Dayîka tepişteya nêweşe Fatma Şen: Kênaya mi terkê mergî ameya kerdene 

2021-02-18 09:15:44


	 

	 

	Rojda Aydin

	 

	SÊRT - Tepişteya nêweşa Durî Kaygusuza Zîndanê Tîpê Myê Êlihî yena tepiştene, her ke şino rewşa weşîye aye tewr xirab bena. Dayîka Durîye Fatima Şen, ard ziwan ke rewşa kênaya aye her ke şino giran beno û vat: "Ez veng dana hukmatî ke tedawîya kênaya mi nêkenê û vana kênaya mi vera bidê ma eşkenê tedawîya aye bikerê."

	 

	Zîndanê Tirkîya û herême de dimayê pandemî, tewr zêde rewşa tepişteyan kewt tehluke. Xeylêk tepişteyî pêwa ke raporê Sazgehê Tipê Edlî (ATK) ke vano, “nêeşkenê zîndan de bimanê" zî nînê tahlîyekerdene. Sewbîna goreyê dayeyê Komelaya Heqê Merdiman (ÎHD) zîndanan de bi pêroyî hezar 605 tepişteyê nêweşî estê. Nê nêweşan ra 50 zêdeyêr înan zî cinî yê. Nê tepişteyanê nêweşan ra yew zî cinîya 62 serrî Durî Kaygusuz a.

	 

	Verê bi serrêke û di mengan hemserek û îdarekarê HDP û DBPyî zî mîyan de 61 kesî ameybî tepiştene. Kesê ke ameyî tepiştiş, pêwa Durîye 25 kesî ameyî tepiştiş û erşawitî zîndan. Durîya ke zîndanê Tîpê Eyê Sêrtî ameyîne tepiştene, verê hîrê mengî surgunê zîndanê Tîpê Myê Êlihî ameye kerdene. Durîya ke seba tewrê grevê vêşanîye yê 2018 de bi rayberîya Hemsereka KCDyî û seba xebatê xo yê mîyanê KCD û HDPyî de muhakemekerdene roniştişê dewa do 19ê menga Dîlokî de bêro vînayene.

	 

	Xeylêk nêweşîyê aye estê

	 

	Durîya ke "endamîya rêxistine" yena muhakemekerdene, nêweşîya qelbî, çim, şekir ci dir esto û hîpertansîyonê aye zî esto. Sewbîna no demêko yo cicikê Durîye ê çepî de zî grêkêk peyda bîyo, seba nê nêeşkena destê xo yê çepî zêde bixebitno û beno ke bi kanserê cicikî esto. Durîya ke ganî şêro nêweşxane seba wexto ke şina her rey rewşa pandemî ra mecbûr manena 14 rojan karantîna de bimano û nêeşkena lazimîyê xo bi ca bîyaro, nêşina nêweşxane.

	 

	Keye biendîşeyîn o

	 

	Dayîka Durî, Fatim Şen ard ziwan ke nêweşîya kênaya aye giran bena û vat: "Rewşa kênaya mi zîndan de tehluke de ya. Seba ke nêweş a nêeşkena biewno xo ra. Kênaya mi bêsuc ameya tepiştene. Kênaya mi Dîlok ra seba dewaya lajê xo amebî Sêrt. Dima ra sereştişê keyeyî ra ameye tepiştene. Wa kênaya mi vera bidê. Aye nêeşkena zîndan de bimano. Çimê aye baş nêvînenê. Kênaya mi pêwa raporê doktoran ê 'nêeşkena zîndan de bimano' zî nîna veradayîş. Wa ganî kênaya mi vera bidê."

	 

	'Kênaya mi terkê mergî ameya kerdene'

	 

	Fatime, dîyar kerd ke hema cezaya kênaya aye nêameya tesdîq kerdene û vat: "Kênaya mi yena muhakemekerdene û hema nêameya cezakerdene. Roniştişê kênaya mi ê 3ine do 19ê Sibate bêro vînayene. Omidê mi o yo ke no roniştiş de bêro veradayîş. Wa kênaya mi vera bidê, ma eşkenê tedawîye aye bikerê. Lajê kênaya mi, tornê mi zî zîndan de yo û ling û milê ey ameyo tirakerdiş. O zî nêweş o û rewşa ey zî giran a. 40 serrî ceza ci rê ameya birnayîş û kênaya mi seba ey zî qehirêna. Ma xêrcê veradayîşê kênaya xo çîyêk bîn nêwazenê. Seba nêweşîya kênaya xo ma bi endîşeyîn ê. Wa kênaya mi vera bidê. Kênaya mi terkê mergî kerdê."