişê îşkenceyî yo la beno şirîkê nê îşkenceyî. Şarê Kurdî êdî nîno xapinayîş. Êdî ne bindestî ne zî no zulmî qebul keno. Ê qebul kenê nêkenê la mîmarê aştîye Abdullah Ocalan o."

	 

	'15 serrî bi ame tepiştene, 60 serrî yo ceza ci rê ame birnayene' 

	 

	Ramazan Yilmaz serra 2014 de hema 15 serre bi ame tepiştiş, 4 serrî zîndanê tutan de mend û dima ra ey şawitî Zîndanê Tîpê D yê Amedî. Dayîka ey Sebrîza Yilmaz wina bale ant serê rewşa lajê xo: "60 serrî ceza dayî lajê mi û lajê mi 7 serrî yo tepişteye yo. cezaya  dîsîplînî ra ma nêeşkenê şêrê pêvînayîş. Ma tena bi rayîrê telefonî de  Ramazan dir qisey kenê. Pêro tepişteyî binê tecrîd û îşkenceyî de yê. Îşkenceyê cigêrayîşê viran tutanê ma rê ferz kenê. Çira hende teda û zordarî serê şarê Kurdî de esto? Şarê kurdî tena dewaya heqê xo kenê."

	 

	'Wa pêro kesî seba tepişteyan têkoşîn bikerê'

	 

	Sebrîze tewr peyîn qiseykerdişê xo de wina veng da: "Wextê vîyarte de lajê mi zî tewrê grevê vêşanîye bibi. Seba grevî nêweşîyê cîya ey dir peyda bî. Çimê her wext zîndan û nêweşxane de bi. Ma zî wareyan de bî û ma zî bi çalakîya xo paştdayîş bidê. Nika zî eynî çî kenê. Ma pêro dayîkî tepişteyan ê û ma wazenê waştişê tepişteyan bi ca bîyarê. Tutê ma 24 saetî hişê ma de yê. Ma rewşa înan ra endîşeyîn ê. Tepişteyan kenê hucreyan. Zulm û teda bi înan kenê. Veng dana pêro kesî vejîyê meydanan û seba tutanê xo têkoşîn bikerê."